Liɛnɛsu 11 - Le Nouveau Testament in Kele (Lokele) 1958

Lokweelomo loa Ndakɔ ya Mungu

¹ Limɔ yafomoko ifende eshaaka kwa ikweelo, la imi loongomo mbo— Emalaka la kweelaka Ndakɔ ya Mungu la etumbelo ya lifaefi la loketi loa bato ebatosemola Mungu omao,

² la machaka balɛlɛ lousa loa Ndakɔ ya Mungu, okweelëke bao, eoka basofaefomo bato ba tukela ya wenda la batomatekela bokenge botanu ko tengai kama inɛi la imbale.

³ La yefaefaka banangoli bami bambale isosha shonangola la betɔndɔkɔlɔkɔ ko bacho ɛlɛfu ɛmɔi la mia imbale la kama liambɛ, ani batowataka ko bakunia.

⁴ Eba bende tosandu tombale twa tuma twa baita la bitalielo ya päka bimbale eyemesani oso wa Ngɛnɛ wa wenda,

⁵ la boto ɛlɛmbɛ ndobebesa iyo, ani bösä botokuswaka nda bɛnɔkɔ yau la botofecha biyani lau; boto ɛlɛmbɛ ndobebesa iyo, aondu nde ndoolomo ko ongoma.

⁶ Eba bende l’isosha sholinjaka use mbo mbula etatɔnɔ ko la bacho ebatotɔndɔkɔl’iyo; bende l’isosha shokindola balia ko bakila la ndoomaka wenda la baömä batoti ko mbile la mbile, kwa akalɛmbɛk’iyo.

⁷ Limɔ akasileke iyo linangoli liau, nyama eyetokuswa nda liondo eliti la tunga atonana lau bita la atolongel’iyo, la atoolak’iyo;

⁸ limɔ belyo yau beyalaka nde nda lɔmbɔ loa bokenge bofi ebosotangomo nda inango sha njasɔ ya bolimo mbo Sodomo la Ejipeto, olo olomoko imɔ ko Ngɛnɛ wau nda lieka.

⁹ Bato ba biese wike la tukela wike la eba baoi wike la eba wenda bototi, betichaka belyo yau bacho basatɔ la botüku, la batofeka mbo belyo ina betaombomo nda kito;

¹⁰ la ebatoyalaka nda wenda belaomalaka loasɔ loau, belainaka bisha la belafaekefana bafi, ko l’eoka mbo e-batɔndɔli-ba bambale bokesaka bato ebayali nda wenda ko wale finɛ.

¹¹ Limɔ mbisa ya bacho basatɔ la botüku, luli loa liwawi, eloa Mungu angɛnɛ, loao lɔɔtɛl’iyo la iyo loemala nda batindi bau, la bɔwa wa likama lokwelo ebɛnɛk’iyo.

¹² Limɔ iyo ana loka limiki lifi nda use elitoonga lau mbo— Lilaka ono likolo! La iyo lolila likolo nda litumba la biyani lau lɔɛnɛk’iyo.

¹³ Limɔ ko la mbile-ao nyɛlɛ lotukatuka finɛ la botüku wa liu wa bokenge lowɛlɛmɛ se; bato bilɛfu bosambale lowa nda lotukatuko loa nyɛlɛ la bato ebatikelaka lokwelo bɔwa la iyo loinela Mungu wa Use.

¹⁴ Aeko, liömä lia ambale lisoeta! Toka kɔni, liömä lia asatɔ litoya la mangu!

¹⁵ Limɔ bokitomo wa osambale looma ifonge, limɔ bamiki bafi lokomoko nda use, ebaongaka mbo— Likakalesi lia wenda-bo lisoyela elia Ngɛnɛ wasu la elia Masiya wande, la Inde ekakalesaka wao ko layalaya.

¹⁶ Limɔ biange kama imbale la inɛi ebayalaka se oso wa Mungu nda kɛka yau, iyo loswaka biɔmbɔ yau se, iyo losemokola Mungu, iyo loonga mbo—

¹⁷ E Mungu Ngɛnɛ wa Bofoka bototina, Oyayali la Oyayalaka, tosofaef’Aɛ kelekele eoka osoaela bofoka waɛ bofi la osoakola ndokakalesa wenda.

¹⁸ Eba tukela ya wenda basomaka, nde eyaɛ efango loya, la mbile yoataka njasɔ y’ebasowa esoiyela, la mbile yokaela bɛkɔwa yaɛ bondanda wau, bako bɛtɔndɔli l’ebatanu, l’ebasolitesa lina liaɛ, l’ebakɛkɛ, l’ebafi lisanga, la mbile yosɛɛsɛlɛsɛ ebatosɛɛsɛlɛsɛ wenda-bo.

¹⁹ Limɔ Ndakɔ ya Mungu eyele nda Use loliolomo la kwokwolo ya Ngɛla yande lɔɛnɛlɛ nda Ndakɔ yande; limɔ tobalibali la bamiki ba bilundi lɔɛnɛlɛ la nyɛlɛ lotukatuka la mbula ya basasɛ bafi lotɔnɔ.