Bafilipoi 3 - Le Nouveau Testament in Kele (Lokele) 1958

Toongo twa bato la wɛlï wau angɔɔlɔlɔ likuwa lia Masiya

¹ Nda njasɔ ebimɔi, Bitungani yami, okaka limɛngɔ ko l’eoka ya Ngɛnɛ; itiwe likati ndosɔnɛl’ino ko njasɔ-ao la bile yolendelomo lanu.

² La wɛlio eoka ya ebale kwa ngwa! Itoko imɔ ebatokelaka obe la yɛnɔ, imɔ ko ebatotinya totombe litinyela,

³ eoka iso nd’ayali ebatotinya twao la wewe ebatosemola Mungu ko la Bolimo la ebatoomala ko l’eoka ya Masiya Yesu, la ebaitolendelo njasɔ ya bindo;

⁴ ambo imi yende la litina liolendelo imɔ ko njasɔ ya bindo! Eya to mbo boto wasi etanga nde mbo ale la litina liolendelo njasɔ ya bindo, ambo simbi to imi!

⁵ Yatinyomoko itombe nda lise lia bonanɛi, yende boto wa bɔkɔ̈kɔ wa Isalaele, wa bofindi wa Benyamina, WaEbele wa lioti lia BaEbele, nda njasɔ ya Bikela yaaka WaFalusi;

⁶ eoka ya bofimbi finɛ yakongolaka Etanda, la itiatwaneloko ango sinyo nda loasɔ loa lienganesi lia Bikela.

⁷ Kongo ko yao ina ebilongiki lami, isotanga yao oko mbo ebisowela’mi ko l’eoka ya Masiya;

⁸ eingo nde, ikotanga bitotina oko mbo bisowa ko l’eoka ya ambɔlɛ wa bolau woluwaka Masiya Yesu, Ngɛnɛ wami. Ko l’eoka yande isolefesa bitotina la isotanga yao mbo ndɛlɔ, mbo yɔlɛkɛ Masiya kwa bondanda la mbo yoshaneke lande batebate,

⁹ inga ani isɛli nde liengani liami angɛnɛ eliolitesa Bikela, kangä liengani liolendelo Masiya, liko liengani lia Mungu elisosekwa nda lilendelu.

¹⁰ mbo ani asokweela’mi boyaeli wa liwa liande, iluweke Inde angɛnɛ la bofoka wa litɛmwi liande, la likaɔ lia lisangani lande nda bemusi yande,

¹¹ mbo eluwa imi koiyela litɛmwi nda liwa.

¹² Ititange nde mbo isoiyela kɔni, kwa mbo isɔɔlwa kwani, kongo ko isokatutake mbo eluwa itukumeleke loao elosotukumelomo’mi ko la Masiya Yesu.

¹³ Bitungani, ititange imi angɛnɛ mbo isoundaka isotukumela loao, nde loasɔ lɔmɔi elotokela’mi, loko mbo itoosakala njasɔ ebile ombisa yami, la itonanwa nano nda fɔmbi mbo yosheke ebile oso wami,

¹⁴ isoengaka nda elongelo, mbo yɔlɛkɛ bosömbo ebokafomoko bolongi boko ndotomo lioi omao likolo, ko ende Mungu ko l’eoka ya Masiya Yesu.

¹⁵ Eokao, iso ebale batowange nda lilendelu, toenyakeleke ongoma, la eya mbo boenyela la bɔfɔnɔ wasi, ani Mungu angɛnɛ eluwesak’ino imɔ ko loao.

¹⁶ Kongo ko nda loao elosoiyel’iso kwani, tokɛndɛlɛkɛ ngo ko fii nda mboka ya loao.

¹⁷ Bitungani, sanganaka ndotutakela’mi la wɛlɛkɛ bato bana baiso, ebatotutakela etichelo yasu;

¹⁸ eoka isokambes’ino bakambesa wike la isokambes’ino kwani liasi ko la foo nda baiso, mbo bato wike batokɛndɛkɛndɛ la boyaeli wa biyani la lieka lia Masiya.

¹⁹ Bato ana batotungama ngo ko nda losɛɛsɛlɔ, mungu yau ngo ko sɔlɔ; iomala shau ngo ko sɔni, batoenyakela ko njasɔ ya se.

²⁰ Eoka ewasu bokenge bole to nda Use, olo atokuswa Bouwesi oyatoumbakela iso oumbakel’Inde la iɛli sifi, ako Ngɛnɛ wasu Yesu Masiya;

²¹ Inde nd’atokindola bindo yasu ya mbuwa, nda bɔfɔnɔ wa bindo yande ya tala ya iomala ko la bofoka wa isosha shande shokakalesa yeka bitotina kakala end’Inde.