Bafilipoi 4 - Le Nouveau Testament in Kele (Lokele) 1958

Beimo la bakakanelo la lifumbesi ya Paulo

¹ Ongoma to Bitungani yami ebasamomu la ebale lami la yɛmɛ yɔɛn’ino, ebale limɛngɔ la boyoyo wa bowangɔ ende’mi, kɔkɔmɛlɛkɛ to ongoma basamomu lami, ko l’eoka ya Ngɛnɛ wasu.

² Isolɔmbɔkɔlɔ Ewodia la isolɔmbɔkɔlɔ imɔ ko Suntuke mbo baluwaneke ko l’eoka ya Ngɛnɛ;

³ eingo la isofela’aɛ oyale bosungani lami wa wewe, mbo osungeke e-batomali-ba, eoka iyo bakelakanaka lami likuwa lia Mboli Ilau, amamwito la Kulemento la basi imɔ ebakelanaka lami likuwa, bale la baina nda Lokasa loa Loiko.

⁴ Okaka to limɛngɔ ko mbile bitotina ko l’eoka ya Ngɛnɛ, isoonga ko ongoma liasi, mbo— Okaka limɛngɔ!

⁵ Bato batotina bɛnɛkɛ mbo ino angɛnɛ wende la limɛsɛkɛlɛni. Ngɛnɛ wasu ale tina!

⁶ Otakelëkë loasɔ ango lɔmɔi loanu bolenda, nde nda njasɔ bitotina luwesaka Mungu yao ebitofelak’ino ko la lisomboli la liömbi amamwito la kelekele imɔ.

⁷ Limɔ lilatemi lia Mungu elilongeli wɛlï wasu bototina litotekamesa la betema yanu la basangi banu ko l’eoka ya Masiya Yesu.

⁸ Nda njasɔ ebitikali, Bitungani yami, enyakelaka la wɛlï njasɔ-bi, biko ebile wewe, ebile yolitekesomo, ebiengani, ebile la botanu, ebile yosamomo, ebile la lokuku lolau; beondo nde ndotaliomo la ndosemokolomo, ino koenyakela yao.

⁹ Njasɔ imɔ ebisoekak’ino la ebisoael’ino ende’mi, la yao ebisokak’ino la ebisɔɛn’ino ani yayalaka lanu, kelakaka ngo ko yao; limɔ Mungu Ngɛnɛ wa lilatemi eyalaka nde lanu.

Baoi ba kelekele ya Paulo eoka ya bɛkɛɛ eyatomaka baina

¹⁰ Nde yende la limɛngɔ fuu eoka ya Ngɛnɛ, eoka osoakola oko liasi ndotakela bolenda wosunga’mi; watakelaka nde bolenda, kongo ko waenoko nde fofe yosunga’mi.

¹¹ Inga to mbo isoonga ani ko loasɔ loa boeno, eoka imi isoeka ndotekama teka nda boyaeli eboyali nde’mi;

¹² iluwi nde ndoyala ko mbuwa, la ndoyala imɔ la lilya. Nda njasɔ bitotina la loasɔ la loasɔ, imi nd’asoosha litina lioyala la lisängo, ango la isiye, ango la lilya, ango la mbuwa,

¹³ isokɔkɔlɔ bitotina ko lande oyatofaefa’mi bofoka wande ako Masiya.

¹⁴ Nde wakeelaka’mi olau finɛ ani wokelaka’mi booto nda bifembi.

¹⁵ Ino ba Filipoi imɔ nd’aluwi to mbo nda baakoelo ba likambesi lia Mboli Ilau olo nda Makedonia ani asokwaka’mi omao, angwɛnɛ Etanda yasi losukana lami lisaɔ liofaefa la liɔɔsɔkɔ bɔkɛɛ, sakolo ko ino kongo.

¹⁶ Nda bokenge wa Tesalonika imɔ, watomakaka bɛkɛɛ yoengana boeno wami batoma ango bambale.

¹⁷ Loti to mbo isolola likaɔ, nde isolola tuma etosootaka kwa bosömbo nda lotango loanu.

¹⁸ Isosɛlɛ to bitotina la yoeta, isokanelo imɔ ani asɔɔlɔ’mi bɔkɛɛ ewatomelak’ino’mi ko la Epafulotito; bole bɔkɛɛ wa liɛsɛ lilau, lifaefi elitoaelomo la olau la elitoomalesa Mungu finɛ.

¹⁹ Nde Mungu wami, ko la lifoka lia tala elisosɛl’Inde, atofaef’ino bitotina ebisoeno ino, ko l’eoka ya Masiya Yesu.

²⁰ Ende Mungu ako Sango wasu, tala biomaneke ko ndalayalayal Ongoma.

²¹ Liseeli ende boto la boto oyüchomu nda lina lia Masiya. Bitungani ebile lami ono batoseel’ino.

²² Ebuchomu batotina batoseel’ino, nde simbi to eba ndakɔ ya Kaisala.

²³ Booto wa Ngɛnɛ wasu ako Yesu Masiya boyalaneke la belimo yanu.