2 Yoane 1 - Le Nouveau Testament in Kele (Lokele) 1958

¹ Imi Wange w’Etanda, nd’asosɔnɔ lokasa-lo ende botomali wa elame oyaaomu la Mungu, la ende bana bande, ebasamomu lami batotina la wewe; la inga ko lami kongo, kangä imɔ ko la batoti ebaluwi njasɔ ya wewe,

² ko l’eoka ya wewe eboyali nda betema yasu la ebokayaleke imɔ lasu ko layalaya.

³ Booto la shota la lilatemi ya Mungu Sango la Yesu Masiya ako Wana wa Sango, biyaleke lasu nda wewe la losamɔ!

Tokɛndɛlɛkɛ la lilitesi nda losamɔ

⁴ Isokaka limɛngɔ finɛ eoka isoosha bamɔi ba bana baɛ batokɛndɛlɛ ko nda wewe, kwa atelomoko iso ekela ko la Sango.

⁵ La kwani, Botomali wa elame, isömb’aɛ ing’imɔ ndosɔnɛl’aɛ ekela eyai, kangä ko yao eyaaka lasu ko nda liako, eko mbo tosamaneke.

⁶ La losamɔ lona lole ngo ko mbo tokɛndɛlɛkɛ ko nda bikela yande; ekela ena, kwa okakä ino ko nda liako, mbo okɛndɛlɛkɛ nda losamɔ.

⁷ Eoka balimbakeli wike basokakɛndɛkɛ nda wenda-bo, bato ebaitoaola mbo Yesu Masiya asoya nda bindo ya boto. Bɔfɔnɔ-bo ale bolimbakeli la bofekwani la Masiya.

⁸ Lambaka betema yanu, mbo otalefesa yao ebisokuwel’ino, kangä mbo bɔɔlɛkɛ bondanda ebosɔɔlwa.

⁹ Boto oyatoetela oso, angokɔkɔmɔ ko nda liekesi lia Masiya, ambo ona atiyale la Mungu; nde oyasokɔkɔmɔ nda liekesi, ambo ona asoyala la Sango la Wana.

¹⁰ Boto eya end’ino ani atieshe liekesi-li, ɔtɛsɛ̈k’inde nda ndakɔ, oseelëk’inde!

¹¹ Eoka boto oyatoseel’inde, ambo asosangana lande nda bekeeli bibe yande.

¹² Ile la njasɔ wike yoonga lanu, nde itiangosɔnɔ la lokasa la wino kongo ko yende la iɛli shoyɛn’ino la ndoongana lanu l’ɔmbo l’ɔmbɔ, mbo limɛngɔ lianu liɔlwɛkɛ.

¹³ Bana ba etungani yaɛ etomali oyasoaomo basoseel’aɛ.