Luka 10 - Le Nouveau Testament in Kele (Lokele) 1958

Lɔkɛndɔ loa Baeki Kama Osambale

¹ Mbisa lamao Yesu loaa bato basi kama bosambale, Inde lotoma iyo, bambale bambale, baɛkɛ oso wande nda bekenge la bilela bitotina ebikakɛndɛlɛk’Inde angɛnɛ.

² Inde loonga lau mbo— Eula yende efi, nde ebatotwaka yao bende bamyo; eokao sombolaka Ngɛnɛ wa eula mbo atomeke batwi nda eula yande.

³ Kɛndɛkɛ lɔkɛndɔ; tɛnɛ, isotom’ino kwa bifembeli ya bɛkɔkɔ nd’atiteni ya ngɔi.

⁴ Otolëke litanga lia yeto, ango buku, ango tokwaka, oseelëke boto nda mboka.

⁵ Nde nda ndakɔ eyekaɔtɛk’ino, taongaka mbo— Lilatemi liyaleke nda ndakɔ-ye; eya wana wa lilatemi eyala omao, lilatemi lianu liyalaka nde lande,

⁶ nde eti ongoma, ambo lilatemi lianu liinwaka end’ino liasi.

⁷ Olo atɔɔt’ino ndakɔ, tikalaka ngo ko omao, mwaka la laka bieka ebitofomo ino, eoka bosali boengani ndofomo posho yande; wetetëke ndakɔ la ndakɔ.

⁸ Nda ona bokenge ebokaɔtɛk’ino la batonyangel’ino olau, laka bieka ebitotamb’iyo ino.

⁹ Säsekesaka eba ngwo ebale omao, ongäka lau mbo— Bokota wa Mungu bosoya tina lanu.

¹⁰ Kongo ko bokenge ebotɔɔt’ino, eyambo batinyangel’ino, umaka lousa nda lɔ̈mbɔ, ongaka mbo—

¹¹ Tosofufoelak’ino ango liunge lia bokenge elisowatema la batindi basu, kongo ko luwaka wewe mbo Bokota wa Mungu bosoya tina lanu.

¹² Itoonga lanu mbo, nda lise lia likomyi lina, bokenge wa Sodomo angooka likuchi lifi elikokeke bokenge ona.

¹³ Aeko Kolasini! Aeko Betesaida! Eya to mbo bisisho eyakelomökö eyanu, kokelomo nda Tulo la Sidona, ani bakalanganäkä ko kwalakwala la baala nda lokomba, l’ani bayali nda nyɛlɛ la bisinda ya bakonia.

¹⁴ Nde nda likomyi, elianu likuchi litoeta elia Tulo la Sidona.

¹⁵ ¿L’aɛ moni, Kafenauma; mbo aɛ kotaliomo konda use? Mba, otoumbolomo nda liyöndo lia liwa.

¹⁶ Oyatooka ino, atooka nde Imi; la oyatofekel’ino, atofekela nde Imi; la oyatofekela Imi, atofekela nde Inde oyatomäkä’mi.

Liinwi lia ebatomomu lɔkɛndɔ

¹⁷ Eba kama bosambale loinwa la limɛngɔ, iyo loonga lande mbo— Belimo ebe angɛnɛ bitolitesa iso ko l’eoka ya lina liaɛ.

¹⁸ Inde loonga lau mbo— Yɛniki Satana ani asokwa se nda use kwa ibalibali.

¹⁹ Tokai Isof’ino isosha shomatela njɔ la tokwakwa la isosha sholongela bofoka bototina wa Wiyani, angwɛnɛ ango ɛmɔi kookes’ino wäle.

²⁰ Kongo ko oomalëke nda betema ko l’eoka mbo belimo ebe bisolites’ino, nde okaka limɛngɔ eoka mbo baina banu basotomo nda lokasa nda Use.

²¹ Nda mbile-ao Yesu loyaimwesa botema ko la Bolimo Botanu, Inde mbo— Isoinel’Aɛ Sango, Ngɛnɛ wa Use la se, ko la kelekëlë, eoka mbo osoisa njasɔ-bi ende eba wɛlï la eba liluwani, nde osoisola yao ende bana’oli; eingo ko Sango eoka loao lɔɛnɛlɛ lolau nda lisangi liaɛ.

²² Bitotina bisofomo’mi ko la Sango wami; angwɛnɛ ango ɔmwito oyatolüwa Wana sakolo ngo ko Sango la angwɛnɛ oyatolüwa Sango, sakolo ngo ko Wana, la inde imɔ oyatosanga Wana ndoɛnɛsɛ inde Sango.

