Baloma 7 - Le Nouveau Testament in Kele (Lokele) 1958

Ikweelo sha Lisɔngɔni

¹ Bitungani yami, isofel’ino ebaluwi nde Bikela, mbo— ¿Oisoluwa mbo ekela etokanjaka boto ko nda mbile eyekoyali inde la liwawi?

² Eoka otomali oyale wali wa boto, akoyali botolome la liwawi, liti lisokufes’inde ndosɛnyana la olome. Nde bolome ewa, limɔ botomali asosɔmbɔlɔmɔ nda liti lia botolome.

³ Ongoma to, ani olome akoyali, wali ɛsɔngɔnɔ la botolome wasi, inde kotangomo ewa nyongo; nde olome ewa, wali asosɔmbɔlɔmɔ nda liti, limɔ ɛsɔngɔnɔ la botolome wasi, at’imɔ ewa nyongo.

⁴ Bitungani yami, ko ongoma end’ino, osokwela se nda Bikela ani osowatema la liwa lia bindo ya Masiya, mbo oomaneke la Wasi oyasosokwa nda liwa mbo tooteleke Mungu lioti lia eula.

⁵ Ayalak’iso ko la boyaeli wa bindo kongo, yɛmɛ ya bindo eyaluwak’iso ko l’eoka ya Bikela, yao lofumbekes’iso nda bilengo yasu ko ndoota lioti elikatungeke ko la liwa;

⁶ nde kwani tososɔmbɔlɔmɔ liti eliakandak’iso eoka tosowela liao mbo totayala imɔ bɛkɔwa ya bikela ya oso eyasɔnɔmɔkɔ, kangä bɛkɔwa ya Bolimo boyai.

¿Mbo Bikela yende Bibe?

⁷ ¿Toongeke to moni, mbo— Bikela yende ko bibe? Ango sinyo! Aenaka Bikela, ani itiluweke litina lia batwanelo. Aenaka Bikela mbo— Ololëke, ani itiluweke mbo bolole bole bobe.

⁸ Nde bobe bosoɛnɛ fofe ko la liti, limɔ bosofɔɔlɔ’mi ndolola la yɛmɛ finɛ. Aenaka to liti, ani bobe bot’imo.

⁹ Imi nd’ayalaka oso shɛi la Bikela, nde ayaka Bikela limɔ Bobe lowawa la imi lowa;

¹⁰ la liti lioluwesa mboka ya loiko, imi lɔɛnɛ ko liao mbo mboka ya liwa kongo.

¹¹ Nde bobe bosɔɛnɛ fofe ko la liti yolimbaka’mi, limɔ liti lisoola’mi ko ndofa’mi se.

¹² Ongoma to Bikela bisüchomo ende Mungu, la liti lisüchomo imɔ, lile la liengani la bolau.

¹³ ¿Loende to loasɔ lolau elotoeshela’mi liwa? Mbayo, ango sinyo! Kangä bobe angɛnɛ ko la mboka ya bolau bosoeshela’mi liwa mbo bobe wɛnɛlɛ wewe ko mbo bobe la mbo wao bolembeelomoko mbo bobe woeta ko la liti.

¹⁴ Toluwi nde mbo Bikela bile ngo ko ya Bolimo, nde imi angɛnɛ yende ko boto wa bindo, la isotambesomo kwa bɔkɔwa wa Bobe oyatokakalesa’mi.

¹⁵ Itiluwe to litina lia bekeeli yami, eoka iitokelaka yao ebitosanga’mi okela; nde isokela ko yao ebisokaka’mi efu.

¹⁶ Yekela to yao ebitisange’mi okela, ambo isoaola mbo liti lile lilau finɛ.

¹⁷ Kwani ati to imi angɛnɛ oyatokela bobe, kangä Bobe eboingali atiteni yami.

¹⁸ Eokao, iluwi nde mbo nda bindo yami, biko lokomba angɛnɛ, angwɛnɛ bolau boyali nd’ina, eoka yende la lisangi liosanga bolau, nde iti ango la bofoka wokelaka wao.

¹⁹ Eoka itikele bolau ebososanga’mi okela, kangä bobe ebotisange’m wao angɛnɛ imi nd’asokelaka.

²⁰ Eya to mbo imi yekela wao ebotisange’mi, ambo ati to’mi oyakeli, kangä Bobe oyaingali lami.

²¹ Isoosha to litina lia boyaeli-bo, mbo ani asosanga’mi okela bolau, limɔ bobe botoyalakana lami tina.

²² Isoomalaka to nda botema wami loasɔ loa Bikela ya Mungu,

²³ kongo ko isɔɛnɛ bikela yasi nda bilengo yami bitonanaka la botema wami la ebitoundesa’mi kakau nda bikela ya Bobe, ebile nda bilengo yami.

²⁴ Imi yende bolomboki nda tale finɛ! ¿Ndai to atɔɔnokɔlɔ’mi nda bindo-bi ebisoundomo la liwa?

²⁵ Kelekëlë ende Mungu, ko la Yesu Masiya Ngɛnɛ wasu! Imi angɛnɛ to nda botema yende bɔkɔwa wa Bikela ya Mungu, nde bindo bile bɔkɔwa wa bikela ya Bobe.