Bagalatia 5 - Le Nouveau Testament in Kele (Lokele) 1958

Toyaleke toote twa Masiya twa wewe

¹ Emakalaka to sikɔkɔ kwa toote ani asofaikolomo iso ko la Masiya, la okandokomöko imɔ liasi ko la bɔnyɔlɔlɔ wa bɔkɔwa.

² Tɛnɛ, imi Paulo nd’asoonga lanu mbo— Botinyomo itombe, ani Masiya angosung’ino nda loasɔ angolɔmɔi.

³ Eingo, isokambes’ino liasi la wɛlï mbo batotina ebasotinyomo itombe baondu nde ndolitesa Bikela bitotina.

⁴ Ino ebasotanga mbo wenganesomoko ko l’eoka yolitesa Bikela, ososɛnyana la Masiya; osoomelo booto.

⁵ Eoka iso nd’asoombakelaka iyɛli sha liengani ko la lilendelu.

⁶ Ende ebasowatema la Masiya Yesu, itombe sile wawa, la losunga lole imɔ ko wawa, kangä lilendelu litofumbaka ko l’eoka ya losamɔ.

⁷ Wakɛndɛkɛ l’olau finɛ nda mboka, ¿ndai to asokufesel’ino ndotutaka wewe angɛnɛ?

⁸ Lifumbesi liokufes’ino litiye ko la Inde oyatak’ino lioi liotut’Inde.

⁹ Sinyo sha bänä ba lilaka sitokɔkɔlɔ ndokakesa lituma litotina elisobiomu la shao.

¹⁰ Isolendelo Ngɛnɛ wasu loasɔ loanu mbo ino angoenyela baenyeli basi la mbo boto ona oyasoeyaeyesa ino, kwa asisa kwa ndai, inde ona atokuchomo la bowau.

¹¹ Kongo ko, Bitungani yami, eya to mbo imi nd’atonangoela bato mbo batenomoko itombe, ¿Monito isokongolomo imɔ ko kwani? Ani sɔni ya liwa lia lieka lisosilesomo.

¹² Bolau mbo ebasolɛlɛs’ino batinyek’iyo angɛnɛ lokomba.

Iote sitifomo isosha sholitesa yɛmɛ ya bindo

¹³ Bitungani yami, ino nd’atomu lioi mbo oyaleke toote, kongo ko iote sina sitayala fofe sholitesa yɛmɛ ya bindo, kangä mbo bokuwekelaneke kwa bɛkɔwa ko la losamɔ.

¹⁴ Eoka Bikela bitotina bisokɔchɔmɔ ko la liölo limwito, liko mbo— Samaka boyalani laɛ kwa ani otosama aɛ angɛnɛ.

¹⁵ Nde ango boichakanaka la bolakanaka komba, tichaka la wɛlï mbo botasɛɛsɛlɛ fɛɛ!

¹⁶ Isoonga lanu mbo— Kɛndɛkɛndɛkɛ ko la wɛlï wa Bolimo, limɔ otiangɔɔlɔlɛsɛ yɛmɛ ibe ya bindo.

¹⁷ Eoka yɛmɛ ya bindo bitonanaka la Bolimo la lisangi lia Bolimo litonanaka la bindo. Yao imbale bisoiyelakana mbo otakela yao ebisosang’ino okela.

¹⁸ Eya mbo botutaka Bolimo, ani otikakalesomo ko la Bikela.

¹⁹ Bekeeli ebitofumbekesomo la bindo bisoluwana fololo, biko bolëfë bowɛwɛ, ifoifoi;

²⁰ lisemoli lia bɛfɔnɔ ya mungu, basoo, liya, liwesani, lisiyela, bifango, shɛnɛsɛ, lisɛnyani;

²¹ toloi twa ebisoimelomo, luno, liwa lia bänä, bisha ya tosumbe la njasɔ yasi ya bɔfɔnɔ-bo. Isotaonga lanu kwa aimaka’mi oimak’ino ko oso, mbo ebatokela bɔfɔnɔ-bo wa njasɔ batiɔtɛkɛ nda Bɔkɔta wa Mungu.

²² Nde tuma twa eula ya Bolimo twende losamɔ, limɛngɔ, lilatemi, limɛsɛkɛlɛni, booto, boyaeli bolau, liengani, botema wolendelomo,

²³ botema sambo, botema wokakalesa yɛmɛ ya bindo. Njasɔ ya bɔfɔnɔ-bo bitikufesomo la bikela.

²⁴ Ebasoomana la Masiya Yesu basoola ebisok’iso nda botema la yɛmɛ ya bindo lisanga ko ndoola yao nda lieka.

²⁵ Toyala to la liwawi lia Bolimo, ambo tokɛndɛkɛ ko fii nda mboka ya Bolimo.

²⁶ Toyalëke to la lomuli loa bɔmɛtɔ, la lɔfɔlɔ, toyalanëke la bokelë.