Liɛnɛsu 4 - Le Nouveau Testament in Kele (Lokele) 1958

Lɔɛnɛsɔ loa Yoane nda Use

¹ Mbisa ya njasɔ-bi, imi loticha la tɛnɛ, bome loliolomo nda Use, la limiki lia oso eliokaka’mi ani lisoonga lami kwa ifonge, liao loonga lami liasi mbo— Lilaka ono la itɔɛnɛs’aɛ yao ebiondu ndoya ko mbisa.

² Lisasaya imi lokayalake la Bolimo, limɔ tɛnɛ ngo, kɛka lotomo nda Use la boto ayali se nda yao!

³ La Inde oyayali se omao, lokwelo bɔfɔnɔ wa lisasɛ lia bɔfɛkɔ liko jaspe la kwa lisasɛ liko sardoine la bonama lolingela kɛka ewɛnɛli kwa bɔfɔnɔ wa lisasɛ lia ikɛikɛli.

⁴ La kɛka yasi litinda la inɛi lolingela kɛka efi la biange litinda la inɛi loyala se nda kɛka ina, bawataka bisinda bifufu la nda betö yau toyoyo twa mbela.

⁵ Limɔ tobalibali la bamiki bafi la bilundi ya kaki lokuswakuswa nda kɛka efi la päka osambale ya bösä loana oso wa kɛka efi, bile balimo osambale ya Mungu,

⁶ la oso wa kɛka efi loyala eliya ewɛnɛli kwa talatala ya wɛ̈li. La ebayali la liwawi banɛi lolingelaka kɛka efi la fangi la fangi, iyo lotuma la baiso, la oso la mbisa;

⁷ ewa oso wa liwawi loyala kwa simba, l’ewa ambale kwa mbolo, l’ewa asatɔ loyala la bɔmbɔ kwa ewa boto, l’ewa anɛi loyala kwa elöngö eyetoungwaka.

⁸ Ebayali la liwawi banɛi loyala ɔmɔi l’ɔmɔi la bafafu liambɛ, iyo lotuma la baiso atiteni la fangi bitotina, la löwa la ocho angotatɛkwa ndoongaka mbo— Botanu, Botanu, Botanu, Ngɛnɛ Mungu wa Bofoka bototina, oyayali, la oyayalaka la oyakayeke!

⁹ La atofaekefa eba liwawi efaef’Inde oyayali se nda kɛka la oyayali la liwawi lia layalaya, ko tala la lilitesi la kelekele,

¹⁰ limɔ biange litinda la anɛi batotulakamel’Inde se oyayali nda kɛka efi la oyayali la liwawi ko layalaya, l’ani batokusha toyoyo twau se oso wa kɛka efi, iyo batoonga mbo—

¹¹ Ngɛnɛ Mungu wasu, Aɛ oondu nde ndɔɔlɔ tala la lilitesi la bofoka, eoka Aɛ nd’akelaka bitotina ebiyali la yakelomoko ko l’eoka ya lisangi liaɛ.