Filemona 1 - Le Nouveau Testament in Kele (Lokele) 1958

¹ Imi Paulo, boto wa Masiya Yesu oyakandomu bɔnyɔlɔlɔ, la etungani yasu ako Timoteo,

² tosotoma lokasa-lo ende Filemona bokuwani lasu wa losamɔ, la ende welo wasu w’Etanda ako Apia, la ende Alikipo bosilikani lasu nda bita-bi, la ende eb’Etanda ebatosɔngɔkɔmɔ nda ndakɔ yaɛ, Filemona.

³ Booto end’ino la lilatemi lia Mungu Sango wasu la elia Ngɛnɛ wasu ako Yesu Masiya!

Kelekele la lisomboli lia Paulo eoka ya Filemona

⁴ Itofaekefa Mungu kelekele mbile bitotina ani itosingwaka baina banu nda basomboli bami,

⁵ eoka isokaka loasɔ loa losamɔ la lilendelu elile laɛ ende Ngɛnɛ Yesu la ende ebüchomu batotina bande;

⁶ la isosombola mbo lisanganesi lia lüendelu liaɛ liɛnɛsɔmɔkɔ nda liluwani lia bitotina bilau yanu ebile ya Masiya.

⁷ Eoka yende la limɛngɔ la botema bosoaa se eoka ya losamɔ loaɛ, mbo betema ya eba Masiya bisoyaimwaka ko eoka yaɛ, etungani.

Loasɔ loa Onesimo oyayalaka bɔkɔwa wa Filemona

⁸ Eokao, ango yetendela finɛ ndotel’aɛ ekela nda lina lia Masiya mbo oondu nde ndokela kwa atoonga’mi,

⁹ kongo ko isɔlɛmbɛ ndolɔmbɔkɔl’aɛ eoka ya losamɔ; Imi Paulo, wange finɛ la imɔ boto wa Masiya Yesu oyale kwani nda bɔnyɔlɔlɔ ko l’eoka yande,

¹⁰ ikolɔmbɔkɔl’aɛ loasɔ loa ewami wana ako Onesimo oyasoota’mi oot’inde onomono nda bɔnyɔlɔlɔ.

¹¹ Oso Onesimo atiaaka bosungi waɛ, nde kwani ale bosungi bolau waɛ, la ewami lisanga.

¹² Isoinol’inde end’aɛ kwa mbo isotomel’aɛ botema wami angɛnɛ.

¹³ Ko’mi angɛnɛ, ani isosanga ndotikala lande ono eyami, mbo akuweleke’mi loasɔ loaɛ angɛnɛ, ono ayali’mi nda bɔnyɔlɔlɔ eoka ya Mboli Ilau;

¹⁴ nde itilɛmbɛkɛ ndokela loasɔ angolɔmɔi sakolo ngo ko ani aɛ nd’aluwi oso, mbo booto waɛ botatinjakomo, kangä ko l’eoka ya lisangi liaɛ angɛnɛ.

¹⁵ Eluwa ko la litina-li asɛnyanɛsɔmɔkɔ laɛ ko mbile sinyo, mbo oyaleke lande layalaya,

¹⁶ nde inga imɔ kwa bɔkɔwa, kangä ndolongela bɔkɔwa, kwa etungani oyasamomu lami finɛ, nde simbi to laɛ, loasɔ loasu balomboki la eoka ya Ngɛnɛ wasu.

¹⁷ Eokao, botanga’mi mbo lisaɔ liaɛ, aɛ koael’inde kwa mbo waeli nde’mi angɛnɛ.

¹⁸ Eyambo akeelak’aɛ loasɔ lobe, la eyala la bolima waɛ, taka to wao nda lokasa loami;

¹⁹ Imi Paulo nd’asosɔnɔ la bosamba wami angɛnɛ mbo— Imi itokamba. Itaonga laɛ mbo wende imɔ la bolima woeta ende’mi, boko liwawi liaɛ angɛnɛ.

²⁰ Eingo, etungani, yɔlɛkɛ sumbu bondanda end’aɛ nda likuwa lia Ngɛnɛ wasu; yaimwesaka botema wami eoka ya Masiya.

²¹ Isosɔnɛl’aɛ ongoma eoka isolendelo lilitesi liaɛ la eoka isoluwa mbo otokela ambo loasɔ lolongela elosoonga’mi.

²² Tonjelak’imɔ imi ndakɔ yoingala, eoka iɛli shami sile mbo yeinolomoko end’ino ko l’eoka ya basomboli banu.

Baseeli ba baina ba Paulo ende Filemona

²³ Epafula oyale amamwito lami nda bɔnyɔlɔlɔ eoka ya Masiya Yesu, asoseel’aɛ,

²⁴ la Malako la Alisitaluka la Dema la Luka basungani lami nda likuwa.

²⁵ Booto wa Ngɛnɛ Yesu Masiya boyaleke la belimo yanu.