Liɛnɛsu 21 - Le Nouveau Testament in Kele (Lokele) 1958

Use boyai la wenda boyai

¹ Limɔ imi lɔɛnɛ use boyai, la se eyai, eoka wenda wa oso la use wa oso bisowanjwa, la eliya ya balia etiyale imɔ liasi.

² La imi lɔɛnɛ bokenge ona botanu, boko Yelusaleme eyai, ebotosulwa se ende Mungu nda use, la bosokomiomo kwa bowai asowatesomo lilɛngɔ eoka ya olome wande.

³ Limɔ imi loka limiki lifi elisokuswa nda kɛka efi, elisoonga mbo— Toka kɔni, eyaelo ya Mungu ende sisi ya bato, la Inde atoyalaka amamwito lau, la iyo batoyalaka bato bande, la Mungu angɛnɛ nd’atoyalaka amamwito lau.

⁴ Atɔɔmbɔkɔlɔ foo bitotina nda baiso bau, limɔ liwa litiayalek’imɔ liasi, ango ïkɛnɛnɛ, ango etondo ya lileli, ango wale angoyal’imɔ liasi, eoka eya oso bisowanjwa mbao.

⁵ Limɔ Inde oyayali se nda kɛka efi loonga mbo— Toka kɔni, isokela bitotina biyai! Bokitomo loonga mbo— Sɔnɔkɔ mbo— Baoi-ba bende bolendelomu la momongo.

⁶ Limɔ Inde loonga lami mbo— Losoya to ongoma. Imi yende Alafa la Omega, Liako la Losilo, Imi nd’atofaefak’inde oyayali la yɛmɛ yomwa balia ba isolo sha balia ba liwawi ko lifaefela;

⁷ Inde oyatolonga esangolaka yao-bi la yeyalaka nde Mungu wande la inde eyalaka nde wana wami.

⁸ Kongo ko bafefe ba bɔwa l’ebatiimele, l’eba betema ya bɛwɛwɛ, la baoli ba bato, l’eba belëfë, l’eba basoo ba fɔnɔli, l’ebatosemola bɛfɔnɔ ya mungu la batotina ba nanga, iyo ana bɛɔlɔkɔ eliau likaɔ nda eliya ya bösä ebosoaakana la boele, liwa-li liende elia ambale.

Bokenge boko Yelusaleme eyai

⁹ Limɔ ɔmɔi wa bakitomo bosambale ebaundaka biengo bosambale ebitumi la baömä bosambale ba liili, inde loya la inde loonga lami mbo— Yauku l’ono, limɔ itotamb’aɛ Bowai, wali wa Wana wa bɔkɔkɔ!

¹⁰ La inde lotola bolimo wami nda löngo lofi losa, limɔ inde lotamba’mi bokenge botanu, boko Yelusaleme ebosulwi se ende Mungu nda Use,

¹¹ eboanesomu la liangangi lia Mungu. Lolangalango loa wao loende kwa eloa lisasɛ lia bɔfɛkɔ wa loketi lofi loko jaspe, elile la liangangi kwa elia wɛ̈li.

¹² Bokenge bole la likula lifalu la botalemu fafo, elile la biome liu la imbale, la bakitomo liu la ambale bayali nda biome la baina batomu nda biome, bako baina ba tukela liu la imbale ya bana ba Isalaele.

¹³ Nda fangi ya ɛsɔswɛlɔ ya bonyanya biyali biome bisatɔ, la nda fangi ya nord ko biome bisatɔ, la nda fangi ya sud ko biome bisatɔ, la nda fangi ya litele ko biome bisatɔ imɔ.

¹⁴ La likula lia bokenge liaswomoko nda batalɛ ba lionda liu la bambale la baina liu la ambale batomu nda bao, bako baina ba Batomomu ba Wana wa bɔkɔkɔ.

¹⁵ Inde oyaongaka lami ayalaka la isosola sha loela kwa ikweelo, mbo akweeleke bokenge la biome ya wao la likula lia wao.

¹⁶ Bokenge loswomo la bako banɛi ebengani la bosa ɔmɔi; la bosa bole kwa bofalu wa wao. Limɔ inde lokweela bokenge la isosola, mbo bakilomɛta bilɛfu imbale la mia inɛi. La bosa, la bofalu, la botalemu wa bokenge biengani nde chaa.

¹⁷ Limɔ inde lokweela likula lia bokenge, bofalu wengani banganjo mia la kama inɛi la inɛi, la ikweelo sha bolomboki, siko esha bokitomo imɔ.

¹⁸ Yeka eyaswomoko la likula ko basasɛ ba bofɛkɔ bako jaspe la bokenge angɛnɛ waaka ko mbela ya loketi kwa talatala etani tanelele;

¹⁹ la batalɛ ba lionda bakomyomoko la bɛfɛkɔ ya basasɛ ba loketi ba bɔfɔnɔ wike; elia oso ko jaspe, elia ambale ko saphir, elia asatɔ ko calcédoine, elia anɛi ko émeraude,

²⁰ elia bɔɔmwi ko sardonyx, elia liambɛ ko sardoine, elia bosambale ko chrysolithe, elia bonanɛi ko béryl, elia libwa ko topaze, elia liu ko chrysoprase, elia liu la limɔi ko jacinthe, elia liu la ambale ko améthyste.

²¹ La biome liu la imbale loyala ko tokɛikɛli liu la tombale, bome ɔmɔi l’ɔmɔi ko ikɛikɛli simwito sifi; la lɔ̈mbɔ loa bokenge loyala ko mbela ya loketi kwa talatala etanu tanelele.

²² Nde itiɛnɛkɛ Ndakɔ ya Mungu omao nda bokenge, eoka Ngɛnɛ Mungu oyale Ngɛnɛ wa Bofoka bototina, Inde nd’ayali Einelo ya wao la Wana wa bɔkɔkɔ lisanga.

²³ La bokenge boti ango la boeno wa löwa, ango ko tengai ndoanekesa wao, eoka tala ya Mungu angɛnɛ litoangangela wao la Wana wa bɔkɔkɔ ale kwa päka ya wao.

²⁴ Tukela ya wenda belakɛndɛkɛndɛkɛ nda liangangi lia wao, la bekɔta ya wenda belayaka ina la bɛfɛkɔ yau;

²⁵ La biome ya wao bitialiakomoko la löwa, imɔ ko la ocho, eoka bocho bot’imɔ omao;

²⁶ limɔ belaeshaka tala la lilitesi lia tukela ya wenda nda wao.

²⁷ Nde yeka eyetitane, ango boto wa bɔwɛwɛ, kwa oyatosama nanga, angɔɔtɔkɔ omao, kangä ko ebasotome baina nda Lokasa loa Loiko loa Wana wa bɔkɔkɔ.