Baebele 6 - Le Nouveau Testament in Kele (Lokele) 1958

Tɔɛkɛ to la oso nda liluwani lia njasɔ ya Masiya

¹ Totamachaka to njasɔ ya liakoli ebiomani nde la Masiya, la tɔkɛsɛnɛkɛ la oso nda yao ebisɔɔlwa, inga ndotak’imɔ liekesi lia likalangani loasɔ loa bekeeli ebisowa, la liimeli lia Mungu,

² la liekesi lia lilufi, la lotalio loa besamba, la lɔtɛmwɔ nda liwa, la liataki lia njasɔ elia layalaya;

³ Mungu ɛlɛmbɛ, ani iso kokela ongoma.

⁴ Eoka nda loasɔ loa ebasoeshomo nda löwa, ebasofomo bɔtɔ̈mɔ wa lifi lia Use la ebasokaana Bolimo Botanu la beoto,

⁵ l’ebasoaela bɔtɔ̈mɔ wa lioi lilau lia Mungu la bofoka wa mbile eyekayeke,

⁶ limɔ basotaka njasɔ-bi se, angokɔkɔlɔ imɔ ndoinol’imɔ iyo liasi la likalangani, eoka anyo basoola Wana wa Mungu nda lieka ko liasi eoka yau angɛnɛ la basokes’Inde sɔni nda baiso ba bato.

⁷ Nyɛlɛ ebisomwaka mbula ebisotɔnɔkɔ ina, la ebisɔtɛ̈kɛsɛ bieka yolesa bato ebasolɔɔ yao, nyɛlɛ ina bitɔɔlɔ lifotesi lia Mungu.

⁸ Kongo ko eya mbo ɛɔtɛkɛsɛ ko kɛkɛ la toilaila, ani nyɛlɛ ina biti la litina, la bisambotutunyomo, tuu ya yao ko wambe.

⁹ Ango toonga ngo ko ano, ino ebasamomu, tosoenyela wewe mbo njasɔ yolongela bina, bitoyel’ino, biko ebisoomana la liuwesi lianu.

¹⁰ Eoka Mungu ale la liengani la aitolenja bakuwa banu la lisungi lia losamɔ elisotambak’ino, ko l’eoka ya lina liande, ende ebüchomu b’Etanda, la okosungak’iyo ko kwani.

¹¹ Tolɛmbi nde finɛ mbo boto la boto wanu atambeke bofiili-ao ko nd’akaiyelek’ino nda iɛli esitoundak’ino kɔkɛ ko nda liko,

¹² mbo otayala la elemolomo, kangä bakweekeli ba iyo ebasosangola basakä ba Mungu ko la lilendelu la likɔkɔmɛlɛ.

¹³ Eoka atikelaka Mungu Abalayama lisakä, Inde lotinya imɔ ko ekanɔ la lina liande angɛnɛ, eoka angwɛnɛ lina liasi liolongela eliande,

¹⁴ Inde mbo— Fufo, yefotesak’aɛ la yelaulwesaka bofindi waɛ.

¹⁵ Ongoma inde lɔɔlɔ to lisakä ko la likɔkɔmɛlɛ liande.

¹⁶ Bato angɛnɛ batotinyaka bikanɔ ko la lina lia Inde oyalongel’iyo, la nda tofenya twau tototina ekanɔ etosilesa loasɔ.

¹⁷ Ko ongoma, alɛmbɛkɛ Mungu ndotamba finɛfinɛ basangoli ba lisakä lina mbo kuko yande angokikwakikwa, Inde lowacha imɔ ekanɔ la lisakä liande,

¹⁸ mbo ko la njasɔ bimbale-bi ebitilakikwek’imɔ la ebitilatombolomoko la Mungu, iso balomboki ebasokwela Mungu botili, tosɔɛnɛ lisungi lia bofoka, mbo tokusameleke iɛli esisoeteel’iso oso.

¹⁹ Iɛli-si sile end’iso kwa tondo ya bolimo eyeitosɔngwa la eyesoswomo se suu la eyesɔɔtɔ nda kuku ombisa ya Eüchelo,

²⁰ olo asoeteel’iso Botoli oso wasu ako Yesu, Oyasoyala Kanga-Eyeti ko l’eoka yasu, layalaya la liluku lia Mɛlɛkisɛdɛkɛ.