Bakolose 2 - Le Nouveau Testament in Kele (Lokele) 1958

¹ Ilɛmbi nde mbo ino boluweke ani atokelaka’mi likuwa lia efembi finɛ eoka yanu la eoka ya eba Laodikiya l’ebamɔi ebakɛni bɔmbɔ wami angɛnɛ,

² mbo betema yau bifumbesomoko ani baɛowatemana la losamɔ, mbo bayaleke la wike wa liluwi liokɔkɔmɔ nda lilembeeli lia mbiso ya Mungu, ambo Masiya.

³ Bendanda bitotina ya wɛlï la liluwani biisamani nde ko ende Inde.

⁴ Isoonga lanu ongoma mbo boto atalimbak’ino ndoimela efinole ko la baoi ba bɔlɛtɛlɛtɛ,

⁵ eoka ango itiyale lanu nda bindo, ambo yende lanu nda bolimo, la isoomala ani atɔɛnɛ’mi likɔmɔnyi lianu la bɔkɔkɔmu wa lilendelu elisolendel’ino Masiya.

⁶ Kwa aelak’ino Masiya Yesu Ngɛnɛ wasu, ongoma kɛndɛnɛkɛ lande nda betema yanu,

⁷ ani osokɔkɔmɔ kɔkɛ kwa isandu, ani ososwomo se suu kwa ndakɔ, ani osokɔkɔmɛlɛ nda lilendelu liande, kwa aekesomoko ino la liineli lia kelekele ya likama.

Beimo loasɔ loa liekesi lia njasɔ ebitiengane

⁸ Lambaka la wɛlï mbo boto atalimbak’ino ndoind’ino ko la baoi ba wɛli wa bato, ebale ko lilimbi eliti la litina; liekesi-li lisotutaka ko toongo twa bato angɛnɛ, la etwa belimo ya oso ya wenda-bo, la liti liekesi lia Masiya.

⁹ Eoka ambɔlɛ wa litina lia isosha sha Mungu bosoyala nda bindo ya Masiya kwa asoyala boto nda ndakɔ yande,

¹⁰ la asoyalak’ino lande, osotumesomo fuu lande oyale Botö wa likomyi la isosha sitotina.

¹¹ Asoyalak’ino lande, watinyomoko totombe etotitinyomo ko la besamba ya balomboki, kangä ko la liwatoli lia bindo ya bolomboki nda itombe sha Masiya;

¹² waombomoko lande nda lolufiomo loanu, la nda loao imɔ watɛmɔlɔmɔkɔ amamwito lande ko la lilendelu nda bofoka wa Mungu oyatɛmɔlɔkɔ Inde nda liwa.

¹³ La ino, ayalak’ino ko belyo nda loasɔ loa batongwi banu la sunga ya bindo yanu, osofomo liwawi liyai amamwito la Masiya, ani asomɛsɛl’iso batongwi basu batotina;

¹⁴ asalaka lokasa loa bolima wasu loasɔ loa bakakanelo ebatefolak’iso, aombolaka loao tungi, la awachaka loao la likɔ̈kɔ nda lieka.

¹⁵ Inde lotombola bakomyi la tososha, la Inde lochambola bao chambo la Inde loomalaka fololo eoka yolong’iyo ko la lieka.

Boimo eoka ya bieka la bilämbɔ la saki

¹⁶ Boto angɔmɔi atafëk’ino se eoka yola la yomwa yeka la eoka ya lilämbɔ ango elia tandole ango elia yenga;

¹⁷ bitotina-bi yende ko bɛfɔnɔ ya bilimi ya njasɔ ebikayeke, kongo ko bindo angɛnɛ bisoomana la Masiya.

¹⁸ Boto angɔmɔi atakomy’ino ndotinjak’ino ndoikamela bakitomo se la liɔndwi se oso wau, boto wa bɔfɔnɔ-bo atolitesa saki ebisɔɛn’inde, atowaka bɔmɛtɔ finɛ angwɛnɛ litina ko l’eoka ya baenyeli ba bindo kongo,

¹⁹ ani atiwateme la Botö ako Masiya oyatokondesa bindo bitotina, ebisoonjakelakana la baonge la betata l’ebitokonda la likondesi lia Mungu angɛnɛ.

²⁰ Eya to mbo osowa amamwito la Masiya, nda loasɔ loa belimo ya boyalaäla ya wenda-bo, monito otoyalaka imɔ nda njasɔ ya wenda, ndolitesa baiti ba wao,

²¹ bako-Oundëke, la olɛtɛ̈kɛ, la omatëke?

²² Yeka bina ebiongomu bitɔɔlɔ ani bisolomo, la ndola la baiti yende ko eya bato kongo.

²³ Baiti ba bɔfɔnɔ-bo basotangomo la bato bamɔi mbo wɛlï wokakalesa, wotefokola, wokilaka yɛmɛ ya bindo, kongo ko bati ango la litina liokufesa ifoifoi sha bindo.