Liɛnɛsu 3 - Le Nouveau Testament in Kele (Lokele) 1958

Wɛndi ende Etanda nda Saladisi

¹ Ende bokitomo ako Botingani wa Etanda nda Saladisi, sɔnɔkɔ mbo— Inde oyayali la Balimo bosambale ya Mungu la tolonge bosambale, Inde nd’aongi mbo— Iluwi nde bekeeli yaɛ; osotangomo mbo wende la liwawi, kongo ko osowa.

² Lambaka to, la kɔkɔmɛsɛkɛ ebitikali ebisambowa eoka itiɛnɛ bekeeli yaɛ mbo bisɔɔlwa nda baiso ba Mungu.

³ Eokao enyelaka yao ebisoimel’aɛ la ebisokak’aɛ, litesaka yao la kalanganaka. Nde eya mbo otilambe, ani yeyaka end’aɛ kwa atoya wiya limɔ oitoluwa mbile eyekayeke lami end’aɛ.

⁴ Nde okoyali nde la bamyɔ nda Saladisi ebatibebese bisinda yau la bɛkɛndɛkɛndɛkɛ amamwito lami ko la bisinda bifufu, eoka bengani nde.

⁵ Inde oyatolonga, ewatesomoko ongoma la bisinda bifufu, la itiafanjeke lina liande nda lokasa loa loiko, nde yeaolaka lina liande oso wa Sango wami la oso wa bakitomo bande.

⁶ Inde oyayali la litoi, okeke yao ebitoonga Bolimo la bitanda!

Wɛndi ende Etanda nda Filadelafia

⁷ Ende bokitomo ako Botingani wa Etanda nda Filadelafia, sɔnɔkɔ mbo— Inde oyayali Botanu la wewe, ako Inde oyayali la lofungola loa Dawidi, la oyatoliola, angwɛnɛ boto atolia; la oyatolia, angwɛnɛ boto atoliola, Inde nd’aongi mbo—

⁸ Iluwi nde bekeeli yaɛ, tɛnɛ ngo, oso waɛ isota bome eboliolomu nde, angwɛnɛ boto angɔmɔi kokɔkɔlɔ ndoliaka wao; iluwi imɔ mbo wende ko la bofoka sinyo kongo, nde osolitesa lioi liami la otianganye lina liami.

⁹ Tɛnɛ ngo, itofaef’ino eba ɛsɔngɔmɛlɔ ya Satana ebasoonga mbo bende BaYuda, ani bati bau, nde bale la lolanga; tɛnɛ ngo, itoiyes’iyo mbo bayeke oyatulama se oso wa batindi baɛ, la mbo baluweke fololo mbo isosama aɛ.

¹⁰ Eoka osokɔchaka lioi liami lia likɔkɔmɛlɛ, Imi imɔ yetinganaka laɛ nda mbile ya likoteli elisamboya ende bato ba wenda bototina ndoyakotela ebasoyala ono se.

¹¹ Itoya lisasaya, takuamelaka to yao ebile laɛ, mbo boto ataɔnɔkɔlɔ iyoyo shaɛ sha loiko.

¹² Inde oyatolonga, itosɛl’inde likole nda ndakɔ ya Mungu wami, la atilasekwek’imɔ omao la yelasɔnɔkɔ end’inde lina lia Mungu wami, la lina lia bokenge wa Mungu wami, boko Yelusaleme eyai ebotosulwa se nda Use ko ende Mungu wami, la lina eliyai liami angɛnɛ.

¹³ Inde oyayali la litoi, okeke yao ebitoonga Bolimo la bitanda!

Wɛndi ende Etanda nda Laodikiya

¹⁴ Ende bokitomo ako Botingani wa Etanda nda Laodikiya, sɔnɔkɔ mbo— Inde oyayali la lina liko Ongoma, ako Bokambesi wolendelomu la Liako lia eyakelomoko la Mungu, Inde nd’aongi mbo—

¹⁵ Iluwi nde bekeeli yaɛ, mbo oti la bondiya, oti l’etao; ani imi kolɛmbɛ mbo oyaleke kwa la bondiya, kwa la etao.

¹⁶ Nde ongoma, eoka wende la lotatambe, inga la bondiya inga l’etao, isambosɛndɛk’aɛ nda bɔnɔkɔ wami.

¹⁷ Eoka mbo osoonga mbo— Imi yende lifoka la isosɔnja bieto la it’imɔ la boeno wa yeka, la eoka otiluwe mbo osowɛlɔmɔ ngandi ako aɛ, boto wa mbuwa l’iuwe, la botuku, la wase.

¹⁸ Eokao isofumbes’aɛ mbo oyek’ende Imi oyasomba mbela ebisotanesomo la bösä mbo ofoteke wewe, la ndoyasomba bisinda bifufu yowataka la wɛli mbo sɔni ya wase ebole laɛ botɛnɛlɛ la ndoyasomba lisoo lia baiso, liolɔkɔ nda baiso baɛ mbo wɛnɛkɛ la wɛli.

¹⁹ Imi isoimaka la isokucha ebatosamaka’mi osam’iyo; eokao yalaka la bofiili la kalanganaka.

²⁰ Tɛnɛ, isoemala nda bome la isotitaka bome kɔkɔkɔ; eyambo boto eoka limiki liami, la eliola bome, ani yɛɔtɔkɔ end’inde la yelaka lande bieka, la inde elaka amamwito lami.

²¹ Inde oyatolonga, itofaefak’inde isosha shoyala se amamwito lami nda kɛka yami, kwa alongaka’mi angɛnɛ la kwa ayalaka’mi se amamwito la Sango wami nda kɛka yande.

²² Inde oyayali la litoi, okeke yao ebitoonga Bolimo la bitanda!