2 Petelo 2 - Le Nouveau Testament in Kele (Lokele) 1958

Boimo loasɔ loa Batɔndɔli ba bolimbakeli

¹ Nde batɔndɔli ba bolimbakeli batɛmwaka sisi ya bato, kwa akayek’imɔ ko baekesi ba bolimbakeli sisi yanu, batoeshel’ino tofenya ko wisisa tosɛɛsɛlɛsɛ Etanda, batoanganya ango Ngɛnɛ oyasoendol’iyo; ongoma batoeshel’iyo angɛnɛ ko lisɛɛsɛli lia lisasaya.

² Limɔ wike betutaka nde boyaeli wa bolëfë, la eoka yau, mboka ya wewe etomɔlɔkɔmɔ.

³ Limɔ ko la bolole wau batɔsɔkɔ bieto yanu kwa bokalala wa baoi ebatofenyak’iyo la yɛnɔ; nde likuchi liau ko kwaala litiyeke l’imɔngi la lisɛɛsɛli liau litiingale la bolengelenge.

⁴ Eya to mbo Mungu atiamɛsɛlɛkɛ bakitomo eyatwaneloko iyo, nde koumbokol’iyo nda eyaelo ya Satana, la atak’iyo nda basɛkɔ ba botufɛlɛ wa ndi mbo bakandokomoko ko nda liateli lia njasɔ;

⁵ atiamɛsɛlɛkɛ eba wenda wa kwaala, kongo ko auwesaka Noa ako Boekï wa Liengani buu ko la bato basi osambale ani aeshaka fela efi nda wenda wa bato ebatiluwaneke la Mungu;

⁶ aombesaka Inde bekenge ya Sodomo la Amola ko ndokindola yao ko biuta ko biuta, ongoma Inde lɔsɛlɛ yao ko etichelo ende bato ba mbisa ebakaluwaneke ango la Mungu;

⁷ ɔnɔkɔlɔkɔ imɔ Mungu Loti ewa liengani, oyaokesomoko tale ko la boyaeli wa bolëfë wa bato babe,

⁸ (eoka boto ona wa liengani, ani ayalak’inde sisi yau lise la lise, ɛnɛk’inde la okak’inde bekeeli yau eyatefokolaka Bikela, inde lokaka botema wale finɛ, boko botema wa liengani).

⁹ Ongoma Ngɛnɛ nd’aluwi ndɔnɔkɔlɔ eba liengani nda lisoshela la ndoundekesa ebati la liengani nda lokuchakelo ko nda lise lia liataki,

¹⁰ nde asa kɔni ebatolitekesa yɛmɛ ibe ya bindo ebisobebes’iyo la ebatosɛɔlɔ tososha. Bende la lotendela lobe la etenge, la baitowanga ndomɔlɔkɔ ebatalemi tala;

¹¹ ani bakitomo ebalongeli iyo la bofoka la isosha, angofak’iyo se la limɔli nda baiso ba Ngɛnɛ.

¹² Nde e-bato-ba bende kwa nyama ebiti la liluwani ko la boyaeli wa bindo kongo, eyaotomoko ko ndoundakomo kala la ndoolomo, batomɔlɔkɔ njasɔ ebitiluwek’iyo litina, batosɛɛsɛlɛsɔmɔ ko la lɔsɛɛsɛlɔ loa yao,

¹³ batokelakomo obe ko l’eoka ya bobe ebosokelak’iyo. Batangi nde mbo limɛngɔ ko bilambɔ ya sɔni yolomo ko la löwa. Bende kwa bakɔi la bamɛmɛ babe, basoendaenda nda bilambɔ yanu ya losamɔ.

¹⁴ Baiso bau basobalyana l’eba batomali ba nyongo, angotatɛkwa batwanelo, batɔɔngɔlɔ betema ya bato ebatikɔkɔmɛ, eoka betema yau bisoekekesomo ko ndolola yao ebiti eyau.

¹⁵ Bana ba mɔlɔ! Basoengwa mboka ya fii, basokaeyaeya okatutaka mboka ya Balaama, wana wa Beola, oyalɛmbɛkɛ finɛ ko bosombo wokamba ebitiengane,

¹⁶ nde inde lofomo liɛngɔ ko l’eoka ya eliande litefoli; punda y’euma loonga la limiki lia boto, ongoma yao lokufesa loseka loa bɔtɔndɔli ona.

¹⁷ Bende tosolo etoti ango la balia, baumba ebasotinjakomo la lomba; botufɛlɛ wa ndi bosüchelomo iyo.

¹⁸ Eoka atoongak’iyo betendele ya likama, batɔɔngɔlɔ bato ebasambosekwa nda bofoka wa ebatokelaka batwanelo, la batɔɔngɔl’iyo ko la yɛmɛ ya bolëfë wa bindo.

¹⁹ Batotikel’iyo lisakä lioyala iote, ani iyo angɛnɛ bende bɛkɔwa ya boyaeli wa bɔwɛwɛ; eoka boto ende bɔkɔwa wa inde oyasolongel’inde.

²⁰ Eya to mbo besekwaka nda boyaeli wa wenda-bo ko la liluwani lia Ngɛnɛ la Bouwesi wasu ako Yesu Masiya, limɔ bekandakomo liasi la belongelomo ko la wao, boyaeli wau wa mbisa bosoetela ewa oso la bobe.

²¹ Eoka bolau wolongela ko mbo ani batialuwaka mboka ya liengani, inga to mbo basekweke nda bikela bitanu eyafaefomoko iyo la eyaluwak’iyo la wɛlï.

²² Wisha wa wewe bosoowanel’iyo boko mbo— Ngwa esoinwela yeka eyesosɛndɛk’inde; la wasi mbo— Ndɛi esosoola bindo, la esoinwa okalɔkwalɔkwa nda baïti.