Bakolose 3 - Le Nouveau Testament in Kele (Lokele) 1958

¹ Eya to mbo osotɛmɔlɔmɔ amamwito la Masiya, fumbaka ndolukaka njasɔ ya Use, olo ayali Masiya nda kɛ̈ka nda osamba w’olome wa Mungu.

² Takelaka njasɔ ya use bolenda, inga to yao ebile ono se!

³ Eoka osowela yao, la kwani liwawi lianu lisoisama la Masiya ko ende Mungu.

⁴ Nde akɛnɛlɛkɛ Masiya oyale liwawi liasu, limɔ ino bolɛnɛkɛ lande nda tala.

Beimo eoka ya yɛmɛ ya bindo la liya lia bɛɛnda

⁵ Eokao singesaka yɛmɛ ibe ebile nda bindo yanu ya ono se, biko bolëfë la njasɔ ya bɔwɛwɛ la ifoifoi la yɛmɛ yasi ibe, la bolole ebole lisemoli lia bɛfɔnɔ ya mungu;

⁶ ko l’eoka ya njasɔ-bi efango ya Mungu esoyela bana ba totefola,

⁷ la ino imɔ wakelaka yao oso ani ayaelak’ino sisi ya bɔfɔnɔ ona.

⁸ Nde kwani sokolaka bitotina-bi ya ekanda-ye, biko bolengi la efango, la lisiela la limɔli la baoi ba boendu, angokusw’imɔ nda bɛnɔkɔ yanu.

⁹ Otakanëke nanga ani ino kosokola imɔ boyaeli wa oso la bekeeli ya oso kwa boto oyatosokola bisinda,

¹⁰ la wataka boyaeli boyai ebosotonjomo la wɛlï ko la boyaeli wa Mungu oyakelaka wao;

¹¹ nde nda wao, angwɛnɛ imɔ WaHela la WaYuda, ango ewa itombe kwa ewa losunga, ango bɔɛnda, bosenji wa Sukutiya, ango bɔkɔwa ango iote, kangä Masiya ende yaatotina la awachani la yaatotina.

Bakakanelo ba njasɔ yotutelomo l’eba Masiya

¹² Eokao, ino ebasoaomo, ebüchomu, ebasamomu ba Mungu, wataka botema wa shota la ngandi la liikami se, la botema sambo, la limɛsɛkɛlɛni,

¹³ la lisambolani ko la losamɔ; la boto eyala la wina la loasɔ lɔmɔi, ino ko mɛsɛkɛlenɛ kwa Ngɛnɛ asomɛsɛkelɛ imɔ ko ino.

¹⁴ Simbi to taliaka likolo lia bitotina-bi ko losamɔ eoka loao lole ngo bɔkɔli bokandaka yao hɔlɔɔ.

¹⁵ La lilatemi lia Masiya liyaleke bokomyi wa betema yanu, eoka osotomo lioi ongoma mbo oyaleke bindo ɛmwito. Yalakaka imɔ la kelekele.

¹⁶ Lioi lia Masiya liyaleke la lifotesi sisi yanu, ekesanaka la imakanaka la wɛlï bototina, ko la bɛɛlɛ la ngambi la yuwelo ya Bolimo, la kelekele ende Mungu nda betema yanu.

¹⁷ La baölo batotina ebatoong’ino la bekeeli bitotina yanu, bikelomoko ngo ko nda lina lia Ngɛnɛ Yesu, l’ani atofaekefa ino Mungu Sango kelekele ko l’eoka yande ako Yesu.

Beimo ende bali la batolome, bana la basango, bɛkɔwa la bangɛnɛ

¹⁸ Ino bali, litesaka balome banu kwa aondu nde l’eba Ngɛnɛ wasu.

¹⁹ Ino batolome, samaka bali banu, oyalëke la loanga end’iyo.

²⁰ Ino bana, litesaka ebaot’ino nda njasɔ bitotina, eoka engani nde ongoma l’eba Ngɛnɛ.

²¹ Basango, ofɔɔlɛ̈kɛ bana banu mbo batoka likati.

²² Ino bɛkɔwa, litesaka bangɛnɛ banu ebale bato, nda njasɔ bitotina, inga to kwa toambacha ko l’eoka basotichak’ino, kangä la botema bototina, l’ani asowangak’ino Ngɛnɛ.

²³ Bakuwa ebakakelek’ino, kelaka bao ko la botema bolau kwa mbo okuweli nde Ngɛnɛ wasu, inga bato kongo;

²⁴ osoluwa to mbo otɔɔlɔ botiko wande kwa bosömbo wengani, wende bɛkɔwa nda likuwa lia Ngɛnɛ ako Masiya.

²⁵ Ebatokelaka obe kokambomo imɔ bobe ebosokel’iyo, angokwelakwela bɔmbɔ wa boto.