Luka 18 - Le Nouveau Testament in Kele (Lokele) 1958

Lisomboli lia Bofiili

¹ Inde lotel’iyo bombila litina mbo basombokoleke mbile la mbile angolewa.

² Inde mbo— Aäkä nda bokenge ɔmɔi Bokomyi wa njasɔ oyatiawangäkä Mungu la oyatialitesäkä bato,

³ la aäka’imɔ nda bokenge ona lotika loa olome, inde lɔkɛkɛ bakɛ wike ende Bokomyi, inde mbo— Longesaka’mi end’inde oyatolukela’mi loasɔ.

⁴ Ko mbile bimɔi Bokomyi angolɛmbɛ, nde mbisa inde loenyela nda botema mbo— Itiwange Mungu la itilitese bato,

⁵ kongo ko eoka elotika-lo atookekesa’mi likati, itolongesa nde inde mbo atatɛkwɛsɛ’mi la baya bande wike.

⁶ Ngɛnɛ loonga mbo— Okaka to lioi eliaongäkä Bokomyi ebotienganeke.

⁷ ¿Mbo Mungu aitolongesa ebande ebasoaa Inde ebatoleel’Inde la löwa la ocho, aitolombakel’iyo?

⁸ Isoonga lanu mbo Atolonges’iyo la mangu. Kongo ko akayeke Wana wa Boto, atoosha nde liimeli nda wenda-bo?

BoFalusi la Bɔsɔnji wa Bɔsɔmbi

⁹ Inde loonga imɔ bombila-bo eoka ya bamɔi ebatangi nde mbo bengani, nde basɛɔkɔli bato basi.

¹⁰ Yesu mbo— Bato ambale lɔkɛ nda ndakɔ ya Mungu okasombola, ɔmɔi WaFalusi, oyɔmɔi Bɔsɔnji wa bɔsɔmbi.

¹¹ WaFalusi loemesana fii ndosombola ko inde angɛnɛ, inde mbo— E Mungu, isof’Aɛ kelekëlë mbo im’iti kwa bato basi, kwa eba biya, l’ebatiengane, l’eba nyongo, ango kwa ebɔsɔnji-bo wa bɔsɔmbi.

¹² Itokilaka bieka ko becho imbale nda yenga, itofaekefa lifaefi lia likao lia liu lia bitotina ebitɔɔlɔ’mi.

¹³ Nde Bɔsɔnji loemala ko esika, atilɛmbɛ ango oila baiso likolo, nde inde loomaka bokükü wande; inde mbo— E Mungu, mɛsɛlɛkɛ’mi oyatokelaka obe.

¹⁴ Yesu mbo— Isoonga lanu mbo oyo bɔsɔnji ainywäkä eyande ani aenganesomu nda baiso ba Mungu, inga boto ona ako BoFalusi; eoka boto oyatotaliak’inde angɛnɛ, ɛɔndwɛsɔmɔkɔ se; nde oyatɔɔndwa se, inde angɛnɛ etaliomoko tala.

Yesu la Bainɛngɛ

¹⁵ Bato loeshel’Inde ko bana baoli mbo amatek’iyo, nde ɛnɛ̈kɛ̈ baeki ongoma, iyo loim’iyo.

¹⁶ Nde Yesu lota bana lioi mbo bayeke tina lande limɔ Inde mbo— Machaka bana baoli bayeke ende’mi; okufesëk’iyo, eoka Bokota wa Mungu wende ende ebofɔnɔ-bo.

¹⁷ Wewe, itoonga lanu mbo— Boto oyaitoaela Bokota wa Mungu kwa atokela wainɛngɛ, ani inde angɔɔtɔ omao.

Boto wa Lifoka

¹⁸ Bokumi ɔmɔi lofel’Inde mbo— ¿Boekesi Bolau, ikeleke moni mbo yɔ̈lɛkɛ loiko loa layalaya?

¹⁹ Yesu loonga lande mbo— ¿Monito ototanga’mi bolau? Angwɛnɛ ango ɔmɔi olau sakolo ko Mungu angɛnɛ.

