Bafilipoi 1 - Le Nouveau Testament in Kele (Lokele) 1958

¹ Iso Paulo la Timoteo bɛkɔwa ya Masiya Yesu, tosotoma e-lokasa-lo end’ino batotina ebüchomu ende Masiya Yesu ebayali nda bokenge wa Filipoi, la ende Bekumi la Basungi b’Etanda;

² booto end’ino la lilatemi lia Mungu Sango wasu la elia Ngɛnɛ wasu ako Yesu Masiya!

Kelekele la lisomboli lia Paulo

³ Itofaekefa Mungu kelekele mbile la mbile ani itosingwaka baina banu nda basomboli bami,

⁴ eoka yanu yaatotina ko la limɛngɔ itosombokoel’ino la kelekele,

⁵ eoka ya lisungani lianu lasu nda limelanesi lia Mboli Ilau ko nda lise lia oso eliokak’ino yao ko nda kwani.

⁶ Isoimela wewe to mbo Mungu oyasoakola ndokela likuwa lilau nda betema yanu, Inde nd’atɔɔlɔlɔ liao hɔlɔɔ nda lise lina lia Masiya Yesu.

⁷ Engani nde lami ndoenyakel’ino yaatotina ongoma, eoka isami nd’ino nda botema wami, eoka nda bɔnyɔlɔlɔ bosoyaiaka lami la nda ïmutoli liomutoela bawanjeli bami, la nda likɔkɔmɛsi lia Mboli Ilau wasukanaka lami lisaɔ lia booto wa Mungu, ino yaatotina.

⁸ Mungu nd’aluwi fololo mbo isookel’ino yaatoti eniya efi la losamɔ lona elole la Masiya Yesu,

⁹ la loao elotosombokoela’mi ino lole mbo losamɔ loanu lonlweke la losɛngɛkɛ nda liluwani la nda wɛlï wolembeela obe la olau,

¹⁰ la mbo okulieke yao ebisolongela l’olau. Ongoma to mbo oyaleke la betema ya momongo, angokwa se nda loasɔ ko nda lise lia Masiya,

¹¹ la mbo otumesomoko fuu la tuma etosokondaka nda liengani elisotela ko l’eoka ya Yesu Masiya mbo Mungu afomoko tala la iomala.

Mboli ya boyaeli wa Paulo nda bɔnyɔlɔlɔ

¹² Bitungani yami, ilɛmbi to mbo oluweke njasɔ ebisoomana lami bisokɛsɛ Mboli Ilau ko la oso, bitikufese yao.

¹³ Ongoma basilikani ba Kaisala la bato basi batotina loluwa fololo mbo bɛnyɔlɔlɔ yami yende ko l’eoka ya Masiya;

¹⁴ la ko l’eoka ya bɛnyɔlɔlɔ yami, lilendelu lia wike wa Bitungani liolendelo Ngɛnɛ lisoulwa, la basotendela ndonangola lioi lia Mungu l’angwɛnɛ bɔwa.

¹⁵ Nde bamɔi batonangoela Masiya ko l’eoka ya lisiela la bokele, nde basi ko la botema bolau;

¹⁶ eba basokelaka ani eoka ya losamɔ, eoka basoluwa mbo isotomo ono ko ndoaolela Mboli Ilau.

¹⁷ Kongo ko ebamɔi batonangoela Masiya ko la bokele la bosho inga la momongo, kangä eoka basotanga mbo batokesa’mi tale nda bɔnyɔlɔlɔ.

¹⁸ ¿Loni to loasɔ? Kangä mbo Masiya asonangokoelomo la mboka bitotina, ango ko la bokwelakwela, ango ko la momongo; nda loasɔ-lo isoka limɛngɔ. Eingo ko, la yokaka nde limɛngɔ fuu

¹⁹ eoka iluwi nde mbo loao lotoeshela’mi louweso ko la basomboli banu ko la lifotesi lia Bolimo wa Yesu Masiya,

²⁰ ani asotaenyela’mi la iɛli silau mbo itiokesomoko sɔni nda loasɔ ango lɔmɔi, kongo ko la lotendela lofi Masiya atotaliomo tala kwanikwani la nda mbile bitotina, ko la njasɔ ebitoyaka nda bindo yami, ango ndoika, ango ndowa.

²¹ Eoka, ende’mi ndoyalaka la liwawi ende ngo ko ndowatemaka la Masiya, la ndowa ende ko bondanda wa botalia.

²² Eya to mbo lole loami ndotikala nda bindo-ye, ambo likuwa liami litofota, nde itiangoluwes’ino eloaa.

²³ Isoɛumɛlɛ nda njasɔ-bi bimbale; yende la yɛmɛ yosokwa nda liwawi-li la ndokayala la Masiya eoka loao lole la olau woeta,

²⁴ kongo ko loasɔ lolongela lole ngo mbo itatikalaka nda bindo eoka yanu.

²⁵ Eokao, isoimela la wɛlï la wɛlï mbo itotikala la itoumwaka lanu yaatoti mbo ɔkɛkɛ la oso la limɛngɔ nda lilendelu lianu,

²⁶ mbo wɛnɛkɛ litina elietami ndotalia Masiya Yesu tala loasɔ loami, eoka ya loyo loami end’ino liasi.

Baoi bofumbesa bɔkɔkɔmu la bofiili

²⁷ Loasɔ-lo lɔmɔi loeti nde, loko mbo boyaeli wanu nda okenge boenganeke la Mboli Ilau ya Masiya, litina mbo, yeya ndoyɛn’ino, kwa mbo itiye, nde yokeke mboli ya boyaeli wanu mbo osokɔkɔmɔ kɔkɛ la botema ɔmwito, ani otonanela Mboli Ilau amamwito, la lisangi limɔi nda lilendelu,

²⁸ la osisimwëke ango sinyo eoka ya biyani lanu; ongoma lotendela loanu lole ndembe yɔɛnɛs’iyo lɔsɛɛsɛlo loau la liuwesi lianu, mbo liao lisofomo nde ko la Mungu.

²⁹ Eoka osofaefomo isosha loasɔ loa Masiya, inga ko ndolendelo Inde kongo, kangä imɔ ndokaka biale wike eoka yande;

³⁰ ino osonana bita ina eyɛnɛk’ino oso ende’mi la ebitöökel’ino kwani loasɔ loami.