Liɛnɛsu 22 - Le Nouveau Testament in Kele (Lokele) 1958

¹ Limɔ bokitomo lotamba’mi liande lia balia ba Loiko, ebɛnɛli kwa talatala ya wɛ̈li, la ebasokuswakuswa nda kɛka efi ya Mungu la eya Wana wa bɔkɔkɔ,

² l’ebatocha nd’atiteni ya lɔ̈mbɔ loa bokenge; la nda bɔngɔ la bɔngɔ wa liande, bosandu wa Loiko boyali ebotota bɛfɔnɔ liu la imbale ya tuma ko tengai la tengai; la kasa ya isandu bile yosäsekesa tukela ya wenda.

³ La yeka eyesendomu bieo angoyal’imɔ ina, ko kɛka efi ya Mungu la eya Wana wa bɔkɔkɔ etoyala nda wao, la bɛkɔwa yande batosemokol’Inde;

⁴ la batɔɛnɛkɛ bɔmbɔ wande la lina liande litotomo nda toangala twau.

⁵ Bocho boitoyal’imɔ omao; limɔ bat’imɔ la boeno wa liangangi lia paka, kwa liangangi lia löwa, eoka Ngɛnɛ Mungu elaanekes’iyo la iyo belafomoko isosha sha bɛkɔta ko layalaya.

Baoi ba Lokasa-lo bende bokomo la bokɔchɔmɔ

⁶ Limɔ inde loonga lami mbo— Ebaoi-ba bende bolendelomu la momongo. La Mungu, Ngɛnɛ wa belimo ya bɛtɔndɔli, asotomo bokitomo wande mbo atambeke bɛkɔwa yande njasɔ ebisamboya;

⁷ la toka kɔni, Itoya lisasaya! Limɛngɔ finɛ end’inde oyatolitesa baoi ba litɔndɔli lia e-Lokasa-lo!

⁸ Imi Yoane nd’okakä la imi nd’ɛnɛkɛ̈ njasɔ-bi; la okakä-mi la ɛnɛkɛ̈’mi yao, yakwaka se ndosemola oso wa batindi ba bokitomo oyatambaka’mi njasɔ-bi;

⁹ nde inde loonga lami mbo— Otakelëke ani! Yende bokuwani laɛ la bitungani yaɛ, biko bɛtɔndɔli, la iyo ana ebatolitesa baoi ba Lokasa-lo. Semolaka ngo ko Mungu!

¹⁰ Limɔ inde loonga lami mbo— Osɔlɔnɛsɛ̈kɛ baoi ba litɔndɔli lia Lokasa-lo, eoka mbile esamboya.

¹¹ Boto oyatiengane, ayaleke kɔni ko ongoma; boto oyayali la botema wa bɔwɛwɛ, ayaleke kɔni ko la bɔwɛwɛ; la boto oyengani, ayaleke kɔni ko ongoma; boto oyayali la botema botanu, ayaleke kɔni la botanu.

Lisaka lia lifotesi lia Yesu Angɛnɛ

¹² Toka kɔni, itoya lisasaya! La itoya amamwito la bondanda wami wɔɔlɛsɛ boto la boto kwa engani nde la bekeeli yende.

¹³ Imi yende Alafa la Omega, Ewa oso l’Ewa mbisa, Liako la Losilo.

¹⁴ Bende la limɛngɔ finɛ, bako ebasosoola kanjo yau mbo bayaleke l’isosha shoiya nda isandu sha loiko, la shɔɔtɔ nda bokenge ko la biome.

¹⁵ Omao lousa, bende eba belëfë kwa eya ngwa, l’eba basoo ba fɔnɔli, l’eba nyongo, la baoli ba bato, l’ebatosemola bɛfɔnɔ ya mungu, la batotina ebasami ndolimbakela basi la yɛnɔ.

¹⁶ Imi Yesu nd’atomi bokitomo wami end’ino okakambesa njasɔ-bi ende Bitanda. Imi yende Wili la lioti lia Dawidi, Ilonge sha lisɔi, esilangalangi finɛ.

¹⁷ La Bolimo la Bowai imɔ, basoonga mbo— Yauku! La oyatoka aongeke ko mbo— Yauku! La inde oyale la yɛmɛ yomwa, ayeke! Oyakalɛmbɛkɛ, aɔsɛkɛ balia ba Loiko ko lifaefela.

¹⁸ Itoimaka boto la boto oyatoka baoi ba litɔndɔli lia Lokasa-lo, mbo— Eya mbo boto etaka baoi basi nda loao, Mungu etelaka inde baömä ebasosɔnɔmɔ nda Lokasa-lo;

¹⁹ la eya mbo boto esokola baoi ba Lokasa loa litɔndɔli-li, Mungu esokoel’inde likaɔ liande lia isandu sha loiko, la elia bokenge botanu, ebisosɔnɔmɔ nda Lokasa-lo.

²⁰ Inde oyasotaka boimo-bo nda njasɔ-bi, asoonga mbo— Eingo ko, itoya lisasaya! Ongoma to, yauku, Ngɛnɛ Yesu!

²¹ Booto wa Ngɛnɛ Yesu boyaleke la batotina! Ongoma.