Baefeso 3 - Le Nouveau Testament in Kele (Lokele) 1958

Paulo ale Botomomu ende bato ba tukela ya wenda

¹ Ko la litina-li to, imi Paulo, boto wa Masiya oyakandomu bɔnyɔlɔlɔ, eoka yanu ba tukela yasi,

² eluwa nde osoka mbo isosha sha likuwa-li lifomu ende’mi ko la booto wa Mungu,

³ la imɔ mbo Mungu angɛnɛ nd’aisoelaka’mi njasɔ yande ebiaisomoko oso, kwa asɔnɛli’mi ino oso ko la baoi bamyɔ kongo;

⁴ akatangek’ino bao, ino kokɔkɔlɔ olembeela liluwani liami lioluwa njasɔ ya mbiso ya Masiya,

⁵ ebitialuwesomoko ende bato ba fɛtɔ ya oso, kwa asɔɛnɛsɔmɔ nde yao fololo ende Batomomu la Batɔndɔli ebüchomu ko la Bolimo.

⁶ Ebisoɛnɛsɔmɔ biko mbo bato ba biese yasi bende imɔ l’isosha shosangola botiko ko ɔmɔi la mbo bende ba bofindi ko ɔmɔi, la batofomo imɔ ko lisakä lia liuwesi lia liwatemi la Masiya Yesu ko l’eoka ya Mboli Ilau,

⁷ Yafomoko isosha shosungaka nda likuwa-li ko la lifi lia booto wa Mungu eliafomoko’mi ko la lifumbesi lia bofoka wande.

⁸ Booto-bo wafomoko ende’mi, ambo imi oyatiangoengana la itungangɔlɔ sha ebüchomu batotina ba Masiya, mbo inangokoeleke bato ba wenda-bo Mboli Ilau ya bondanda wa Masiya ebotiango woluwana loketi,

⁹ mbo yɛnɛsɛkɛ bato batotina litina lia yao eyaisomoko ko la fɛtɔ ya oso nda botema wa Mungu oyakelaka bitotina;

¹⁰ mbo wɛlï wa Mungu ebole la bɛfɔnɔ wikewike boluwesomoko ende bekomyi l’eba tososha nda Use ko la Etanda,

¹¹ kwa asangaka ngo ko Inde kwalakwala la kwa asokoch’Inde kwanikwani ko la Masiya Yesu Ngɛnɛ wasu.

¹² Twende la isosha shotendela ndoonga lande la ndosishana lande ko la lilendelu ndolendelo Inde ako Masiya.

¹³ Eokao isolɔmbɔkɔlɔ mbo totawa esole eoka ya bifembi ebitokaka’mi loasɔ loanu, eoka yao bile ko liomala lianu.

¹⁴ Ko la litina-li to, isoswa balui se oso wa Sango,

¹⁵ oyasosingwomo lina-li lia Sango nda befindi bitotina, la nda Use la ono se,

¹⁶ isosombola mbo, kwa ayal’Inde angɛnɛ la bondanda wa liomala la tala, awangemeseke ino la Bolimo wande, atiteni yanu,

¹⁷ la mbo Masiya ayalakeke nda betema yanu ko la lilendelu, mbo okokomɛkɛ la ɔɔ̈tɛkɛ nda losamɔ kwa isandu nda nyɛlɛ,

¹⁸ la mbo okɔkɔlɛkɛ ndoluwa, amamwito la batotina ebüchomu ba Masiya, ikweelo sha losamɔ loande, siko bofalu la bosa, la bolundu la botalemu,

¹⁹ ndoluwa losamɔ loa Masiya eloti loluwomo la wɛli wasu; mbo otumesomoko fuu ko la lotumeso loa Mungu.

²⁰ Mungu oyasokɔkɔlɔ ndokela yao ebisoetela basomboli la baenyeli basu,

²¹ ko la bofoka eboyali nd’atiteni yasu, Inde afomoko tala la isosha sha Etanda la esha Masiya Yesu ko layalaya. Ongoma.