Baebele 4 - Le Nouveau Testament in Kele (Lokele) 1958

Lioi lia Mungu lisofaef’iso lisakä lia liuwesi

¹ Eokao, kwa asotikomo lisakä liɔɔtɔ nda baɛumɛlɔ bande, towangeke mbo boto ɔmɔi wanu atatangomo mbo asoomelo bao.

² Eoka iso nd’asonangoelomo Mboli Ilau imɔ kwa iyo ana; kongo ko lioi eliokak’iyo litiaɔlɛsɛk’iyo yeka eoka litiasobianaka la lilendelu nda betema ya ebokaka liao.

³ Kongo ko iso ebasoimela lisakä, tosɔɔtɔ nda baɛumɛlɔ, kwa aongak’Inde mbo— Kwa atinyaka’mi ekanɔ nda lisomi liami, mbo— Batilaɔtɛk’imɔ nda baɛumɛlɔ bami. Kongo ko tokesa twande twakelomoko konda lokelomo loa wenda-bo.

⁴ Aongaka to olo nda lokasa, loasɔ loa lise lia osambale, mbo— Limɔ Mungu loɛuma la lise lia osambale nda bakuwa batotina ebakelak’Inde.

⁵ Aongaka imɔ liasi mbo— Batilaɔtɛk’imɔ nda baɛumɛlɔ bami.

⁶ Eokao losotikaelomo to bamɔi baɔtɛkɛ nda bao, limɔ ebanangoelomoko oso Mboli Ilau ina basoomelo ndɔɔtɔ eoka batiaaka la lilendelu,

⁷ nde Inde lotinya lisho liasi mbo Louse, ani aongak’Inde ko la Bɔɛlɛ wa Dawidi mbisa ya fɛtɔ wike, la baoi ebasoongomo oso, mbo— Louse-lo boka lioi liande, Okwelöko betema bewaü.

⁸ Eoka eya mbo Yoswa afak’iyo fofe yoɛuma ani atiaongak’imɔ loasɔ loa lise liasi mbisa;

⁹ baɛumɛlɔ ba Yenga basotikala oko ende bato ba Mungu,

¹⁰ eoka oyakaɔtɛkɛ nda baɛumɛlɔ bande, asoɛuma nda bakuwa ebande, kwa aɛumaka imɔ Mungu nda ebande bakuwa.

¹¹ Totafumbaka to ndɔɔtɔ nda baɛumɛlɔ bana, mbo boto atakwa nyongo ko la kanda ena ya litefoli.

¹² Eoka Lioi lia Mungu likoyali la liwawi l’itinjo, lowelo loa liao losolongela eloa ambɔtɛ ya fänga imbale, litotwɛlɛ ko nd’atiteni ya botema la bolimo, la ko nd’atiteni ya baonje la bɔɔngɔ wa tokwa, la litoataka baenyeli la basangi ba betema.

¹³ Angwɛnɛ yeka eyakelomoko lande eyetiɛnɛlɛ oso wa bɔmbɔ wande, eoka bitotina fɛɛ bile wase la bisotambomo fololo oso wa baiso ba Inde oyale Bokomyi wasu.

Yesu Kanga-Eyeti ale kwa iso bato, nde angwɛnɛ litwanelo

¹⁴ Twende to la Kanga-Eyeti Efi oyasɔɔtɔ hɔu nda Use, ako Yesu Wana wa Mungu, eokao tokɔkɔmɛkɛ kɔkɛ nda liaolelomu liasu oaolel’Inde.

¹⁵ Eoka toti la Kanga-Eyeti oyatikɔkɔlɛ ndokel’iso ngandi eoka ya biale yasu, nde Inde angɛnɛ asoshelomoko nda njasɔ bitotina kwa iso, nde angwɛnɛ litwanelo.

¹⁶ Tosishaneke to la lotendela tina la kɛka yande ya booto, mbo tɔɔlɛkɛ shota la mbo tosheke booto bosungak’iso nda mbile ya boeno.