Bagalatia 4 - Le Nouveau Testament in Kele (Lokele) 1958

¹ Imi mbo— Ko la mbile eyekayaleke bosangoli ko wainɛngɛ ale ko bɔfɔnɔ wa bɔkɔwa, ani wewe ende ngɛnɛ wa yatotina,

² asosɛlɔmɔ ose ya isosha sha betingani la benyafala ko nda lisho elisotinyomo la sango.

³ Ende iso ko ongoma; ayalak’iso bainɛngɛ, twayalaka bɛkɔwa ya bolimo wa boyaläala wa wenda-bo.

⁴ Nde enganaka mbile chaa, Mungu lotoma Wana wande ndoyaotomo la botomali, ko nda yakakaelo ya Bikela,

⁵ mbo aendoleke ebayalaka nda isosha sha Bikela la mbo aɔlɛsɛk’iso ishosha shotangomo bana bande.

⁶ Limɔ eoka mbo wende bana, Mungu asotomel’iso Bolimo wa Wana wande nda betema yasu, oyatoamama mbo— Abba, Sango wasu.

⁷ Ongoma to, oti’mɔ bɔkɔwa, kangä wana angɛnɛ; ango boyala wana, ambo wende imɔ bosangoli wa botiko ko l’eoka ya isosha sha Mungu.

⁸ Nde nda mbile ena ani atialuwak’ino Mungu, wasɛlɔmɔkɔ bɛkɔwa ya belimɔ ebiti la boyaeli wa mungu,

⁹ kongo ko kwani asoluw’ino Mungu, angoko ndoluwana la Mungu, monito osoinywa liasi nda belima ya boyalaäla la eya bɔlɛmbu la mbuwa ebisolɛmbɛ ino mbo boyalesomoko bɛkɔwa ko liasi?

¹⁰ Ino nd’atolitekesa baise la tengai la byaa la miaka.

¹¹ Isowanga to loasɔ loanu kwa mbo isookel’ino bonui wa likuwa ko liokela.

¹² Bitungani yami, isolɔmbɔkɔl’ino mbo okinjweke kwa ayali nde’mi, eoka imi nd’asokinjwa kwa ayali nde ino. Otiakeelaka’mi obe oso;

¹³ oluwi nde mbo ko l’eoka ya lokambo loa bindo yanangoelak’ino Mboli Ilau osooso,

¹⁴ la kwa ayalaka boyaeli wami la tale finɛ end’ino, otiaolyaka’mi la otiafekaka’mi, nde wanyangelaka’mi kwa mbo yaaka bokitomo wa Mungu, eingo kwa mbo Masiya Yesu angɛnɛ.

¹⁵ ¿Bootaota ona wanu bole to anima kwani? Isoaola la wɛlï mbo, yambo wakɔkɔlɔ, ani waɔmɔlɔ baiso banu mbo ofaefeke’mi bao!

¹⁶ ¿Mbo isokinjwa wiyani lanu ko l’eoka mbo isokambes’ino ko loasɔ elole wewe?

¹⁷ Bamɔi basofɔɔl’ino, inga la bolau, kangä eoka mbo basosanga ndosakoel’ino angɛnɛ mbo ino angɛnɛ ofɔɔlɛk’iyo.

¹⁸ Lole lolau ndolukomo la bofiili nda njasɔ bilau ko mbile bitotina, inga ko ani eyayaelaka’mi lanu kongo,

¹⁹ ino bana bami bakɛkɛ, isokel’ino ikɛnɛnɛ liasi kwa toelo angɛnɛ ko nda akaotelomoko ino Masiya.

²⁰ Ilɛmbi to finɛ ndoyala lanu kwanikwani, la ndoonga lanu la baölo ba bɔfɔnɔ wasi eoka isoka botema wale loasɔ loanu.

Ikweelo sha loasɔ loa bana bambale ba Abalayama

²¹ Kambesaka’mi, ino ebalɛmbi ndokomyiomo la Bikela, ¿Mbo otioke to bakakanelo ba Bikela?

²² Loasɔnɔmɔkɔ nda Lokasa loa Bikela mbo Abalayama ayalaka la banatolome ambale, ɔmɔi wana wa bɔkɔwa otomali la ɔmɔi wana wa wali iote;

²³ kongo ko wana wa otomali ako bɔkɔwa lootomo ko l’eoka ya isosha sha bindo, nde wana wa wali iote lootomo ko l’eoka ya lisakä lia Mungu.

²⁴ Loasɔ-lo lole bombila ebole la litina end’iso; Batomali-ba bende kwa Ngɛla imbale. Ngɛla ɛmɔi yaaka ya löngo loa Sinai eyengani la Agala ewa bɔkɔwa la bana ba ngɛla ena basootomo ko bɛkɔwa ya yao.

²⁵ Löngo loa Sinai lole nda yese ya Alaba, la losokweelomo la Yelusaleme eyayali kwani eoka bo-kenge-bo la bana bande lisanga, bende bɛkɔwa.

²⁶ Kongo ko Yelusaleme eyele nda Use ende la bɔfonɔ wa wali iote ako Sala la wao bole nyango wasu.

²⁷ Loasɔnɔmɔkɔ mbo— Yaimwaka la limɛngɔ, otomali wa ekomba oyatiaotaka wana, Anjanjaka la amamaka la linɛngina aɛ oyatiaokaka toelo; Eoka loketi loa bana ba botomali wa booi, Losolonga eloa bana ba botomali oyale la bolome!

²⁸ Bitungani yami, tole to bana ba lisakä, kwa ayalaka Yisaka,

²⁹ nde kwa inde oyaotomoko ko loasɔ loa bindo angɛnɛ akongolaka kwalakwala inde oyaotomoko ko loasɔ loa Bolimo, lole to ongoma nda mbile-ye.

³⁰ Kongo ko, ¿Lokasa loa Mungu losoonga moni? Lokasa mbo— Sayaka bɔkɔwa la wanaotolome wande, eoka wana wa bɔkɔwa aitofomo likaɔ lia botiko amamwito l’ewa iote.

³¹ Eokao to, Bitungani yami, toti bana ba bɔkɔwa otomali, kangä bana ba iote sha wali.