Baloma 4 - Le Nouveau Testament in Kele (Lokele) 1958

Lilendelu lia Abalayama ngau wa BaYuda

¹ ¿Toongeke to moni loasɔ loa Abalayama, ngau wasu, mbo aɔlɔkɔ to iye?

² Eya to mbo Abalayama aenganesomokö eoka ya bekeeli yande, limɔ ale la litina liomala, nde inga to nda baiso ba Mungu.

³ ¿Lokasa loa Mungu lotoonga moni? Abalayama alendeloko ko Mungu, la lilendelu liande liatangomokö mbo liengani.

⁴ Likambi lia boto oyakeli likuwa lititangomo to mbo lifaefi kangä mbo likambi lia bolima;

⁵ kongo ko boto oyatikele likuwa, nde asolendelo Inde oyatoenganesa ebatilitese Mungu, ambo lilendelu liande lisotangomo mbo liengani.

⁶ Ongoma to Dawidi imɔ asɔsɔnɔ loasɔ loa lɔkɛmɔ loa oto oyatangomu la liengani ko la Mungu oyatitange bekeeli yande;

⁷ Lɔkɛmɔ lole end’inde oyasomɛsɛlɔmɔ batefoli bande, la oyasofanjakomo batwanelo bande.

⁸ Lɔkɛmɔ lole end’inde ani Ngɛnɛ Mungu atitang’imɔ batwanelo bande.

⁹ ¿Lɔkɛmɔ-lo losofomo ko ende oyasotena itombe kwa ende ewa losunga imɔ? Eoka tosoonga mbo— Lilendelu lia Abalayama lisotangelomo inde mbo liengani.

¹⁰ ¿Lisotangomo mbo liengani la moni? ¿Ani atenomoko itombe kwa nda mbile ya losunga? Inga nda mbile ya itombe, kangä nda losunga.

¹¹ Limɔ inde lofomo itombe kwa ndembe ndokɔkɔmɛsɛ liengani lia liimeli liande ani akatenomu itumbe mbo ayaleke Sango wa batotina ba lilendelu ani batitenomo itombe nde lisotangelomo iyo mbo liengani,

¹² la ale imɔ Sango wa ebatotenomo totombe inga ko l’eoka ya itombe kongo, kangä ebatotutaka imɔ boyaeli wa lilendelu lia sango wasu ako Abalayama ani akatenomu.

¹³ Eoka lisakä eliatikomoko ende Abalayama la ende lioti liande, liko mbo elayalaka bosangoli wa tukela bitotina ya wenda, litiatikomoko ko l’eoka ya Bikela, kangä l’eoka ya liengani elisoya ko la lilendelu.

¹⁴ Eyambo bende eba lilitesi lia Bikela ebatosangola wenda, ani lilendelu lile to wawa la lisakä lile liyaëlä.

¹⁵ Eoka Bikela nd’atoesha efango ende ebatotefokola yao; nde angwɛnɛ bikela, ambo angwɛnɛ litefoli lia yao.

¹⁶ Eokao lisakä liatikomokö ko la lilendelu mbo likɔkɔmɛkɛ ko la booto wa Mungu kɔkɛ ende bana batotina ba Abalayama, inga ko ende ebatolitesa Bikela kongo, kangä imɔ end’iyo ebale la lilendelu kwa elia Abalayama (ale sango wasu batotina,

¹⁷ kwa loatomoko mbo— Isosɛlɛ aɛ ndoyala sango wa tukela wike). Nda baiso ba Mungu ale sango wasu, alendelokö ko Mungu oyafaka loiko ende ebawi la oyatota ndola mbo ebitiyale bikinjweke yao ebile la liwawi.

¹⁸ Ongoma Abalayama lokɛsɛle iyɛli ani angwɛnɛ imɔ iyɛli sha lioti, la inde lolendelo mbo eyalaka nde sango wa tukela wike, kwa aluwesomoko inde mbo— Lioti liaɛ liyalaka nde ko, ongoma.

¹⁹ La lilendelu liande litialɛlɛkɛ la bɔlɛmbu ani bindo yande yasiakowa eoka aaka la miaka kwa kama liu, la Sala atiak’imɔ botomali woota.

²⁰ Kongo ko atialɛlɛkɛ la fee nda botema loasɔ loa lisakä lia Mungu, nde inde lowangema la lilendelu, inde loinela Mungu,

²¹ eoka aluwaka wewe mbo Mungu atokɔkɔlɔ ndokɔcha lisakä eliatikak’Inde.

²² Ko la eoka-ye lilendelu liande liatangomoko mbo liengani liande.

²³ Baoi-ba bako-Liatangelomoko inde, batiasɔnɔmɔkɔ ko l’eoka yande kongo,

²⁴ kangä eoka yasu imɔ lisanga; litangelomoko imɔ ko end’iso ebatolendelo Inde oyatɛmɔlɔkɔ Yesu Ngɛnɛ wasu nda liwa,

²⁵ oyaolomokö ko eoka ya batwanelo basu la oyatɛmɔlɔmɔkɔ eoka ya loenganesomu loasu.