²⁰ Oluwi nde Bikela; Ochwëke nyongo, Wolëke oto, Wiyëke, Otëke nanga, Litesaka sango la nyango waɛ.

²¹ Bokumi loonga mbo— Isolitesa e-bikela-bi bitotina konda isenge shami konda eweuse.

²² Okäkä Yesu ongoma, Inde loonga lande mbo— Osoomelo ko lɔmɔi kongo, tambesaka bitotina ebile laɛ, kaelaka ebatouwe, ongoma otɔɔlɔ bondanda nda use; limɔ yauku, tutaka’mi.

²³ Okäk’inde ebaoi-ba inde lowa ikɛnɛnɛ finɛ eoka aäkä la bieto ya likama.

²⁴ Enɛ̈kɛ̈ Yesu ongoma, Inde mbo— Aina bowaü ende bafoka ndɔɔtɔ nda Bokota wa Mungu.

²⁵ Bowaü wa ngamela woeta nda lifola lia iolo, botiengane la bowaü wa oto wa lifoka ndɔɔtɔ nda Bokota wa Mungu.

²⁶ Bato ebokäkä ongoma, loonga mbo— ¿Ndai to atokɔkɔlɔ ouwesomo?

²⁷ Inde loonga mbo— Ebitikɔkɔlɛ bato, ko yao Mungu nd’atokɔkɔlɔ.

²⁸ Petelo loonga mbo— Tɛnɛ, iso nd’asomacha eyasu angɛnɛ la tosotuta Aɛ.

²⁹ Yesu loonga lau mbo— Wewe, itoonga lanu mbo boto oyamachi ndakɔ, angoko wali, angoko bitungani, angoko ebaot’inde, angoko bana ko l’eoka ya Bɔkɔta wa Mungu,

³⁰ ɛɔlɔkɔ nde yao ko baɔlɔ wike kwani nda mbile-ye, la nda mbile eyekayeke, ɛɔlɔkɔ loiko loa layalaya.

³¹ Yesu loesha eba liu la ambale lande elela ɛmɔi, Inde loonga lau mbo— Tɛnɛ ngo, tɔsɔkɛ Yelusaleme, omao bitotina eyatäkä batɔndɔli nda kasa yau eoka ya Wana wa Boto, ambo yao bitokɔchɔmɔ kɔkɛ.

³² Atokɛsɔmɔ ende bato ba yese yasi, batot’Inde kungutu, atotwɛlɔmɔ sɔi,

³³ batoom’Inde fimbo, la batool’Inde la nda lise lia asatɔ atouwa liasi.

³⁴ Nde batiaoshäkä litina lia e njasɔ-bi; baoi-ba baisameläk’iyo, batialuwak’imɔ baoi ebaongäk’Inde lau.

Boto wa Botuku nda Yeliko

³⁵ Iyäkä Inde tina la bokenge wa Yeliko boto wa botuku loyalaka se nda ɔngɔ wa mboka ani atömba yeka.

³⁶ Okäk’inde bilundi ya ekuke ya bato ebatoeta, inde lofela litina moni.

³⁷ Iyo lokambes’inde mbo ende Yesu wa Nasaleta oyatoeta.

³⁸ Lamao inde loamama mbo— Yesu Wana wa Dawidi, okelaka’mi ngandi!

³⁹ La bato ebetaka oso loimak’inde mbo ayaleke tau; kongo ko inde loamama liamami lioeta, mbo— Yesu Wana wa Dawidi, okelaka’mi ngandi!

⁴⁰ Limɔ Yesu losikama, Inde loonga lau mbo baeshek’inde; iyak’inde tina, Yesu lofel’inde mbo—

⁴¹ ¿Olɛmbi nde mbo ikeelek’aɛ iye? Inde loonga mbo— Ngɛnɛ, mbo yɛnɛkɛ liasi.

⁴² Yesu loonga lande mbo— Ɛnɛkɛ to liasi; liimeli liaɛ lisouwes’aɛ. Kwaamao, inde lɔɛnɛ liasi, inde lotuta Yesu, inde loinakela Mungu. Ɛnɛ̈kɛ̈ bato batotina ongoma, iyo loinakela Mungu la bɛɛlɛ.