Bagalatia 6 - Le Nouveau Testament in Kele (Lokele) 1958

Beimo loasɔ loa lisungakani nda Etanda

¹ Kongo ko Bitungani yami, eya to mbo boto wa Etanda eoshomo nda litwanelo, ino ebafomu Bolimo Botanu kokomya boto-yo la botema sambo; la ino angɛnɛ tichaka la wɛlï mbo otakwa nda lisoshela.

² Tolakanaka belito, ongoma otokɔcha ekela ya Masiya.

³ Boto nde koenyela mbo ende boto wolitesomo, ani wewe ati yeka, ongoma asolimba botema wande angɛnɛ.

⁴ Bolau ko mbo boto la boto akɔtɔlɛkɛ eliande likuwa, limɔ atoyala la litina lioomala eoka ya eliande likuwa, inga eoka ya elia boto wasi.

⁵ Boto la boto atotolaka bolito wa bokuku wande angɛnɛ.

⁶ Oyatoekesomoko lioi lia Mboli Ilau, afaefeke oyatoekes’inde likaɔ lia yeka yande bitotina.

⁷ Olimbomöko nda betema yanu; oitotelaka Mungu kungutu, eoka kwa bɔfɔnɔ wa koto ebitolɔɔkɔ boto, atotwaka ngo ko eula ya bɔfɔnɔ-ao.

⁸ Oyatolɔɔ elanga ya bindo yande angɛnɛ, etwaka ngo ko ebiyɔlu; nde oyatolɔɔ elanga ya Bolimo, etwaka ngo ko loiko loa layalaya.

⁹ Totatɛkwɛ̈kɛ okelaka bolau, eoka akayeke lisho lioengana, iso kotwa eula ani totitaweke likati.

¹⁰ Eokao akayalek’iso la fofe, tokeeleke bato batotina booto, nde simbi to end’iyo ebale bofindi wa ebasoimela.

Baoi ba losilo loa lokasa eloasɔnɔkɔ Paulo angɛnɛ

¹¹ Tɛnɛ ndembe bifi ebisɔnɛli’mi ino ko la bosamba wami angɛnɛ!

¹² Bato ebalɛmbi ndɔɛnɛlɛ la olau loasɔ loa bindo, iyo ana basotinjak’ino mbo otinyomoko totombe, litina mbo iyo angɛnɛ batakongolomo loasɔ loa lieka lia Masiya.

¹³ Nde bato angɛnɛ ebatotinyomo totombe baitolitesa Bikela, kongo ko balɛmbi ino ndotinyomo mbo baomaleke mbo ino nd’asotinyomo nda bindo yanu.

¹⁴ Nde imi angokulya loomala, ango sinyo, sakolo ngo ko eloa lieka lia Ngɛnɛ wasu ako Yesu Masiya; nda lieka lina liande wenda-bo bosowa ende’mi la imi imɔ isowela wenda bototina.

¹⁵ Itombe siti to la litina, la losunga loti ango la litina, kangä boyaeli wa liwawi liyai.

¹⁶ Lilatemi la shota biyaleke la bato ebatokɛsɛnɛ nda mboka-ye ya fii la biyaleke imɔ la BaIsalaele ba Mungu!

¹⁷ Ko la mbile ebikayeke, boto angɔmɔi ataokesa’mi bonui eoka nda lokomba loami imi nd’atoli ngelo ya Yesu.

¹⁸ Bitungani yami, booto wa Ngɛnɛ wasu ako Yesu Masiya boyalaneke la belimo yanu. Ongoma.