Bagalatia 1 - Le Nouveau Testament in Kele (Lokele) 1958

¹ Imi Paulo Botomomu, inga wa bato, la inga ko l’eoka ya bato, kangä ko la Yesu Masiya la Mungu Sango oyatɛmoloko Inde nda liwa,

² iso la bitungani bitotina ebile amamwito lami, tosotoma lokasa-lo ende eba bitanda nda Galatia.

³ Bootaota la lilatemi lia Mungu Sango la elia Ngɛnɛ wasu ako Yesu Masiya biyaleke lanu;

⁴ Masiya nd’afaka liwawi liande angɛnɛ eoka ya batwanelo basu mbo auwesek’iso nda mbile-ye ya obe, ko la lisangi lia Mungu Sango wasu;

⁵ Indeataliomoko tala layalaya, ongoma!

Mboli Ilaa yafomoko ko la Yesu Masiya

⁶ Isoomwala mbo osoumama ndosɛnyana la Inde oyasot’ino lioi ko la booto wa Masiya okawatema la mboli ilau ya bɔfɔnɔ wasi,

⁷ ebiti Mboli Ilau yasi, kongo ko bato basi batoeyaeyes’ino la basolɛmbe ndofenyaka Mboli Ilau ya Masiya.

⁸ Kongo ko ango iso, ango bokitomo wa Use, ekambes’ino mboli ilau ebisotwana la yao ebisokambesa’mi okambes’ino, ambo inde asendomoko bieo!

⁹ Kwa aongiki’mi oso, kwa akoonga’mi liasi imɔ, mbo ango boto atokambes’ino mboli ilau ebisotwana la yao ebisɔɔl’ino oso, inde asendomoko bieo!

¹⁰ ¿Mbo isɔɔngɔlɔ to bato kwani, kwa mbo Mungu angɛnɛ? ¿Mbo isokota ndoomalesa bato? Ango yeomalesa bato kwani, ambo iti bɔkɔwa wa Masiya.

¹¹ Iluwesek’ino, bitungani yami, mbo Mboli Ilau ebisonangolomo lami biti ya bato,

¹² eoka itiɔlɛkɛ yao ende bato, itiekesomo la bato, kongo ko biafomoko ende’mi ko la lɔɛnɛsɔmu loa Yesu Masiya.

¹³ Osooka to boyaeli wami wa oso nda loasɔ loa lisemoli lia Mungu elitosemokola BaYuda, la mbo yakongolaka Etanda ya Mungu la bowau finɛ, yabebekesaka yao la efango finɛ.

¹⁴ La yalongaka bato wike ba fɛtɔ yami nda loasɔ loa lisemoli lia Mungu la yafumbaka finɛ ndokɔcha ebisoimelomo la basango bami.

¹⁵ Kongo ko asangaka Mungu oyüchaka’mi ko nda sɔlɔ ya nyango wami, la oyataka’mi lioi ko la booto wande,

¹⁶ mbo ɛnɛsɛkɛ Wana wande ende’mi, litina mbo inangoleke Mboli Ilau yande ende bato ba wenda; lisasaya ititwane kuko la bolomboki,

¹⁷ itiɛkɛ nda Yelusaleme end’ebayalaka Batomomu oso wami, kongo ko imi lɔkɛ nda yese ya Alaba, limɔ mbisa imi loinwa nda bokenge wa Damaseke.

¹⁸ Mbisa ya miaka isatɔ imi lɔkɛ nda Yelusaleme fɛtɛti okaluwana la Kefa, ako Petelo, la imi loyalaka lande becho liu la bɔɔmwi.

¹⁹ Nde itiɛnɛkɛ Botomomu wasi sakolo ngo ko Yakobo etungani ya Ngɛnɛ wasu.

²⁰ Nda njasɔ-bi ebisɔni’mi end’ino, tɛnɛ ngo, oso wa Mungu, itite lolanga.

²¹ Limɔ mbisa, imi lɔkɛ nda yese ya Sulia la Kilikia;

²² nde ititaluwomoko bɔmbɔ ende eba bitanda ba Masiya nda Yudea,

²³ bokakä kongo mbo— Inde oyakongolaka iso asonangola loasɔ loa liimeli eloabebesak’inde oso.

²⁴ Iyo loinela imɔ Mungu eoka yami.