Baloma 6 - Le Nouveau Testament in Kele (Lokele) 1958

Liwa lia Masiya litoesha liwa lia Bobe

¹ ¿Toongeke to moni, mbo— Totikakaleke nda batwanelo basu mbo booto bulwesomoko?

² Mbayo, ango sinyo! Iso tosowanjwa nda batwanelo kwa ebasowela bao; ¿Totoyalaka to nda bao la moni?

³ ¿Otiluweke mbo iso yaatotina ebasolufiomo ende Masiya Yesu, tosolufiomo imɔ nda liwa liande?

⁴ Ongoma to tosoombomo amamwito lande nda kito ko la lilufi, mbo, kwa atɛmwɛsɔmɔkɔ Masiya nda liwa ko l’eoka ya tala ya Sango wande, ko ongoma iso imɔ kotutaka boyaeli boyai wa loiko.

⁵ Ango iso tosowatemaka lande la liwa kwa eliande angɛnɛ, ongoma iso kowatemaka lande nda litɛmwi liande.

⁶ Tosoluwa mbo boyaeli wasu wa oso bosoolomo amamwito lande nda lieka mbo bindo ya batwanelo bisɛɛsɛlɛsɔmɔkɔ mbo totayala imɔ bɛkɔwa ya bobe.

⁷ Oyasowa at’imɔ la loasɔ lokuwela bobe ewakakalesak’inde.

⁸ Ango tosowa amamwito la Masiya, ambo tosoimela mbo totoyalana lande nda loiko;

⁹ eoka tosoluwa mbo Masiya oyatɛmwɛsɔmɔkɔ nda liwa, atiawek’imɔ liasi, liwa litiakakalesek’Inde imɔ liasi.

¹⁰ Eoka awaka nde ndowa loasɔ loa bobe, angowel’imɔ wao liasi, kongo ko loiko elosoyala lande lole oko l’eoka ya Mungu.

¹¹ Ino imɔ ko ongoma, luwaka mbo osowela bobe, kongo ko wende la loiko loasɔ loa Mungu ko la Masiya Yesu.

¹² Bobe bokakalesëke to bindo yanu ebitowa mbo otalitesa yɛmɛ ibe ya yao;

¹³ Ofaefëke bilengo yanu nda bobe ndoyalaka biɛla ya obe yonana la bolau, kongo ko faefaka betema yanu ende Mungu kwa ebasotɛmwa nda liwa la bilengo yanu biyaleke biengo yokelaka likuwa eliengani elia Mungu.

¹⁴ Eoka bobe boitokakales’ino imɔ liasi, eoka oti’mɔ bɛkɔwa ya Bikela, kangä eya Booto wa Mungu.

Ikweelo sha Bɔkɔwa

¹⁵ ¿Moni to, tokeleke bobe, ko l’eoka mbo tot’imɔ nda isosha sha Bikela, kangä esha booto? Mbayɔ, ango sinyo!

¹⁶ Otiluweke mbo bokulya ndoyalaka bɛkɔwa ya oto ndolites’inde, ambo wende bɔkɔwa wa boto oyatokakales’ino; angoko bɔkɔwa wa bobe, ndokawa; angoko bɔkɔwa wa lilitesi, ndokaenganaka?

¹⁷ Nde kelekëlë ende Mungu eoka mbo ino ewayalaka oso bɛkɔwa ya bobe, nde kwani osolitesa la betema betotina ko Liekesi elisüchomu ino;

¹⁸ la asosɔmbɔlɔmɔ ino nda eundelo ya bobe, osoya bɛkɔwa ya liengani kwani.

¹⁹ Isoonga la bɔfɔno-bo wa loasɔ loa bato, ko l’eoka mbo wende sumbu la bɔlɛmbu. Kwa afaefaka to ino bilengo yanu mbo biyaleke bɛkɔwa ya bɔlɛlɔ la litefoli, ko ongoma kwani faefaka bilengo yanu ndoyalaka bɛkɔwa ya liengani liotanesomo tanelele.

²⁰ Eoka ayalak’ino bɛkɔwa ya bobe, otiakakalesomoko la liengani.

²¹ ¿Nda mbile ena, waɔlɔkɔ̈ to boni bosombo wa njasɔ ina ebisok’ino ko sɔni kwani? Bina bitotungama ngo ko nda liwa.

²² Nde asosɔmbɔlɔmɔ ino kwani nda bobe, osoya bɛkɔwa ya Mungu otɔɔlɔkɔ bosombo boko lotanekeso loa bobe, lototungama ngo ko nda loiko loa layalaya.

²³ Eoka liɔli lia bɔkɔwa wa bobe ende ko liwa; kongo ko lifaefi lia booto wa Mungu lile loiko loa layalaya bu ko la Masiya Yesu Ngɛnɛ wasu.