Liɛnɛsu 7 - Le Nouveau Testament in Kele (Lokele) 1958

Bato ba Mungu lotomo ndembe nda toangala twa bɔmbɔ

¹ Mbisa yaamao, imi lɔɛnɛ bakitomo banɛi bemakali nda bako banɛi ba wenda-bo la bakufesi fofo inɛi ya wenda mbo lofofo lotafofa nda nyɛlɛ, kwa nda balia, kwa nda isandu ango simɔi.

² Limɔ imi lɔɛnɛ bokitomo wasi, oyatɛmwaka nda ɛsɔswɛlɔ ya bonyanya, ani aundi ndembe ya ɛsɔlɔnɛlɔ ya Mungu wa liwawi, la inde loamamela bakitomo banɛi la limiki lifi, bako ebakitomo ebafomoko isosha shobebekesa nyɛlɛ la balia,

³ inde mbo— Obebesëke nyɛlɛ, angoko balia, angoko tosandu, ani tokasɔlɔnɛsi bɛkɔwa ya Mungu wasu la ndembe nda toangala twau.

⁴ Limɔ imi loka loketi loa ebasɔlɔnɔmɔkɔ la ndembe, loko bilɛfu mia la bilɛfu kama inɛi la inɛi, bako eba tukela bitoti ya bana ba Isalaele.

⁵ Eba tukela ya Yuda ebasɔlɔnɔmɔkɔ la ndembe, ko bilɛfu liu la imbale, Eba tukela ya Lubena, ko bilɛfu liu la imbale. Eba tukela ya Gada, ko bilɛfu liu la imbale.

⁶ Eba tukela ya Asela, ko bilɛfu liu la imbale. Eba tukela ya Nafatali, ko bilɛfu liu la imbale. Eba tukela ya Manase, ko bilɛfu liu la imbale.

⁷ Eba tukela ya Simeona, ko bilɛfu liu la imbale. Eba tukela ya Lewi, ko bilɛfu liu la imbale. Eba tukela ya Isaka, ko bilɛfu liu la imbale.

⁸ Eba tukela ya Sebulone, ko bilɛfu liu la imbale. Eba tukela ya Yosefa, ko bilɛfu liu la imbale. Eba tukela ya Benyamina, ko bilɛfu liu la imbale.

Etanda ya likama ya tukela bitoti ya wenda-bo

⁹ Mbisa yaamao, imi loticha la tɛnɛ ngo ekuke ya likama eyetikɔkɔlɛ ndotangomo la boto angɔmɔi, bato ba biese bitoti l’eba tukela la kanda ya bato l’eba baoi batoti, iyo loemakala oso wa kɛka efi l’oso wa Wana wa bɔkɔkɔ la bawataka kanjo bifufu la bakanga ba batoko nda besamba yau.

¹⁰ La iyo loamamaka la limiki lifi, iyo mbo— Liuwesi lisoomana la Mungu wasu Oyayali se nda kɛka efi la imɔ ko la Wana wa bɔkɔkɔ.

¹¹ La bakitomo batoti ebalingeli kɛka efi la biange, l’eba liwawi banɛi, iyo lokwa biɔmbɔ se oso wa kɛka efi la iyo losemokola Mungu,

¹² iyo loonga mbo— Eingo ko, lifoti la tala la wɛlï la kelekele la lilitesi la bofoka la isosha biyaleke la Mungu wasu ko layalaya! Ongoma!

¹³ Limɔ ɔmɔi w’eba biange lofela’mi, inde mbo— ¿Bende bandai to ebasowataka kanjo bifufu la basekwi nde l’onima?

¹⁴ La imi loonga lande mbo— Ngɛnɛ, Aɛ nd’aluwi. Limɔ Inde loonga lami mbo— Eba bende ebasosekwa nda bifembi bifi la basosoola kanjo yau la basofufola yao nda bakila ba Wana wa bɔkɔkɔ.

¹⁵ Eokao bayali nde oso wa kɛka efi ya Mungu, la batosemokola Inde la löwa la ocho nda Ndakɔ yande la Inde Oyayali se nda kɛka efi eobyamelak’iyo.

¹⁶ Batiokek’imɔ tosiyɛ liasi, ango ko yɛmɛ yomwa, la löwa la efanga ya loao bitiomanelek’iyo,

¹⁷ eoka Wana wa bɔkɔkɔ Oyayali nd’atiteni ya kɛka efi eyalaka nde Botingani wau la ɛkɛsɛk’iyo ko nda tosolo twa balia ba loiko, la Mungu angɛnɛ eɔmbɔkɔlɔkɔ foo bitoti nda baiso bau.