Baloma 8 - Le Nouveau Testament in Kele (Lokele) 1958

Eba Masiya batifomo se, nde basofomo Bolimo wande

¹ Eokao ebasowatemaka la Yesu Masiya baitofomo imɔ se,

² eoka bikela ya Bolimo wa Loiko ebole la Masiya Yesu bisofaikola’mi nda bikela ya bobe la liwa.

³ Loasɔ elotikɔkɔlɛ to Bikela ndokela, eoka yende la bɔlɛmbu wa bindo, Mungu angɛnɛ nd’akelaka loko ndotoma Wana wande nda bindo ya bɔfɔnɔ wa bato babe ko ndowa eoka ya bobe la ndofaka bobe wa bindo se;

⁴ mbo bakakanelo ba Bikela bakɔchɔmɔkɔ lasu ebatikɛndɛsɔmɔkɔ la yɛmɛ ya bindo, kangä ko la Bolimo.

⁵ Ebatolitesa yɛmɛ ya bindo, batoenyakela ko njasɔ ya bindo, ebatolitesa eya bolimo, batoenyakela ko eya bolimo.

⁶ Eoka ndoenyakela ko bindo, ende ko liwa; nde ndoenyakela bolimo, ende loiko la lilatemi.

⁷ Baenyakeli ba bindo basoiyana la Mungu, baitolitekesa Bikela ya Mungu, eoka batikɔkɔlɛ okela ongoma;

⁸ ebatoyalaka ko bindo batikɔkɔlɛ ndoomalesa Mungu.

⁹ Kongo ko ino ba Masiya ot’imɔ wokakalesomo la yɛmɛ ya bindo, kangä eya Bolimo, eya to mbo Bolimo wa Mungu boyalaka end’ino. Oyati la Bolimo wa Masiya, ambo ati wande.

¹⁰ Nde eya to mbo Masiya eyala atiteni yanu, bindo ewa ndowa eoka ya bobe, kongo ko belimo yanu bitoyala la liwawi ko l’eoka ya liengani.

¹¹ Eya to mbo Bolimo oyatɛmɔlɔkɔ Yesu nda liwa eyalaka atiteni yanu, ambo Oyatɛmɔlɔkɔ Masiya Yesu nda liwa, efaefaka bindo yanu liwawi liasi ko la Bolimo oyatoyalaka atiteni yanu.

Tole bana ba Mungu

¹² Eokao, Bitungani yami, lole loasu mbo toyaleke kwa alɛmbi Bolimo inga kwa alɛmbi ko bindo;

¹³ eoka eya mbo boyalaka kwa alɛmbi bindo yanu limɔ bowaka nde; kongo ko eya mbo bosingesa yɛmɛ ya bindo ko la Bolimo ambo boyalaka la loiko.

¹⁴ Eoka batotina ebasotolomo oso ko la Bolimo wa Mungu, bende bana ba Mungu;

¹⁵ eoka otifomo bolimo wa bɛkɔwa mbo winweke liasi nda bɔwa, kangä bolimo wa bana angɛnɛ (ebayalaka bɛkɔwa oso) la ko la bolimo tosoamama mbo— Abba, Sango wasu!

¹⁶ Bolimo angɛnɛ asotaka boekï amamwito la ewasu bolimo mbo tole bana ba Mungu;

¹⁷ toyala bana, ambo iso kosangola botiko wa Mungu Sango amamwito la Boloo wasu ako Masiya, eya tɔɔlɔ likaɔ lia bemusi yande mbo tɔɔlɛkɛ imɔ likaɔ lia linɛngina lia tala yande.

Liuwesi liyaka nde mbisa ya bemusi

¹⁸ Isoenyela mbo bemusi ya mbile-ye bitiengane ango sinyo la tala ebilɛnɛsɔmɔkɔ end’iso mbisa.

¹⁹ Yeka bitotina ebikelomu la Mungu, bisoumbakelaka la baiso nda mboka wɛnɛ lɔɛnɛsɔ loa bana ba Mungu;

²⁰ yeka ina bitotina yayalaka ko liyaëlä kongo, inga la yɛmɛ ya yao angɛnɛ, kangä la lisangi lia Inde oyakanjaka yao la iyɛli sha Bouwesi,

²¹ mbo bitotina eyakelomoko bitosɔmbɔlɔmɔ nda ekanjelo ya lɔfɔndɔ ndoyalaka toote twa Mungu etwa bɔfɛkɔ wa tala yande.

