2 Timoteo 2 - Le Nouveau Testament in Kele (Lokele) 1958

Boimo ende Timoteo mbo akɔkɔmɛlɛkɛ

¹ Aɛ, wana wami, wangemesomoko ko la booto ebole la Masiya Yesu,

² la yao ebisokak’aɛ ende’mi nda baiso ba batangeli wike, ɔlɛsɛkɛ imɔ ko bato basi ebolendelomo mbo baekekeseke imɔ ko basi.

³ Aelaka likaɔ lia biale ebitokak’iso kwa bosilikani bolau wa Masiya Yesu.

⁴ Bosilikani oyasɔkɛ bita aitoluwan’imɔ la njasɔ ya okenge eoka mbo aomaleseke Komanda oyasotak’inde lina nda lotango.

⁵ La boto wa liangɔ imɔ, aitofomo ikëmbë sha ngɔi sakolo ngo ko asolitesa baiti ba liangɔ.

⁶ Bokuwi wa elanga oyatokaka bonui, aondu nde ndɔɔlɔ eula ya elanga oso wa basi.

⁷ Enyakelaka elotoonga’mi la Ngɛnɛ wasu atolembeeles’aɛ litina litotina.

⁸ Enyakelaka Yesu Masiya wa bofindi wa Dawidi, oyatɛmwɛsɔmɔkɔ nda liwa, kwa asoekesomo nda Mboli Ilau ebisonangola’mi;

⁹ la eoka ya Mboli Ilau-bi isoka biale oko kwani asokandomo’mi bɔnyɔlɔlɔ kwa oto obe finɛ, kongo ko Lioi lia Mungu litikandomo.

¹⁰ Eokao isotendela bitotina mbo ebasoaomo la Mungu, baɔlɛkɛ imɔ ko liuwesi elisoomana la Masiya Yesu ko la tala ya layalaya lisanga.

¹¹ Liölo-li lile ngo ko wewe, mbo— Eya to mbo tosowa amamwito la Masiya, ambo tolayalanaka lande nda loiko;

¹² Eya mbo tokɔkɔmɛlɛ biale, tolaɔlɔkɔ likaɔ nda yakakaelo yande. Toanganya Inde, ani Inde elaanganyaka iso;

¹³ Eya mbo iso toti bolendelomo, Inde angɛnɛ asokɔkɔmɔ ewolendelomo, eoka atikɔkɔlɛ ndotombola lioi liande angɛnɛ.

¹⁴ Enyelesaka iyo njasɔ-bi. Nda baiso ba Ngɛnɛ telak’iyo imɔ liti mbo bafenyakanëke tofenya twa baoi, eoka ongoma twao angosunga loasɔ, kangä koeyaeyesaka ebatoka liekesi.

¹⁵ Fumbaka la bofiili ndoɛnɛlɛ oso wa Mungu kwa bokuwi oyatoomalesa ngɛnɛ wande, angoka sɔni nda bokalala wa lioi lia wewe eoka atosanoela lioi la liengani.

¹⁶ Fekaka to beongaonga la tofenya ebile wawa eoka ongoma batokɛkɛ la oso nda litefoli lia njasɔ ya Mungu, la baoi bau batokɔnɔ kwa loo nda Etanda.

¹⁷ Humanayo la Fileto bale bato ba bɔfɔnɔ-bo,

¹⁸ basolota nda mboka ya wewe ani basoonga mbo litɛmwi nda liwa lisosila oko kwani, la ongoma basoeyaeyesa lilendelu lia bato bamɔi.

¹⁹ Kongo ko esukameselo eyekɔkɔmu, eyaswomokö ko la Mungu ekoyali ina la esotomo ndembe ya chapa yande, mbo— Ngɛnɛ nd’aluwi ebande; la imɔ mbo— Boto la boto oyatosingwa Lina lia Ngɛnɛ asɛnyanɛkɛ la bitotina ebitiengane.

²⁰ Nda ndakɔ ya likama, biɛngɔ ina biti ko eya mbela la bieto ya pata kongo, kangä imɔ ko eya tosandu la tɔlɔngɔ, la bimɔi bile yotaliomo nda likuwa, la ebimɔi biti yotaliomo.

²¹ Eya to mbo boto etanesa botema wande ndosokola ebimɔi, inde koyala kwa ɛɛngɔ yotaliomo, eyesüchomo la eyengani nde la likuwa lia ngɛnɛ wa ndakɔ la eyekɔmɔnyɔmu bakuwa batotina balau.

²² Kwelaka to yɛmɛ ya liemba botili, nde engaka liengani, la lilendelu, la losamɔ, la lilatemi amamwito l’ebatosingwaka lina lia Ngɛnɛ ko la betema betanu.

²³ Fekaka ndoka tofenya la bosho wa bibebe eoka bile wawa la oluwi nde mbo bitofɔɔlɔ liwesani kongo.

²⁴ Nde bɔkɔwa wa Ngɛnɛ wasu ationdu nde ndowesakana, kangä ndoyala boto wa shɔnjɔnja ende batotina la boekesi wa wɛlï la bɔfɔɔmu.

²⁵ aekeseke ko la botema sambo ebatotefokol’inde, eluwa Mungu atofaef’iyo fofe yokalangana la yoluwa njasɔ ya wewe,

²⁶ la mbo buwesomoko see nda ilonga sha Satana esisoundes’iyo kakau mbo bakeleke lisangi liande.