Luka 17 - Le Nouveau Testament in Kele (Lokele) 1958

¹ Yesu loonga la baeki bande mbo— Angokɔkɔlɔ ndokufa mbo tolonga totakwesa bato nda obe, kongo ko aeko wale end’inde oyatotake twao.

² Loeti nde l’olau mbo litalɛ lifi likandomoko nda kingo yande, la mbo aumbolomoko nda balia ba eliya, eoka liwa lia oyatokwesa ɔmwito wa ebana-ba bakɛkɛ litolonga liwa lina.

³ Tatichaka bekeeli yanu angɛnɛ. Eyambo etungani yaɛ ekela obe, imaka inde; ekalangana, mɛsɛlɛkɛ inde.

⁴ Ango ekeel’aɛ obe bakela bosambale nda lise limɔi, nde einwaka end’aɛ bainwa bosambale oyaonga mbo— Isokalangana; otomɛsɛl’inde.

⁵ Batomomu loonga la Ngɛnɛ mbo— Ulwesaka liimeli liasu.

⁶ Limɔ Inde loonga mbo— Boyala la liimeli kwa lokoto lɔkɛkɛ loa mbasɛ, ani ino koonga la isandu sina mbo— Aɛ angɛnɛ uwolomo, lɔɔmɔ nda balia ba eliya; ongoma shao kolitesa lioi lianu.

⁷ ¿Ndai wanu eyala la bɔkɔwa oyatokuwa elanga, angoko oyatotingana la bɛkɔkɔ, akasokwek’inde nda elanga oyaya okenge, koonga lande mbo— Yauku, yalaka se lisasaya nda bieka?

⁸ Mba, aitotaonga lande mbo— Takomyielaka’mi yeka yola, wataka esinda ya mɛsa, telaka’mi bieka nda mɛsa; akaleke la akainweke’mi, limɔ mbisa aɛ kola, aɛ komwa.

⁹ ¿Atofaka bɔkɔwa kelekëlë ko eoka asokeel’inde ko yao ebisokambesomo inde?

¹⁰ Ino imɔ ko ongoma; akasilek’ino lotimbana lototina elokambesomuku ino, ongaka mbo— Tole bɛkɔwa ya bikwɛlɛ, tosokela ngo ko lotimbana eloengani nde lasu okela.

Bato liu ba baɛndi

¹¹ Akɛndɛk’Inde nda mboka ya Yelusaleme, Inde loetaka atiteni ya yese ya Samalia l’eya Ngalilai.

¹² Ɔtɔ̈kɔ̈ Yesu nda bokenge ɔmɔi, bato liu ba baɛndi loyatowana lande, iyo losikama ko esika,

¹³ iyo loamama mbo— Yesu, Bɔkɔta, okelaka iso ngandi.

¹⁴ Limɔ ɛnɛ̈kɛ̈ Inde wɛn’iyo, Inde loonga lau mbo— Kɛndɛkɛ okɛnɛsɛ BaKanga komba yanu.

¹⁵ Loyaka nde mbo aɛk’iyo, iyo lotanesomo. Ɔmɔi wau, ɛnɛk’inde mbo asosäsesomo, inde loinwa ani inde loinela Mungu la limiki lifi,

¹⁶ inde lotulia bɔmbɔ se nda batindi ba Yesu, inde lof’inde kelekëlë; boto ona aäkä wa Samalia.

¹⁷ Yesu lomutoel’inde mbo— ¿Bato liu batitanesomuku; ebamɔi libwa anima to?

¹⁸ ¿Angwɛnɛ boto wasi woinwa oinela Mungu, sakolo ko oy’ati wa BaYuda?

¹⁹ Yesu loonga lande mbo— Emalaka, kɛndɛkɛ eyaɛ; liimeli liaɛ lisouwes’aɛ.

Mbile eyetoya la Bɔkɔta wa Mungu

²⁰ Afelomökö Yesu ko la BaFalusi mbo— ¿Eni mbile eyekayeke la Bokota wa Mungu? Inde lomutoel’iyo mbo— Bokota wa Mungu botiye ko la botichakëlä,

²¹ baitoonga mbo— Tɛnɛ bole eya, kwa anamana; Tɛnɛ ngo Bokota wa Mungu bole atiteni yanu!

²² Limɔ Inde loonga la baeki bande mbo— Becho belayaka ebilokeke ino yɛmɛ yɔɛnɛ lise limwito lia Wana wa Boto, kongo ko botilɛnɛkɛ ngo wao.

²³ La beongaka lanu mbo— Tɛnɛ anamana; Tɛnɛ onomono! Ɔkɛ̈kɛ, otutëk’iyo!

²⁴ Eoka kwa atobalikima ibalibali fangi ɛmɔi ya use okaamela imɔ konda fangi eyɛmɔi ya use, kwa akayaleke imɔ ko Wana wa Boto nda lise liande.

²⁵ Kongo ko loengani nde lande mbo ataokesomoko biale wike la afekelomoko la efɛtɔ-ye.

²⁶ Kwa ayaläkä wenda nda mbile ya Noa, ko ongoma nda bacho ba Wana wa Boto;

²⁷ balakäkä bieka, bamwäkä, basɔngɔ̈kɔ̈ bali, basɔngɛsɔmɔ̈kɔ̈ konda bochoao ewaɔtɔ̈kɔ̈ Noa nda ndakɔ ya watɔ, limɔ fela efi loya oyaombes’iyo yaatotina hombe.

²⁸ Ongoma imɔ, kwa ayaläkä bato nda mbile ya Loti, baläkä, bamwäkä, basombäkä la baungesäkä liöngo, balɔɔ̈kɔ̈ bilanga, baswäkä ndakɔ

²⁹ kongo ko nda bocho ewasokwäkä la Loti nda bokenge wa Sodoma, bösä la kibiliti yatɔnɔ̈kɔ̈ nda use, la wao loombes’iyo yaatotina hombe.

³⁰ Loyalaka ongoma la lise likɛnɛlɛkɛ Wana wa Boto.

³¹ Nda bocho ona boto eyala olikolo lia ndakɔ ani biengo yande bitikali nda tindo, asulwëke se ndɔɔsɔ yao; boto eyala nda elanga, ainwëk’imɔ bokenge.

³² Enyelaka loaso loa wali wa Loti.

³³ Boto oyatolukä mboka yotekamesa liwawi liande, atolefesa nde liao; la oyatolefesa liao, inde nd’atoikesa liao.

³⁴ Itoonga lanu mbo— Nda bocho ona, bambale beingala nda tange ɛmɔi; ɔmɔi kosokolomo, oyɔmɔi komachana.

³⁵ Batomali bambale betwanga befonga amamwito nda lokulu ko lɔmɔi, ɔmɔi kosokolomo, oyɔmɔi komachana.

³⁷ Iyo lofel’Inde mbo— Anima to, Ngɛnɛ? Inde loonga lau mbo-Olo akayaleke bolyo, ambo toyoiyoli kosɔngɔkɔmɔ ngo ko omao.