Liɛnɛsu 12 - Le Nouveau Testament in Kele (Lokele) 1958

Esisho lɔɛnɛlɛ nda Use, eko Botomali la Likilɔ

¹ Limɔ esisho ya likama lɔɛnɛlɛ nda Use, botomali oyalingelomu la liso lia use, la tengai ose ya batindi bande, la iyoyo sha tolonge liu la tombale nda botö wande.

² Botomali loyala la liɛmɛ elisoya lisɔlɛ la inde loomaoma la toelo la bomusi woota.

³ Limɔ esisho yasi lɔɛnɛlɛ nda Use; tɛnɛ, likilɔ lifi litelu eliyali la betö osambale la baseke liu la beyoyo bosambale ya bɛkɔta nda betö yande.

⁴ La bokali wande lɔɔmbɔlɔ botüku wa isatɔ wa tolonge twa use la wao lokusha twao se nda nyɛlɛ. Limɔ likilɔ loemala oso wa botomali oyayali oko tina loota, mbo, akaotek’inde, limɔ inde komɛlɛ wana wande.

⁵ Limɔ botomali loota wana otolome oyakakakaleseke tukela bitoti ko la isosola sha yeto. La wana wande lɔɔnɔkɔlɔmɔ okakɛsɔmɔ ko ende Mungu olo nda kɛka efi yande.

⁶ Limɔ botomali lokwa otili nda liɔmbɛlɛ olo ayali elela eyesotonjelomo inde ko la Mungu mbo bakukiek’inde omao bacho ɛlɛfu ɛmɔi la mia imbale la kama liambɛ.

Mikaele la bakitomo bande lonanaka la Likilɔ

⁷ Limɔ bonano wayalaka nda Use, Mikaele la bakitomo bande lonanaka la Likilɔ; la Likilɔ la eyande bakitomo lonanaka,

⁸ nde batialongaka la batiafomoko imɔ elela nda Use.

⁹ Limɔ Likilɔ lifi, eko njɔ ya kwalakwala oyasotomo lina liko Bowanjeli la Satana, oyatolimbaka wenda bototi, inde lokushakomo ko nda nyɛlɛ amamwito la bakitomo bande.

¹⁰ Limɔ imi loka limiki lifi nda Use, eliaongaka mbo— Kwani bisoya to liuwesi la bofoka la yakakaelo ya Mungu wasu la isosha sha Masiya wande eoka Bowanjeli wa bitungani yasu asokushomo se, ako inde oyasowanjekel’iyo oso wa Mungu wasu ko la löwa la ocho.

¹¹ Basolongel’inde ko l’eoka ya bakila ba Wana wa bɔkɔkɔ la eoka ya lioi lia likambesi liau, la losamɔ loau losamaka liwawi liau angɛnɛ lotiakufesak’iyo ndowa.

¹² Eokao, omakalaka, Buse la ino ebasoyala nda wao! Aeko wale end’ino ba wenda la balia, eoka Bowanjeli asosulwel’ino se la efango ya likama, eoka aluwi nde mbo akoyali la fofe ko la mbile sinyo kongo!

Likilɔ loengaka botomali la bana bande

¹³ Limɔ ɛnɛkɛ Likilɔ mbo asokushomo nda nyɛlɛ, inde lokakongola otomali oyaoti wana otolome.

¹⁴ Nde botomali lofomo bafafu bambale ba elongo efi mbo akweke botili nda liɔmbɛlɛ, ko nda elela yande olo atokukiomo inde ko mbile bisatɔ la botüku wa mbile, ndosɛnyana la njɔ omao.

¹⁵ Limɔ Likilɔ lowɛlɛkɛ botomali balia kwa liande angɛnɛ nda bɔnɔkɔ wande, ombisa ya botomali, mbo balia balindesek’inde kwa fela.

¹⁶ Kongo ko nyɛlɛ losunga botomali la nyɛlɛ loasola bɔnɔkɔ wande, la inde lomɛlɛkɛ balia ebawɛlɛkɛ Likilɔ nda ewande bɔnɔkɔ.

¹⁷ Limɔ Likilɔ losomela botomali, inde losekwa omao okananaka la bana ebamɔi bande bita, bako ebatolitekesa bikela ya Mungu l’ebatokɔkɔmɛlɛ likambesi lia Yesu.

¹⁸ Limɔ inde loemala nda boke wa balia.