Baebele 13 - Le Nouveau Testament in Kele (Lokele) 1958

Bakakanelo la Beimo yosungak’iso nda lɔkɛndɔ loasu

¹ Beoto ya Etanda, samakanaka la bɔkɔkɔmu;

² angolenja ndokeela bɛɛnda imɔ booto, eoka ongoma bamɔi basonyangela bakitomo angɛnɛ ani batilembeel’iyo!

³ Enyakelaka ebasokandakomo bɔnyɔlɔlɔ kwa mbo bosokandomo imɔ amamwito lau; imɔ ko ebasokeelomo obe finɛ, bende imɔ la bindo kwa ino.

⁴ Batotina baliteseke lisɔngɔni; ebasosɔngɔnɔ angoingala la wasi eoka Mungu nd’atofak’eba nyongo la bolëfë se.

⁵ Botema botumëke la yɛmɛ ya bieto; omala ko la yao ebisosɛlɛ ino, eoka Mungu angɛnɛ nd’aongaka mbo— Iitota aɛ se; iitomacha aɛ booi.

⁶ Eokao tosoonga la lotendela mbo— Mungu nd’ale Bosungi wami, itiangowanga. ¿Balomboki angɛnɛ batokɔkɔlɔ ndokeela’mi iye?

⁷ Enyelaka ebayalaka Betoli oso yanu, ebaongelak’ino Lioi lia Mungu. Asoenyakel’ino boyaeli wa bawelo bau, tutelaka lilendelu liau.

⁸ Yesu Masiya ale lɛlɛngɔ la louse la konda layalaya ngo ko boyaeli ɔmɔi.

⁹ Oeyaeyesomoko ko la liekesi lia kanda la kanda la elia bɔfɔnɔ ebotiluwane lasu, eoka bolau mbo botema bokɔkɔmɛsɔmɔkɔ ko la booto wa Mungu, inga la yeka yola ebiitosungaka ebatotutaka boyaeli wa yao.

¹⁰ Ebatokuwela etambelo ya Kumbo Eüchomo bati l’isosha sholaka eyele nda eyasu etambelo;

¹¹ eoka akɛsɛkɛ Kanga-Eyeti bakila ba nyama nda Eüchelo ya Botanu kwa litambi eoka ya bobe, belyo ya nyama angɛnɛ yafechomoko lousa loa likula lia okenge.

¹² Ko ongoma to, Yesu awaka biale omolo lousa loa likula lia bokenge (wa Yelusaleme) mbo ataneseke bato batotina ko la bakila bande angɛnɛ.

¹³ Kwani tümeke to lousa loa likula okawatemaka lande nda sɔni eyokak’inde,

¹⁴ eoka toti la bokenge wokɔkɔmɔ eyamaya, nde tosokaluke ebokayeke.

¹⁵ Ko la Inde ako Yesu, totambeke lifaefi lia liineli ende Mungu ko mbile bitotina, liko eula ya bɛnɔkɔ yasu ebitoaolela lina liande.

¹⁶ Olenjëke to ndokeelana bolau la ndosungakana la bakaɔ, eoka ongoma bile batambi boomalesa Mungu finɛ.

¹⁷ Litesaka betoli oso yanu la kuliaka likomyi liau la liikami se, eoka batolamba la belimo yanu la löwa la ocho kwa bato ebatokasanoela lotimbana loau mbo batimbaneke nda likuwa ko la bootaota, inga la bokikimeli, eoka wao angosung’ino ango sinyo.

¹⁸ Somboelak’iso eoka toluwi nde mbo betema yasu biti la loasɔ, kongo ko tolɛmbi ndoyalaka la liengani nda njasɔ bitotina.

¹⁹ Nde isolɔmbɔkɔl’ino finɛ mbo osomboeleke’mi mbo yeinolomoko end’ino lisasaya.

Lisomboli la baseeli ba liko lia lokasa

²⁰ Kwani Mungu wa lilatemi, Oyatɛmɔlɔkɔ Ngɛnɛ wasu ako Yesu nda liwa, oyale Botingani woeta wa bɛkɔkɔ, ko la bakila ebatinyak’Inde la Ngɛla ya layalaya,

²¹ aɔlɛsɛk’ino bitotina bilau yokelaka lisangi liande, ani Inde atokela end’ino yao ebitoomales’Inde angɛnɛ, ko la Yesu Masiya; la tala bitotina bifomoko end’Inde ko layalaya! Ongoma.

²² Nde isoomb’ino, Bitungani, ndoka lioi lia liɛngɔ lia lokasa loami, eoka isosɔnɛl’ino ko baoi bamyɔ.

²³ Luwaka to mbo etungani yasu ako Timoteo asotomo se, la eya nde lono sumbu lisasaya, iso lande koyɛn’ino.

²⁴ Seekelaka betoli oso yanu betotina la batotina ebüchomu ende Masiya. Eba yese ya Italia basoseekel’ino.

²⁵ Booto wa Munga boyaleke lanu yaatotina! Ongoma.