Bagalatia 3 - Le Nouveau Testament in Kele (Lokele) 1958

Bikela ya BaYuda angoenganesa bato

¹ He! Ino BaGalatia wende bibebe! ¿Ndai asosinj’ino, ani oso wa baiso banu Yesu Masiya ɛnɛlɛkɛ fololo nda liwa lia lieka?

² Ilɛmbi mbo omutoeleke’mi ko lofelo-lo mbo— ¿Waɔlɔkɔ nde Bolimo ko l’eoka yolitesa Bikela kwa l’eoka yolaila la lilendelu?

³ ¿Wende to bibebe ani? ¿Waakolaka l’eoka ya Bolimo, kwani ototungama nde loasɔ loa bindo?

⁴ ¿Wokakä nde tale wike ko liokela, ango liende ko liokela?

⁵ ¿Oyasofotes’ino la Bolimo la oyatokelaka bisisho sisi yanu, akeli nde ongoma ko l’eoka yolitesa Bikela kwa l’eoka yolaila Mboli yande la lilendelu?

⁶ Ko ongoma Abalayama alendeloko Mungu, la lilendelu liande liatangomokö end’inde mbo liengani.

⁷ Luwaka to mbo bato ebale la lilendelu, iyo ana bende bana ba Abalayama.

⁸ Lokasa loa Mungu loatatondoloko mbo Mungu elaenganesaka bato ko la lilendelu, loafaka Abalayama mboli ilau biko mbo— Ko l’eoka yaɛ bato ba wenda bototina befotesomoko.

⁹ Eokao bato ba lilendelu basofotesomo amamwito la Abalayama oyaaka ewa lilendelu.

¹⁰ Eoka ebasolendelo lilitesi lia Bikela, basosendomo bieo; ani asosɔnɔmɔ nda Lokasa mbo— Batotina ebaitokokomo nda lilitesi lia bitotina eyasɔnɔmɔkɔ nda Lokasa loa Bikela batosendomo bieo ani batikeleke ongoma.

¹¹ Losoluwana to fololo mbo nda baiso ba Mungu angwɛnɛ boto woengana ko l’eoka ya Bikela; eoka mbo— Ewa liengani eikaka ko la lilendelu;

¹² nde Bikela biti ko l’eoka ya lilendelu, kangä mbo— Oyatolitesa bikela eikaka ko l’eoka ya yao.

¹³ Masiya aendolak’iso mbo totasendomo bieo ya Bikela, ani Inde angɛnɛ asendomoko bieo ko l’eoka yasu, eoka lososɔnɔmɔ nda Lokasa mbo— Batotina ebatokakema nda isandu basendomoko bieo!

¹⁴ Asendomoko bieo mbo, ko la Yesu Masiya lifoti lia Abalayama liyeke ende bato ba wenda la mbo tɔɔlɛkɛ Bolimo oyatikomoko lisakä ko la lilendelu.

¹⁵ Bitungani yami, isoluwes’ino litina ko la loasɔ loasu bato; boto angɛnɛ eta ngɛla, angwɛnɛ boto wasi koola yao, ango kokikola litina lia yao, ani ngɛla esokɔchɔmɔ.

¹⁶ Basakä bamɔi batikelomoko to Abalayama la lioti liande; Lokasa angoonga mbo— Baoti baɛ wike, mba, kangä mbo— Lioti liaɛ, litina mbo oto ɔmwito ako Masiya.

¹⁷ Litina elitoonga’mi lile mbo— Bikela ebisoya ko miaka mia inɛi la kama isatɔ mbisa ani Ngɛla yakɔchɔmɔkɔ la Mungu ko oso wa Bikela, la yao angoola Ngɛla la angotombola lisakä.

¹⁸ Nde ango botiko watikomoko ko l’eoka yolitesa Bikela, ambo botifomo ko la lisakä lia Mungu; kongo ko Mungu nd’afaefaka Abalayama botiko ko la lisakä.

¹⁹ ¿Bikela to bile la lini litina? Bikela yataliomoko nda lisakä eoka ya batwanelo ko nda akayeke lioti aliatikomoko lisakä; yao lotomo ko la bakitomo la besamba ya ikomya.

²⁰ Nde ikomya atiyale ko boto ɔmwito kongo, kangä Mungu angɛnɛ ale Ɔmwito.

²¹ ¿Mbo Bikela bitokufesa basakä ba Mungu? Mba, ango sinyo! Eoka eya to mbo Bikela bekɔkɔlɔ ndofaefa bato loiko, ani liengani liafomoko end’ato ko l’eoka ya Bikela.

²² Kongo ko Lokasa loa Mungu losoluwesa mbo bitotina bisoliyakomo ko la Bobe, litina mbo lisakä eliatikomoko eoka ya lilendelu lia Yesu Masiya, lifomoko end’ebatolendelo Inde.

²³ Oso ani lilendelu likafomu iso, twalambomoko la twakanjomoko ko la Bikela ko nd’akaɛnɛsɔmɔkɔ lilendelu angɛnɛ.

²⁴ Ongoma Bikela bile kwa köse ya bainɛngɛ end’iso, ndokɛs’iso la bosamba ende Masiya mbo toenganesomoko ko la lilendelu.

²⁵ Kongo ko kwani asoya lilendelu, ongoma to’imɔ nda bosamba wa köse.

²⁶ Eoka ino yaatotina wende bana ba Mungu ko l’eoka ya lilendelu liolendelo Masiya Yesu.

²⁷ Batotina banu ebasulufiomo to ende Masiya, osowataka boyaeli wa Masiya.

²⁸ Ongoma angwɛn’imɔ WaYuda, kwa WaHela, angwɛn’imɔ bɔkɔwa kwa iote, angwɛn’imɔ otolome kwa otomali; eoka ino batotina fɛɛ wende ɔmwito ko ende Masiya Yesu;

²⁹ la eya mbo wende ba Masiya, ambo ino wend’imɔ ba lioti lia Abalayama la imɔ ebasosangola botiko wande ko l’eoka ya lisakä.