²² Toluwi nde mbo bitotina ebiyali ono se bitosumasuma nda toelo twa mbota ko nda mbile-ye;

²³ inga yao kongo, kangä imɔ ko iso lisanga ebasofomo eula ya oso ya Bolimo, tososumasuma nda betema ani tosowɛlɛkɛ baiso mbo tosɛlɔmɔkɔ bana ba Mungu ko la liendolomu lia bindo yasu.

²⁴ Eoka tosouwesomo ko la iyɛli; nde iyɛli esisɔɛnɛ yao eyetoumbakel’iso, sit’imɔ iyɛli; ndai kokɛsɛlɛ iyɛli sha yao eyɛn’inde?

²⁵ Kongo ko toumbakela la iyɛli yeka eyetiɛnɛlɛ, iso kowɛlɛ yao baiso la likɔkɔmɛlɛ elitiwe esole.

Mungu atosungak’iso la Bolimo la Wana wande

²⁶ Ongoma Bolimo botokɔkɔmɛs’iso la lisungi liande nda bɔlɛmbu ebole lasu; eoka totiluwe ndosombola la wɛlï, nde Bolimo angɛnɛ atosombokoel’iso la besumo ebitiokane baoi.

²⁷ Nde Oyatolukaka ebiisami nda betema, aluwi nde baenyeli ba Bolimo eoka atosomboela ebüchomoko la Mungu ko la lisangi lia Mungu.

²⁸ Toluwi nde mbo nda njasɔ bitotina Mungu nd’atokɔkɔmɛsɛ bolau ende batotina ebasami nd’Inde, bako ebasotomo lioi lande la lisangi liande;

²⁹ eoka Mungu aluwaka nde ebasɛlɛk’Inde mbo bafaefomoko bofɔɔnɔ ebole la Wana wande mbo Inde ako Wana ayaleke ko wana wa oso wa bitungani wike.

³⁰ Limɔ, ebasangak’Inde oso, Inde lotak’iyo lioi, limɔ ebatomoko lioi, Inde loenganes’iyo, la ebenganesomoko lande, iyo lotaliomoko lande tala.

³¹ ¿Totoonga to moni eoka ya njasɔ-bi? ¿Mungu eyalaka lasu, ndai to kofekel’iso?

³² Inde kongo oyatifekel’iso Wana wande angɛnɛ, nde Oyamach’Inde ndoyawel’iso yaatotina, ¿aitofaef’iso imɔ ko bitotina bofäfä?

³³ ¿Ndai atowanjela ebaaomu la Mungu? Ende Mungu oyasotang’iyo mbo bengani;

³⁴ ¿Ndai kof’iyo se? Ende Masiya Yesu oyawaka, eingo oyatɛmwaka imɔ, oyale nda fangi ya olome ya Mungu la oyatoongel’iso.

³⁵ ¿Ndai atosenyanes’iso shei la losamɔ loa Masiya? ¿Mbo bomusi, kwa tale, kwa likongolomu, kwa londo, kwa boeno wa bisinda, kwa bifembi, kwa bita?

³⁶ Loatomoko nda Lokasa ongoma mbo— Tosoolomo ko la nɔngɔ buse tu ko loasɔ loaɛ, tosotangomo mbo bɛkɔkɔ yoolomo.

³⁷ Kongo ko nda bitotina-bi tosolonga ndolonga fɛɛ ko la bofoka wa Inde Oyasami nd’iso.

³⁸ Iluwi to ndoluwa mbo loti la loasɔ, ango liwa, ango liwawi, ango bakitomo, ango eba tososha, ango eya mbile-ye, ango ebikayeke, ango befoka,

³⁹ ango botalemu wa use, ango bolundu wa balia, ango yeka ya kanda yasi, angwɛnɛ eyetokɔkɔlɔ ndosenyanes’iso shei la losamɔ loa Mungu elosoomana tɔɔ la Masiya Yesu Ngɛnɛ wasu.