Liɛnɛsu 20 - Le Nouveau Testament in Kele (Lokele) 1958

Satana lokandomo ko mbile yumwa ya likama

¹ Limɔ imi lɔɛnɛ bokitomo ani atosulwa se nda Use, inde lounda lofungola loa liöndo eliti la tunga la bɔnyɔlɔlɔ wa likama nda osamba wande;

² la inde lotukumela Likilɔ liko njɔ ya kwalakwala, eko Bowanjeli la Satana, la inde lokanda inde ngwi ko miaka ɛlɛfu.

³ Limɔ bokitomo lokusha Satana tubu nda liöndo eliti la tunga, limɔ inde lolinjaka liao, inde losɔlɔnɛsɛ liao olikolo liande mbo atalimba imɔ tukela ya wenda kond’akasileke miaka ɛlɛfu. Mbisa yaamao loenganaka nde mbo afaikolomoko oko mbile sinyo.

⁴ Limɔ imi lɔɛnɛ kɛka bifi la ebayalaka se ina, bafomoko isosha shoataka njasɔ ya bato, imi lɔɛnɛ imɔ belimo ya ebatenomoko kingo eoka ya likambesi lia Yesu la eoka ya lioi lia Mungu la ebatiasemolaka Nyama, angoko bɔfɔnɔ wande, l’ebatiatomoko chapa yande nda toangala la nda besamba yau. Iyo ana louwaka liasi la iyo lofomo isosha shokakalesa tukela amamwito la Yesu ko la miaka ɛlɛfu.

⁵ Nde basi ebamɔi, ebawaka, iyo batiatauwaka konda akasileke miaka ɛlɛfu. Eli liende likuswi lia oso nda liwa.

⁶ Bende la limɛngɔ finɛ, bende batanu bako ebasoyala nda likuswi lia oso nda liwa. Liwa lia ambale liti l’isosha end’iyo, kongo ko belayalaka nde bakanga ba Mungu la ba Masiya la belafomoko isosha shokakalesa tukela amamwito lande ko miaka ɛlɛfu.

Satana lofaikolomo limɔ inde kokushomo nda eliya ya bösä

⁷ Limɔ akasileke miaka ɛlɛfu, Satana elafaikolomoko nda bɔnyɔlɔlɔ wande,

⁸ la elakuswaka ndokalimbaka tukela ya bato nda bako banɛi ba wenda, bako Goga la Magoga, ndokasɔnja iyo nda bonano; loketi loau lole kwa eloa nyɛlɛ yoke ya balia.

⁹ Iyo losɔngɔkɔmɔ nda bofalu wa wenda okalingela eyaelo ya bikuke ya ebatanu la bokenge ebosamomu. Limɔ bösä losekwa omolo nda use la wao losɛɛsɛlɛs’iyo fɛɛ.

¹⁰ Limɔ Satana oyalimbak’iyo lokushomo nda eliya ya bösä la boele, olo ayalaka la Nyama la Bɔtɔndɔli wa bolimbake, limɔ belokesomoko biale la lowa la ocho konda layalaya.

Liatakomu lia balomboki batotina

¹¹ Limɔ imi lɔɛnɛ kɛka efi efufu, la Inde oyayali se nda yao, la use la se lokwa otili oso wa bɔmbɔ wande la elela ya yao etiɛnɛlɛk’imɔ.

¹² La imi lɔɛnɛ ebawaka, l’ebafi l’ebakɛkɛ lisanga, bemakali oso wa kɛka efi, limɔ kasa yaliolomoko. La Lokasa loasi loliolomoko, loko Lokasa loa Loiko; la ebawaka baatakelomoko njasɔ ko nda yao ebiasɔnɔmɔkɔ nda kasa, eoka ya bekeeli yau.

¹³ La eliya ya balia lofetesa ebawelaka nda bao, la Liwa la Ewelo lokusokola ebawaka ebaingalaka nda yao limɔ baatakelomoko, boto la boto, eoka ya bekeeli yau.

¹⁴ Limɔ Liwa la Ewelo lokushomo nda eliya ya bösä, liao liende liwa lia ambale, liko eliya ya bösä;

¹⁵ la eyambo boto atiɛnɛlɛkɛ lina nda Lokasa loa Loiko, ani inde lokushomo nda eliya ya bösä.