Bagalatia 2 - Le Nouveau Testament in Kele (Lokele) 1958

Paulo afomoko isosha la Batomomu nda Yelusaleme

¹ Limɔ mbisa ya miaka liu la inɛi imi lɔkɛ liasi nda Yelusaleme, amamwito la Balanaba, la iso lɔkɛsɛnɛ la Tito imɔ.

² Nde imi lɔkɛ ko l’eoka ya liɛnɛsu eliɛnɛkɛ’mi la imi losanoel’iyo Mboli Ilau ebisonangola’mi end’eba wenda; nde imi losanola ende ebale bolitesomo, ko wisakumbo, mbo itatimbaka la likuwa ko wawa kongo.

³ Ango Tito oyaaka lami, kwa ayali inde boto wa BaHela, atiatinjomoko ndotena itombe;

⁴ loaka nde loasɔ loa balimbakeli bamɔi ebaowaowaka nda ikumbɛ wisakumbo mbo baläeke esaela eyele lasu eba Yesu Masiya mbo bakandakek’iso liasi nda bekili ya oso.

⁵ Nde totikulye ndolites’iyo ango saa ango ɛmɔi, mbo wewe wa Mboli Ilau botikaleke lanu la wɛlï.

⁶ Kongo ko betoli oso ina—loti to loasɔ ende’mi kwa ayalak’iyo oso, Mungu aitoluwa bɔmbɔ wa boto—betoli oso ina batiteleke’mi litï liyai.

⁷ Kongo ko ɛnɛk’iyo mbo Mboli Ilau bisofomo’mi mbo ikɛkɛ okanangola ende eba sunga, kwa asotomo Petelo ende ebasotena totombe,

⁸ (eoka Inde oyafaka Petelo isosha sha likuwa ende eba totombe, afak’imɔ ko’mi isosha sha likuwa ende eba wenda)

⁹ la aluwaka iyo booto ewafomoko’mi, limɔ Yakobo la Kefa la Yoane, ebatangomu Bakole ba Etanda, iyo lofaef’iso la Balanaba bosamba wa olome wonyangel’iso l’isosha shɔkɛ ndokanangola ende eba wenda, ani iyo angɛnɛ kɔkɛ ende ebasotena totombe;

¹⁰ kongo ko iyo lɔlɛmbɛ mbo toenyeleke bato eba touwe, la imi lofumbaka finɛ ndokela ngo ko ongoma.

¹¹ Nde ayaka Kefa nda bokenge wa Antiokia imi lof’inde liɛngɔ ko oso wa bɔmbɔ wande eoka ayalaka ko se nda loasɔ-lo.

¹² Eoka oso wa loyo loa bato bamɔi ebatomomoko la Yakobo, Kefa lolaka bieka amamwito l’ebati BaYuda; kongo ko ayaka bato ana ba Yakobo, limɔ inde loakola ndosɛnyana lau sumbu eoka inde lowanga ebateni totombe.

¹³ Limɔ BaYuda ebamɔi lowatema lande nda bokwelakwela eboti la momongo, ongoma ko Balanaba imɔ lokuliana lau nda bokwelakwela-bo.

¹⁴ Nde ɛnɛkɛ’mi mbo batikɛndɛ fii nda mboka ya wewe wa Mboli Ilau, imi loonga la Kefa oso wau batotina, imi mbo— ¿Eya mbo aɛ, oyale waYuda osolitesa boyaeli w’ebati BaYuda, inga to imɔ kwa wao wa BaYuda, monito ototinjäka ebati BaYuda ndolitesa boyaeli wa BaYuda?

¹⁵ Iso twende balomboki ba BaYuda, toti to bato ba batwanelo ba wenda-bo,

¹⁶ nde tosoluwa mbo boto aitofomo likolo ko l’eoka yolitesa Bikela, sakolo ngo ko la lilendelu liolendelo Masiya Yesu; la iso nd’asolendelo Masiya Yesu, mbo tofomoko likolo ko la lilendelu nda lina lia Masiya, inga ko l’eoka yolitesa Bikela, litina mbo bolomboki ango ɔmɔi angofomo likolo ko l’eoka yolitesa Bikela.

¹⁷ Nde ango iso tokotaka ndofomo likolo ko ende Masiya, tooshomoko imɔ ko la batwanelo, mbo Masiya atotangomo mbo bofaekefi wa batwanelo? Mbayo, ango sinyo!

¹⁸ Nde ango yeswaka liasi ndakɔ eyesotawɛlɛkɛ’mi se, ambo isoɛnɛsɛ bato mbo imi angɛnɛ yende ngɛnɛ wa litwanelo.

¹⁹ Eoka imi nd’asowela Bikela ko l’eoka ya Bikela, mbo iyaleke la loiko ko la Mungu.

²⁰ Isowa to la liwa eliawaka Yesu nda lieka, nde ati to’mi oyale la liwawi, Masiya nd’ayali too ende’mi; la liwawi elisoyala lami nda bindo kwani, lisowawa ko la lilendelu lia Wana wa Mungu oyasamaka’mi la oyafaka liwawi liande angɛnɛ ko l’eoka yami.

²¹ Ititombole booto wa Mungu, eoka ango liengani lilendelo ko Bikela kongo, ani Masiya awaka ko liwela.