2 Batesalonika 1 - Le Nouveau Testament in Kele (Lokele) 1958

¹ Paulo la Silwano la Timoteo, iso tosotoma lokasa-lo ende eb’Etanda ya Tesalonika eyomani la Mungu Sango wasu la Ngɛnