Baloma 9 - Le Nouveau Testament in Kele (Lokele) 1958

Ikɛnɛnɛ sha Paulo eoka ya ebande bako BaIsalaele

¹ Nda lina lia Masiya isoonga wewe, itite lolanga, mbo eluwanelo yami ya olau la obe etokulia lioi liami ko la Bolimo Botanu liko mbo—

² Ile la ikɛnɛnɛ sifi la bomusi ebotimacheke botema wami.

³ Isikiosombola mbo imi isendomoko bieo yosenyanesomo shei la Masiya loasɔ loa bitungani yami ya tukela yasu;

⁴ bende BaIsalaele, basotangomo bana ba Mungu; tala ya eyaelo ya Mungu la ngɛla yande la likomyi lia Bikela yande la lisemoli liande la basakä bande, bitotina bisoomana lau;

⁵ bangau bende ebau, la Masiya ende wa tukela yau nda loasɔ loa bindo, oyatalemi likolo lia yaatotina ako Mungu, ainelomoko ko nda layalaya, ongoma.

⁶ Loti to mbo Lioi lia Mungu end’iyo lisowa liwela, eoka batotina ba tukela ya Isalaele batiomane wewe la Isalaele,

⁷ batotina bati bana ba Abalayama ko l’eoka ya lioti liande, kangä mbo— Ko la Isaka kongo lioti litotangomo eliaɛ.

⁸ Litina mbo bati to bana ba lioti lia bindo ebatangomu bana ba Mungu, kangä bana ba lisakä batangomu lioti liande.

⁹ Baoi ba lisakä-li bende mbo— Nda mbile-ye la mwaka wa mbisa, yeyaka nde, la Sala eotaka wana otolome.

¹⁰ Inga to loasɔ lona kongo, kangä imɔ ko Lebeka oyayalaka la lieme ko la sango wasu ako Isaka,

¹¹ eoka ani bana bakaotomu kɔni, l’ani batitakelaka loasɔ ango lolau angoko lobe, mbo likomyi lia Mungu lioaa bana likɔchomoko,

¹² inga eoka yolitesa bikela, kangä eoka yota oto lioi. Lebeka lokambesomo mbo— Boloo atokuwela etungani;

¹³ kwa loatomoko nda Lokasa ongoma mbo— Yasamaka nde Yakobo, nde itiluweke Esau.

Lofekelomo loa Isalaele loti loasɔ loa Mungu

¹⁴ ¿Toongeke to moni, mbo— Angwɛnɛ to liengani ende Mungu? Mbayo, ango sinyo!

¹⁵ Mungu loonga la Mɔsɛ mbo— Itowɛlɛ booto ende boto kwa alɛmbi nde’mi, la itowela boto shota kwa alɛmbi nde’mi.

¹⁶ Eokao to loti loasɔ loa lisangi angoko loa lifumbi lia boto, kangä loa booto wa Mungu.

¹⁷ Lokasa loa Mungu loonga la Bɔkɔta Falao mbo— Isoemes’aɛ la tala, ko la litina-li, liko mbo yɛnɛsɛkɛ bato bofoka wami la mbo lina liami liluwesomoko nda yese bitotina.

¹⁸ Ongoma to mbo— Mungu atowɛlɛ booto ende boto kwa alɛmbi nd’Inde la atosɛlɛ boto la lotale oyakalɛmbɛk’Inde.

¹⁹ Ango bofela’mi mbo— ¿Monito Mungu atofaka kɔni bato liɛngɔ? Ndai to kofekel’Inde lisangi liande?

²⁰ ¿Aɛ bolomboki wende to ndai oyatofenyana la Mungu tofenya? ¿Yeka eyekokelemu koonga la oyakokel’mde mbo— Okokeli’mi anyo moni?

²¹ ¿Bokuki-tei ati l’isosha shokela la ibɔ simwitɔ sha ilɔngɔ ango tei ya bɔfɛkɔ, ango ko tei ya bɔkɛcha?

²² ¿Mungu ɛlɛmbɛ to ndwɛnɛsɛ bato efango yande loasɔ loa bobe la ndoluwesa bato bofoka wande bofi, la eombakela la bofiili bofi ko tei ina ebikukiomu la bɔkɛcha ndosɛɛsɛlɛsɔmɔ la efango,

²³ ko la litina mbo aluweseke bondanda wa tala yande ebotowɛlɛk’Inde nda tei ya booto ebisotakomia Inde eoka ya bɔfɛkɔ,

²⁴ bako iso angɛnɛ ebatomoko lioi, inga BaYuda kongo kangä imɔ eba yese yasi?

²⁵ Kwa aongak’Inde nda Lokasa loa Hosea mbo— Ebatiaaka bato bami, imi yetak’iyo mbo bato bami; La oyatiasamomoko, yetak’inde mbo bosamomu.

²⁶ Limɔ nda elela olo aongomoko mbo— Ino oti bato bami, Ko omao betangomoko nde mbo Bana ba Mungu wa loiko.

²⁷ Yesaya lota boekï loasɔ loa BaIsalaele mbo— Ango loketi loa bana ba Isalaele loyala wike kwa eloa nyɛlɛ yoke nda balia, ko bosandelo se wau kongo bouwesomoko;

²⁸ eoka Mungu atokɔchaka lioi liande chaa la atotenaka likomyi liande shɔɔ nda wenda.

²⁹ Kwa atɔndɔlɔkɔ̈ imɔ Yesaya mbo— Aenaka mbo Mungu wa bikuke amachelak’iso koto ya bosandelose, Ani tosokinjwaka kwa Sodoma, ani tosokelomo bɔfɔɔnɔ wa Gomola.

³⁰ ¿Toongeke to moni? Mbo bato ba wenda ebatiaengaka liengani, iyo basoosha liengani, liko liengani elisoya ko l’eoka ya lilendelu;

³¹ kongo ko BaIsalaele ebaengaka liengani lia lilitesi lia Bikela, iyo batiosheke liao.

³² ¿Basoomelo la moni? Eoka baengaka liao, inga ko la lilendelu, kangä ko la bekeeli ya Bikela; basokwa ilango nda litalɛ lia likulya, kwa loatomoko nda Lokasa mbo— Tɛnɛngo! Nda Siona isota litalɛ liokwesa bato likulya, Ango lituka liokwes’iso ilango; Kongo ko oyatolendelo Inde aitookesomo sɔni.