²³ Limɔ Inde lokikwa ende baeki bande, Inde loonga lau wisakumbo, mbo— Baiso banu basofota la limɛngɔ eoka basɔɛnɛ njasɔ-bi,

²⁴ eoka isoonga lanu mbo batɔndɔli wike la bɛkɔta imɔ balɛmbɛkɛ finɛ ndɔɛnɛ ebisɔɛnɛ ino, nde batiɛnɛ̈kɛ̈ yao; la ndooka ebisook’ino, nde batiokäkä yao.

Yesu loekesa Bokumi Bikela Biyai

²⁵ Lise limɔi, Bokumi ako Bosanokoli wa Bikela loemala ndokotela Yesu la lofelo, inde mbo— Boekesi, itokela nde moni ndosɛɛlɛ loiko loa layalaya?

²⁶ Yesu loonga lande mbo— ¿Bini bitomu nda lokasa loa Bikela? ¿Otangi nde moni omao?

²⁷ Bokumi lomutola mbo— Samaka Ngɛnɛ Mungu waɛ la botema bototina, la bolimo waɛ bototina, la bofoka waɛ bototina, la baenyeli baɛ batotina, la Samaka boyalani laɛ kwa ani atosama aɛ angɛnɛ.

²⁸ Yesu loonga lande mbo— Limutoli liaɛ liengani chaa; kelaka ongoma, nde wayala la loiko.

²⁹ Kongo ko Bokumi, eoka alɛmbɛ̈kɛ̈ ndoengana, inde loonga la Yesu mbo— ¿Ndai to ale boyalani lami?

³⁰ Yesu lomutoel’inde mbo— Boto ɔmɔi asokweläkä Yelusaleme okakɛ konda Yeliko, la mboka inde losungamelomo l’eba beoni, iyo losokola bisinda yande, iyo lokuchak’inde, iyo lotangwaka, iyo lomach’inde oko tina lowa.

³¹ Loäkä nde mbo kanga loeta imɔ ko la mboka ena, limɔ ɛnɛ̈k’inde boto, inde loengwa mboka yasi.

³² Limɔ ɔmɔi wa BaLewi imɔ loiyela elela ena, nde ɛnɛ̈k’inde boto, inde loengwa fangi yasi.

³³ Nde ɔmɔi wa Samalia oyaɛ̈kɛ̈ lɔkɛndɔ loosh’oto nda elela ena, ɛnɛ̈k’inde boto, inde lookel’inde ngandi fuu,

³⁴ inde lɔkɛ end’inde, inde lokandaka bafwa, inde lowɛlɛ baita la bänä nda bao, limɔ inde lotalia boto nda funda yande angɛnɛ, inde lokɛs’inde ani konda ndakɔ y’eba kɛndɔ, inde lokukya boto omao.

³⁵ Lanɔngɔ inde lokusola falanga imbale, inde lofa botingani wa ndakɔ yao, mbo— Tinganelaka’mi lande la wɛlï, ango bosilesa falanga yasi, akainweke’mi, itokamb’aɛ yao.

³⁶ ¿Otoenyela mbo ndai wa bato-ba basatɔ ende boyalani wa boto ona oyasungamelomökö l’eba beoni?

³⁷ Bokumi lomutola mbo— Inde oyakeelaka boto booto. Limɔ Yesu loonga lande mbo— Aɛ imɔ, kɛndɛkɛ okakela ongoma.

Malia la Maleta

³⁸ Akɛndɛ̈k’iyo lɔkɛndɔ, Yesu loiyela bokenge bɔkɛkɛ, la omao botomali ɔmɔi ako Maleta lonyangel’Inde nda ndakɔ yande.

³⁹ Maleta aäkä la etungani ako Malia, inde loyala se nda bakolo ba Yesu ndooka liekesi liande;

⁴⁰ nde Maleta loeyaeya eoka ya bakuwa wike; inde loyaemala oso wande, inde loonga mbo— Ngɛnɛ, otiɛnɛ finɛ mbo etungani yami amachi’mi angɛnɛ ndokomya bieka? Ongaka to lande mbo asungeke’mi.

⁴¹ Yesu loonga mbo— Maleta, Maleta, ototakela njasɔ wike bolenda la loeyaeyo lofi,

⁴² kongo ko lɔmɔi loenu nde, la Malia asoaa lona lolau elotiaɔnɔkɔlɔmɔkɔ end’inde.