Baefeso 6 - Le Nouveau Testament in Kele (Lokele) 1958

Boimo ende bana la ebaot’iyo

¹ Ino bana, litesaka ebaot’ino, eoka engani nde ndokela ongoma ende ebawatemi la Ngɛnɛ.

² Litesaka sango waɛ la nyango waɛ, yao ende ekela ya oso eyele la lisakä,

³ mbo oyaleke la bolau la mbo umweke yumwa ono se.

⁴ Nde ino basango, osomesëke bana banu, kongo ko kɔsɔlɔk’iyo kwa atoekekesomo bana la likomyi la liekesi lia Ngɛnɛ wasu.

Boimo ende Bɛkɔwa la Bangɛnɛ bau

⁵ Ino bɛkɔwa, litesaka bangɛnɛ banu ebale bato la bɔwa la liilimi la botema wa momongo kwa mbo otolitesa Masiya;

⁶ inga to kwa toambacha ko l’eoka basotichak’ino, kangä kwa bɛkɔwa ya Masiya ebatokelaka lisangi lia Mungu la botema bototina;

⁷ la lisangi lilau kwa mbo lile likuwa lia Ngɛnɛ wasu, inga elia bato kongo,

⁸ osoluwa to mbo boto la boto oyasokela likuwa la olau, Ngɛnɛ koinoel’inde imɔ ko olau, kwa ende bɔkɔwa kwa iote.

⁹ Ino bangɛnɛ kelaka imɔ ko ongoma end’iyo, la machaka ndowaekes’iyo eoka osoluwa mbo Ngɛnɛ wau la ewanu imɔ ale nda Use, la mbo aitokwelakwela biombo ya bato.

Biɛla ya bewangɔ ya Masiya

¹⁰ Lioi lia tuu, mbo— Wangemaka ko la liwatemi amamwito la Ngɛnɛ wasu la bofoka wa isosha shande.

¹¹ Wataka biɛla bitotina ya Mungu mbo okɔkɔlɛkɛ ndokɔkɔmɔ ani otonana la fuko ya tɔɔlɛ twa Satana.

¹² Eoka nda bita-bi, toitonana la binyo la bakila, kangä la bekumi la tososha la bakakalesi ba wenda wa botutuku la ngendi ya belimo ibe ya use.

¹³ Eokao, undaka to biɛla bitotina ya Mungu mbo okɔkɔlɛkɛ ndokɔkɔmɛlɛ nda lise libe, la ani osonana la bofoka bototina, ko ndokɔkɔmɔ.

¹⁴ Kɔkɔmɔkɔ to kɔkɛ! Wataka bɔkɔli nda tɛta yanu la momongo, la libala lia liengani nda bokükü,

¹⁵ la tokwaka nda batindi, toko liendesi lia Mboli Ilau ya lilatemi;

¹⁶ undaka bitotina-bi, simbi to nguwa ya lilendelu, ko la yao bokɔkɔlɔkɔ ndotungelesa kɔkɔ ya bösä bitotina ya Ewa Bobe.

¹⁷ Aelaka imɔ kɔmɔ ya yeto eko liuwesi, la chaka eyefomu la Bolimo, eko Lioi lia Mungu.

¹⁸ Sombokolaka mbile bitotina la basomboli la baömbi batotina ko la Bolimo, eokao yalaka la botengu wosombokola la bofiili loasɔ loa ebüchomu batotina ba Masiya.

¹⁹ Sombokolaka imɔ loasɔ loami mbo lioi lioengana lifomoko’mi ani akalioleke’mi bɔnɔkɔ wami inangokoleke la lotendela njasɔ ebisoisolomo ya Mboli Ilau;

²⁰ eoka ya Mboli Ilau imi nd’ale wɛndi la ikomya oyakandomu bɔnyɔlɔlɔ, sombokolaka to mbo iteke boeki wa yao la lotendela, ani engani lami ndoke a.

²¹ Mbo ino oluweke kwa ayalli’mi la ani atokela’mi, ongoma to Tukiko etungani oyasamomu lasu la bosungi wa lotimbana nda likuwa lia Ngɛnɛ, inde nd’atoluwes’ino njasɔ bitotina.

²² Isotoma inde end’ino ko l’a litina-li, mbo oluweke ani ayali njasɔ yasu la mbo afumbeseke betema yanu.

Lisomboli lia lifotesi liotungesa lokasa

²³ Lilatemi la losamɔ, amamwito la lilendelu, ya Mungu Sango la Ngɛnɛ wasu ako Yesu Masiya, bifomoko ende bitungani yasu ya Etanda.

²⁴ Booto boyaleke la batotina ebatosamaka Ngɛnɛ wasu ako Yesu Masiya la losamɔ elotilasaek’imɔ.