Baebele 10 - Le Nouveau Testament in Kele (Lokele) 1958

Yesu asowel’iso, asomɛsɛl’iso, eokao tosishaneke tina lande

¹ Bikela yende ko elimi ya ambɔlɛ wa bolau ebolayeke, biti to ikweelo angɛnɛ sha yao ebiyali nde wewe, eokao ko l’eoka ya batambi ebatotambakomo mwaka la mwaka, bitikɔkɔlɛ ndɔɔlɔlɔkɔ ebatosishakana tina la yao.

² Aenaka ongoma, ani batambi baisomacha ndotambokomo, eoka betema ya basemokoli betanesomoko, ani iyo koluwa wewe mbo bende la batwanelo?

³ Kongo ko, batambi bana batoenyakelesa bato batwanelo bau mwaka la mwaka;

⁴ eoka bakila ba mbolo l’eba mbuli batikɔkɔlɛ ndosokola batwanelo basu.

⁵ Eokao, aiyelak’Inde wenda-bo, Inde loonga mbo— Otilɛmbɛ batambi bofechomo la bafaefi ba bieka, Ende ngo bindo eyesotonj’Aɛ eoka yami;

⁶ Otiomale nda batambi ba nyama yofechomo, La bafaefi eoka ya batwanelo basu.

⁷ Limɔ, Imi loonga to mbo— Tɛnɛngo, Imi nd’asoya oyakela lisangi liaɛ, Ee Mungu; Loasɔnɔmɔkɔ ongoma nda botüku wa Lokasa eoka yami.

⁸ Aongaka oso mbo— Batambi bofechomo la bafaefi ba bieka la batambi ba nyama yofechomo la bafaefi eoka ya batwanelo, otilɛmbɛ bao la otiomale nda bao, (ani batambomoko kwa asɔnɔmɔkɔ nda Bikela)

⁹ limɔ Inde loonga mbo— Tɛnɛngo, Imi nd’asoya oyakela lisangi liaɛ. Asotombola eloa oso mbo akɔkɔmɛsɛkɛ eloa mbisa.

¹⁰ Ko la lisangi lina tosotanekesomo ko la litambi limwitoto lia bindo ya Yesu Masiya.

¹¹ La kanga bitotina bitoemakala lise la lise ndokelaka lotimbana lotambaka batambi liasi la liasi ko litambi lia bɔfɔnɔ-ao, la bao batikɔkɔlɛ imɔ ndosokola batwanelo basu;

¹² kongo ko atambak’Inde ako Masiya litambi ko limwito eoka ya batwanelo, limɔ Inde loyala se ko nda liko nda bosamba wa olome wa Mungu,

¹³ limɔ atoumbakela ko nd’akasɛlɔmɔkɔ biyani lande kwa esolo ya batindi bande,

¹⁴ eoka ano ko la litambi limwito, asɔɔlɔlɔkɔ ebasüchomo, konda layalaya.

¹⁵ La tole imɔ la likuliomu lia Bolimo Botanu, oyasotaonga mbo—

¹⁶ Tɛnɛ ngɛla eyelatinyaka’mi lau mbisa ya bacho ana, Ngɛnɛ Mungu loonga ongoma; Itota bikela yami nda betema yau, La itosɔnɔ yao ko nda baenyeli bau.

¹⁷ La batwanelo bau la batongwi bau, itilaenyeleke imɔ bao.

¹⁸ Ongoma to asomɛsɔlɔmɔ batwanelo, ani angwɛnɛ imɔ litambi eoka ya batwanelo.

¹⁹ Bitungani, kwa ayali iso la lotendela ndɔɔtɔ nda Eüchelo ya Botanu, ko l’eoka ya bakila ba Yesu,

²⁰ eyele mboka eyai, l’eya loiko, eyalioelak’Inde olioel’iso ko la esinda ya bolelo, eko bindo yande,

²¹ la eoka mbo twende la Kanga-Eyeti Oyalongeli ndokɔmɔnya bofindi wa Mungu,

²² tosishaneke to tina lande la botema wa momongo la lilendelu lifi, ani betema yasu bisomɛmyakomo loasɔ loa limɛsɛli lia obe, la bindo yasu bisosoolomo la balia batanu.

²³ Tokɔkɔmɛkɛ to kɔkɛ nda liaoleli lia iɛli shasu, angomelaimela, eoka oyatikelak’iso lisakä ale wolendelomu.

²⁴ Toenyakeleke ndofumbesana nda njasɔ ya losamɔ la bekeeli bilau,

²⁵ angolenja ndosɔngɔkɔmɔ, kwa atokelaka bamɔi, kangä kofumbesana, simbi to ani asɔɛn’ino mbo Lise lina lia Ngɛnɛ lisoya tina.

²⁶ Nde tokela obe ngo ko la yɛnɔ ani tososila ndoluwesomo mboka ya wewe, ano angotikal’imɔ litambi loasɔ loa batwanelo basu, kangä ko iwaesa sha baatelo ba njasɔ yasu la efango ya lofio eyetoombesa biyani lande hombe.

²⁸ Boto oyatotefola Bikela ya Mose, inde kowa angwɛnɛ liwa ngandi, ko la bɛnɔkɔ ya bato bambale ango basatɔ ebɛnɛkɛ loasɔ.

²⁹ Asa kɔni boto oyasotefwesa Wana wa Mungu la oyasotanga bakila ba ngɛla mbo bɔwɛwɛ ani basotanes’inde, la oyasotefwesa bɔmbɔ wa Bolimo wa Booto; ¿Otangi nde mbo boto-yo engani nde eni kanda ya likuchi lifi to?

³⁰ Eoka toisoluw’Inde oyaongaka mbo— Likundeli lile loasɔ loami, Imi nd’atosakanesa njasɔ. La mbo— Ngɛnɛ nd’atoyala wataki wa bato bande.

³¹ Iwaesa sina, siko ndokwa se nda besamba ya Mungu wa Lokato!

Toenyakeleke bifembi ya kwaala

³² Enyakelaka to mbile ya kwala eyaeshomoko ino nda löwa loa liuwesi ani aumwak’ino ndonana la bifembi liangɔ;

³³ mbile bimɔi watambomoko bɔkɛcha la bifembi finɛ nda baiso ba bato la mbile bimɔi wawatemaka la baina ebakelakomoko ongoma.

³⁴ Eoka wawelak’imɔ eba bɔnyɔlɔlɔ ngandi la wasaekelaka betema la limɛngɔ eyaindomoko biengo yanu eoka waluwaka mbo ino angɛnɛ wende la biengo yolongela ebilayaleke lanu ko layalaya.

³⁵ Omachëke to lilendelu lianu elile la bondanda wa likama ebokɔɔlɛk’ino.

³⁶ Nde ende la boeno wa likɔkɔmɛlɛ mbo akakelek’ino lisangi lia Mungu bɔɔlɛkɛ ko yao eyatikomoko lisakä.

³⁷ Eoka ko mbile sinyo sinyo, Limɔ oyakayeke, Inde eyaka nde la aitomɔngɔmɔngɔ.

³⁸ Nde boto wami wa liengani eikaka ko la lilendelu, kongo ko einywa bituki mbisa, Ani botema wami angoomala loasɔ loande.

³⁹ Nde iso toitoinywa bituki mbisa ndokakwa nda lɔsɛɛsɛlɔ, kangä mbo twende bato ba lilendelu kond’akaɔlɛk’iso betema yasu la liuwesi.