Baloma 1 - Le Nouveau Testament in Kele (Lokele) 1958

¹ Oyasota lokasa-lo ale ko’mi Paulo, bɔkɔwa wa Yesu Masiya la oyatomoko lioi ndoyala Botomomu, yüchomokö ndonangola Mboli Ilau ya Mungu,

² eyatikak’Inde lisakä ko kwalakwala ko la Batɔndɔli bance nda Lokasa loa Mungu.

³ Mboli Ilau-bi yende loasɔ loa Wana wande oyaotomokö wana wa bofindi wa Dawidi nda lokomba loa bolomboki,

⁴ Inde asɛlɔmɔkɔ Wana wa Mungu ko la bofoka nda bolimo wa botanu ko loasɔ loa litɛmwi nda liwa, Inde ako Yesu Masiya Ngɛnɛ wasu;

⁵ ko l’eoka yande tosɔɔlɔ elame la isosha sha Botomomu shɔɔlɛsɛ bato ba wenda bototina lilendelu eoka ya lina liande,

⁶ la ino imɔ osotomo lioi amamwito lau mbo oyaleke eba Yesu Masiya.

⁷ Ende batotina ebasamomu la Mungu nda Loma bako ebasotomo lioi ndüchakomoko ende Mungu, isotomel’ino bootaota la lilatemi, bako eba Mungu Sango wasu la ba Ngɛnɛ wasu Yesu Masiya.

⁸ Oso, isotafaefa Mungu wami kelekëlë ko la Yesu Masiya eoka yanu batotina eoka mbo lilendelu lianu lioimela Yesu lisotomo lokuku nda wenda bototina.

⁹ Mungu Inde angɛnɛ nd’aluwi to, eoka isokuwel’Inde la bolimo wami ani itonangokola Mboli Ilau ya Wana wande, mbo iitomacha ndosingwaka baina banu nda basomboli bami,

¹⁰ ani itolɔmbɔkɔlɔ mbo yendesomoko ndoyɛnɛ ino ko la lisangi lia Mungu.

¹¹ Eoka yende la yɛmɛ yɔɛn’ino mbo ifek’ino lifaefi limɔi lia Bolimo mbo bokɔkɔmɛkɛ kɔkɛ,

¹² litina mbo iso lanu lami tosungakaneke nda lilendelu liasu.

¹³ Ilɛmbi nd’ino beoto, ndoluwa mbo yasangaka mbile wike ndoya end’ino mbo yɔlɛkɛ eula omolo eyanu kwa aɔlɔkɔ̈’mi nda yese yasi, kongo ko isokufesomo kɔni ndoya konda eweuse.

¹⁴ Yende la bolima bokambela BaHela la Basenje, ende eba wɛli l’eba bibebe lisanga,

¹⁵ eokao yende la yɛmɛ kwa atokɔkɔlɔ’mi ndonangola Mboli Ilau imɔ ko end’ino ebale nda bokenge wa Loma.

Batotina nda wenda bende la boeno wa liengani ko la lilendelu

¹⁶ Iti to la sɔni loasɔ loa Mboli Ilau; eoka yende ko bofoka wa Mungu bouwekesa batotina ebatolendelo Yesu Masiya, BaYuda oso limɔ BaHela.

¹⁷ Eoka ko la Mboli Ilau liengani lia Mungu lisoisolomo ko la lilendelu likɛkɛ konda lilendelu lifi; kwa atomokö loao nda Lokasa loa Mungu mbo— Eba liengani beikaka ko la lilendelu.

¹⁸ Efango ya Mungu losokwa nda use, yao loisolomo ende batotina ebatotefola Mungu la ebatiengane ebatokufesa wewe ko la njasɔ ibe yao.

¹⁹ Eoka, yao ebile yoluwomo loasɔ loa Mungu bisoɛnɛlɛ end’iyo eoka Mungu nd’asoɛnɛs’iyo yao.

²⁰ Eyande ebitiɛnɛlɛ to konda lokelomu loa wenda, biko bofoka wande wa layalaya la boyaeli wande wa Mungu, bitoluwana ko la yao ebisokelomo lande; eokao bati la lioi ango limɔi lia liasala,

²¹ eoka kwa aluwaka’iyo Mungu, batialitesak’Inde la batiainakelak’Inde, kongo ko basolefaka nda baenyeli la betema ya ebisoomelo liluwani bisotufatufa nda lilima.

²² Aongak’iyo mbo bende ba wɛli, iyo lokinjwa ko bibebe

²³ la iyo lofangola bofɛkɔ wa Mungu wa lokato ko la bilimi ya bato la nɔli la nyama ya bakolo banɛi la yao ebitokaowaowa nda nyɛlɛ.

²⁴ Eokao, Mungu lomach’iyo nda bɔwɛwɛ wa yɛmɛ ibe ya betema yau ndotombokolana bindo yau angɛnɛ,

²⁵ eoka basofangola wewe wa Mungu ko la lolanga limɔ basosemokola la basolitesa yao ebikelomu nda lifa lia Bokeli angɛnɛ— Inde ainelomoko la loomalo layalaya, ongoma.

²⁶ Eokao, Mungu lomachel’iyo nda yɛmɛ ibe ya sɔni finɛ; batomali lofetekwana boyaeli wa batomali la wao eboti wa botomali angɛnɛ,

²⁷ la batolome ko ongoma lomachaka ndɔɔtɛlɛ batomali bau, iyo lofɛfɛ la bolëfë wokelana la batolome basi njasɔ ya sɔni, ongoma iyo loaelo nda bindo yau angɛnɛ bosombo wa litwanelo liau.

²⁸ Limɔ kwa iyo batikulie ndoluwa Mungu, ko ongoma Mungu asomachel’iyo boenyaenya wa bobe ebotikuliomo la ndokelaka boendu.

²⁹ Bato ana basotuma la njasɔ; bitotina ebitiengane, la bobe la bolole la luno, basotuma imɔ la lisiëlä la lioli lia bato, la bosho, la bolimbake, la bolalo,

³⁰ basɛɔli ba basi, biyani la Mungu, eba tofälä, bɔmɛtɔ, bɔfɛnɔa, bafɔɔli ba obe, batefoli ba sango la nyango,

³¹ bibebe, batomboli ba basakä, ebati la booto, eba angwɛnɛ liwa-ngandi.

³² Bɔfɔnɔ-bo wa bato nd’aluwi likomyi lia Mungu, liko mbo, ebatokelaka njasɔ ya bɔfɔnɔ-bo bengani nde ndowa, kongo ko iyo angɛnɛ batokelaka yao, nde batoimela imɔ ko la olau basi ebatokelaka imɔ ko yao.