Baloma 13 - Le Nouveau Testament in Kele (Lokele) 1958

Bakakanelo ba lotimbana loa eba Etanda

¹ Batotina, boto la boto, baliteseke ebale l’isosha shokakalesa wenda, eoka angwɛnɛ isosha sakolo ngo ko esisofomo la Mungu, la ebale la shao basotomo ko la Mungu.

² Eokao oyatotefola isosha, asotefola imɔ ko likomyi lia Mungu, la ebatotefola, iyo angɛnɛ batofomo se.

³ Eoka bekomyi biti to ewaesa yowaesa ebakeli bolau, kangä ebakeli obe. ¿Otilɛmbɛ to owangaka ewa isosha? Kelaka to bolau, limɔ inde koomales’aɛ,

⁴ eoka ale bokomyi wa Mungu ndoyales’aɛ la bolau. Bokela to obe, wangaka, eoka atifomo chaka ko wawa; ende to bonyafala wa Mungu wowɛlɛkɛ oyasokelaka obe ko efango ya Mungu.

⁵ Eokao lole loasu ndolites’iyo, inga eoka yowanga efango ya Mungu kongo, kangä imɔ ko l’eoka ya eluwanelo yasu ya olau la obe.

⁶ Ko l’eoka-ye otokambaka bɔsɔmbi, eoka bakomyi bende ebasofomo ko likuwa-li ko la Mungu.

⁷ Faka to ende batotina yao eyengani, biko bɔsɔmbi ende ebengani ndosɔnja yao, bosömbo ende ebengani ndɔsɔ wao, wangaka oyengani ndowangomo, tɛmyaka oyengani ndotɛmyɔmɔ.

⁸ Oyalëke la bolima ende boto angɔmɔi, sakolo ngo ko bolima wosamaka bato basi; eoka oyatosamaka boyalani lande asokɔcha Bikela.

⁹ Eoka mbo baiti-ba bako-Otwëke nyongo, wolëke boto, wiyëke, ololëke yeka, ango liasi imɔ, batotina basosanoelomo ko la liölo-li limɔi liko mbo— Samaka boyalani laɛ kwa ani otosama aɛ angɛnɛ.

¹⁰ Losamɔ loitokɔkɔlɔ ndokelela boyalani loasɔ ango lɔmɔi lobe, likɔchi lia Bikela liende ngo ko losamɔ.

¹¹ Oisoluwa imɔ ngo ko mbo mbile-ye ende lisho lianu liosiswaka nda ilɔ esiingal’ino, eoka kwani liuwesi liasu lisosishana oko tina, ani liayalaka sumbu esika nda lise lina eliaimelak’iso osooso;

¹² Bocho bosambosila, linyanya lisambosɔswa, eokao towatoleke to bekeeli ya lilima, biko eya sɔni, la towateke ko biɛla yonana nda löwa;

¹³ tokɛndɛkɛndɛkɛ la löwa la boyaeli eboɛliami nda baiso ba bato, inga ndotinyaka tosumbe, la liwa lia bänä, inga la bolëfë la bolefela, inga la liwesani la liya;

¹⁴ kongo ko wataka boyaeli wa Ngɛnɛ Yesu Masiya la otakelëke bindo bolenda wa yɛmɛ ya yao.