Baefeso 4 - Le Nouveau Testament in Kele (Lokele) 1958

Bakakanelo ende Etanda eko bindo ya Yesu Masiya

¹ Eokao, imi Paulo, oyakandomu bɔnyɔlɔlɔ eoka ya likuwa lia Ngɛnɛ, isolɔmbɔkɔl’ino ndokɛndɛkɛndɛ la boyaeli wengani l’ebatomu lioi ndotutak’Inde,

² la liikami se la botema sambo la limɛsɛkɛlɛni la lisambolani ko la losamɔ,

³ fumbaka la bofiili wokuliana kwa boto ɔmwito nda liwatemani lia lilatemi ko la Bolimo.

⁴ Bindo yende ngo ko ɛmwito la Bolimo ngo ko Ɔmwito, kwa ani atomoko ino lioi la iɛli ko simɔi,

⁵ ko Ngɛnɛ Ɔmwito, lilendelu limɔi, lilufi ko limɔi,

⁶ ko Mungu ɔmɔi ako Sango wa yaatotina, oyale likolo lia yaatotina, oyasuchi yaatotina, la oyale atiteni ya batotina.

⁷ Nde booto wa Mungu bofomu nd’iso oto la oto ko la likao lia lifaefi lia Masiya.

⁸ Nda loasɔ-lo Lokasa loa Mungu loonga mbo— Ailomoko Inde likolo, Inde lokɛsɛnɛ la limbilititi lia ebaindomoko lande, limɔ akaelaka bato bakaɔ.

⁹ ¿Baoi-ba bende to la lini litina; Ailomoko, liti to mbo atasulwäkä oso ko ono se nda nyɛlɛ?

¹⁰ Oyasulwaka se ale ngo ko Inde oyailomoko olikolo lia Use bototina mbo atumeseke yaatotina,

¹¹ la bakaɔ ebafak’Inde, bako mbo, bamɔi Batomomu, bamɔi Batɔndɔli, bamɔi banangoli ba Mboli Ilau, bamɔi betingani ya liyasa lia Yesu, bamɔi baekesi,

¹² mbo bakomiomoko ndokelaka likuwa lia basungi ba ebüchomu, ndokokɔmɛsɛ Etanda eko bindo ya Masiya,

¹³ konda akiyelek’iso yaatotina kwa ɔmwito nda lilendelu la liluwani lia Wana wa Mungu, konda akakondek’iso botolome oku yoengana l’ikweelo sha boyaeli wa Inde oyasɔɔlwa ako Masiya.

¹⁴ Mbo totayala imɔ kwa bana’oli bofalimana la boeyaeyaesomoko la fofo bitotina ya liekesi lia bato ba bolimbakeli, ko la shɔngɔlɔ sha iɔlɛ shau sholimbaka basi.

¹⁵ Kongo ko atoongan’iso ko momongo la losamɔ, tokondeleke ngo ko ende Masiya nda njasɔ bitotina, Inde ale boto angɛnɛ,

¹⁶ la eoka ya Botö-yo bindo bitotina ani bisoonjakelakana la bisowatemana ko l’eoka ya baonge batotina ebatomu nde la bofoka woengana likuwa lia elengö la elengö ebitofumbesa likondi lia bindo, ndokɔkɔmɛlɛ la losamɔ.

¹⁷ Eokao isoonga lanu liasi la isokambes’ino nda lina lia Ngɛnɛ wasu, mbo otayal’imɔ kwa akoyali eba tukela ya wenda, la liyaëlä nda betema yau;

¹⁸ basotufatufa nda baenyeli, basosiama sia la loiko loa Mungu eoka ya botutuku ebole nda betema yau eoka bisokwa bowäü finɛ.

¹⁹ Baitok’imɔ la basotaka betema yau se nda bolëfë la basolola bekeeli bitotina ya bɔwɛwɛ.

²⁰ Nde ino otieke njasɔ ya Masiya ongoma;

²¹ ambo woki nde mboli yande la mbo wekesomu nde wewe wa njasɔ ebisoomana lande ako Yesu.

²² Sokolaka to boyaeli wanu wa oso kwa atosokolomo esinda eyesoya ɛkwɛlɛ, boyaeli ebosɔɔlɔ eoka ya yɛmɛ ya bolimbake,

²³ la kindolomoko nde boyaeli boyai wa bolimo wa betema yanu;

²⁴ wataka boyaeli wa boto boyai oyasotonjomo la liluku lia Mungu la liengani la botanu wa wewe.

²⁵ Eokao, machaka bolimbake bototina fɛɛ, onganaka ko la wewe, eoka oto la oto ale ngo ko elengo ya bindo ɛmwito.

²⁶ Bosoma nde, okelëke litwanelo nda lisomi liaɛ; likɔlɔse litaosh’ino oko la lisomi lianu,

²⁷ la ofëke Satana fofe nda betema yanu.

²⁸ Ewa wiya, wiyëk’mo, kangä akelaka likuwa liwau la besamba yande angɛnɛ, mbo ayaleke la yeka yofaefaka eba boeno.

²⁹ Okusolëke lioi ango limɔi lia bɔwɛwɛ nda bɛnɔkɔ yanu, kangä lioi lilau lioengana fofe mbo liokeseke ebatoka liao ko bootaota.

³⁰ Wokesëke Bolimo Botanu wa Mungu botema wale, watomoko nde ndembe ya chapa ya Bolimo-ao loasɔ loa lise lia liendolomu lianu.

³¹ Bokëlë la bolengi la efango la bosho la limɔli, bitotina-bi bisokolomo end’ino la lisiela lisanga.

³² Nde yalakanaka la booto, la ngandi, la limɛsɛlɛni kwa amɛsɛlɛkɛ Mungu omɛsɛl’ino ani awatemani ino la Masiya.