2 Timoteo 1 - Le Nouveau Testament in Kele (Lokele) 1958

¹ Imi Paulo Botomomu wa Masiya Yesu ko la lisangi lia Mungu, eoka ya lisakä lia loiko elosoomana la Masiya Yesu,

² ende Timoteo wana wami wa losamɔ; booto la shota la lilatemi lia Mungu Sango la Masiya Yesu Ngɛnɛ wasu biyaleke laɛ.

Kelekele ya Paulo eoka ya lilendelu lia Timoteo

³ Itofaekefa Mungu kelekëlë ani itoenyakela’aɛ mbile la mbile nda basomboli bami ende Mungu oyasokuwela’mi okuwel’Inde la botema botanu, kwa akelaka imɔ bangau bami.

⁴ La ocho la löwa, ani atoenyakela’mi foo yaɛ eyɛnɛnɛk’iso laɛ, itokwelo yɛmɛ yɔɛnɛ aɛ liasi, mbo iyaleke ko la limɛngɔ fuu liasi.

⁵ Isoenyelesomo loasɔ loa lilendelu liaɛ lia momongo, lia bɔfɔnɔ ewayalaka oso la tata waɛ otomali, ako Loisi la elia nyango waɛ ako Euniki la iluwi nde mbo liyali imɔ ko laɛ.

⁶ Ko l’eokao itoenyakeles’aɛ ndofumbesa isosha sha booto eshafomoko aɛ la Mungu ko la lotalio loa besamba yami;

⁷ eoka Mungu atiafaefak’iso bolimo wa bɔwa, kangä ewa bofoka la losamɔ la likɔmɔnyi lia botema.

⁸ Eokao owëke limama nda linangoli loasɔ loa Ngɛnɛ wasu, ango ko eoka yami oyakandakcmu bɔnyɔlɔlɔ eoka yande, kongo ko aelaka likaɔ lia biale ebitookak’iso eoka ya Mboli Ilau, ko la bofoka wa Mungu,

⁹ oyasouwes’iso, oyasot’iso lioi lia lotanesomo, inga eoka ya bekeeli yasu, kangä eoka ya lisangi liande angɛnɛ la booto wande ewafomoko iso ende Masiya Yesu ko oso wa lotango loa mbile,

¹⁰ ebosoisoelomo iso kwani ko la lɔɛnɛlɔ loa Bouwesi wasu ako Masiya Yesu oyasotungamesa liwa la oyasoanesa loiko la liwawi elitilafɔndɛk’imɔ, ko l’eoka ya Mboli Ilau.

¹¹ La imi nd’atomokö bonangoli la Botomomu la boekesi,

¹² ko l’eokao isokaka imɔ ko biale-bi. Nde itioke sɔni eoka iluwi nde ndoluw’Inde oyasolendokolomo lami la iluwi nde mbo asokɔkɔlɔ ndotingakana la yao ebisofaefa’mi efaef’inde ko nda lise lina lia Ngɛnɛ.

¹³ Tutelaka ko eluweselo ya liekesi lilau elisok’aɛ ende’mi ko la lilendelu la losamɔ loa Masiya Yesu;

¹⁴ tinganaka la wɛlï la yao ya wewe ebisofaefomo aɛ ko la Bolimo Botanu oyayali atiteni yasu.

¹⁵ Osoluwa loasɔ loko mbo baina batotina nda tukela ya Asia basolɔmwɛlɛ’mi, bu ko la Fungelo la Elumongene amamwito lau.

¹⁶ Ngɛnɛ wasu awɛlɛkɛ bofindi wa Onesifolo shota eoka inde nd’asoyasunga’mi mbile la mbile la atiokele bɔnyɔlɔlɔ wami sɔni,

¹⁷ nde iyak’inde nda Loma, inde lumama okaluke’mi la inde loosha’mi omao.

¹⁸ Ngɛnɛ wasu afek’inde fofe yoosha shota sha Ngɛnɛ nda lise lina liande; la lisungi liande nda Efeso, aɛ nd’aluwi liao finɛ.