2 Timoteo 4 - Le Nouveau Testament in Kele (Lokele) 1958

Bakakanelo basi loasɔ loa likuwa lia Timoteo

¹ Isotel’aɛ likakanelo nda baiso ba Mungu la Masiya Yesu oyatoatakela ebakoyala la liwawi, l’ebasowa; ko la loyo loande la Bɔkɔta wande,

² taka boeki wa Lioi liande; emaelaka likuwa liaɛ la nda mbile ya fofe, l’ani fofe etiɛnɛlɛ, imakaka, faka liɛngɔ, fumbesaka, owëke esole ango sinyo nda liekesi liaɛ.

³ Eoka mbile elayaka nde eyetiokeke bato liekesi lia wewe, kongo ko, l’eoka ya yɛmɛ yau angɛnɛ, batotaka likama lia baekesi lioi eoka batoi bau angɛnɛ bende la longo lokaka njasɔ biyai,

⁴ la batoimbokola batoi bau nda liekesi lia wewe la batokatute bembila ya batata.

⁵ Nde aɛ angɛnɛ, aekesaka botema se, tendekelaka biale, kelaka likuwa lia Bonangoli wa Mboli Ilau, ɔlɔlɔkɔ lotimbana loaɛ loa bosungi.

Mboli ya Paulo la baina omolo ayali Paulo

⁶ Nde loasɔ loami angɛnɛ, Imi ikowɛlɔmɔ se, kwa lifaefi elisowɛlɛmɛ se nda etambelo la mbile ya lɔkɛndɔ loami losamboiya;

⁷ isolonga ndonana liango lilau, isoiya la lilongi nda fɔmbi, isokɔcha tele yami ya lilendelu;

⁸ ko la mbile eyekayeke iyoyo sha bowangɔ sisüchelomo’mi; la Ngɛnɛ wasu elafaka’mi shao nda lise lina liande, Inde nd’ale Bokomyi ewengani. Tinga’mi angɛnɛ kongo, kangä imɔ ko batotina ebasolombakela loyo loande la losamɔ, iyo belafomoko imɔ ko shao.

⁹ Fumbaka ndoya ende’mi lisasaya,

¹⁰ eoka Dema, oyasami nde njasɔ ya wenda-bo, asomacha’mi okakɛ nda Tesalonika; Kelesekene asɔkɛ nda Galatia la Tito nda Dalamatia.

¹¹ Ko Luka kongo ayali lami ono; taosoko Malako, yauku lande amamwito laɛ, eoka asosunga’mi la lotimbana nda likuwa.

¹² Isotoma Tukiko nda Efeso.

¹³ Eyekayek’aɛ, eshaka kanjo eyamachaka’mi olo eya Kalapo nda Tuloa la kasa ina imɔ, nde simbi to kofo yosɔnɛlɔmɔ kasa.

¹⁴ Alesandelo botuli wa mbela asotamba’mi bokondo finɛ; Ngɛnɛ elaolɛsɛk’inde likundo lioengana la bekeeli yande.

¹⁵ Aɛ imɔ kolamb’inde la wɛlï eoka afekelak’iso inango finɛ;

¹⁶ Boto angɔmɔi ationgele’mi nda limutoli liami lia oso liomutola liwanjelomu, nde batotina bamacheliki’mi; lotatangelomo iyo mbo loasɔ!

¹⁷ Nde Ngɛnɛ wasu ayalanaka lami ndɔɔlɛsɛ’mi bofoka, mbo ko lami linangoli lia wɛndi wande limelesomoko nda wenda la mbo tukela ya bato batotina bokeke wao; la isɔɔnɔkɔlɔmɔ nda bɔnɔkɔ wa simba,

¹⁸ Ngɛnɛ wasu atɔɔnɔkɔlɔ’mi nda bobe bototina la atouwesa’mi yɔtɛkɛ nda Bɔkɔta wande wa Use. Ataliomoko tala ko layalaya, ongoma.

Baseeli ende baina ba Paulo

¹⁹ Seelelaka’mi Pulisika la Akwila la bofindi wa Onesifolo.

²⁰ Elaseto asotikala nda Kolinto la isomacha Tulofimo nda Mileto ani ayali la loo.

²¹ Fumbaka ndoya ono oso wa tengai ya bondiya. Eubulu asoseel’aɛ, la Pudeno la Lino la Kalaudia la bitungani bitotina ya Etanda imɔ basoseelak’aɛ.

²² Ngɛnɛ wasu ayaleke la bolimo waɛ. Booto boyaleke lanu.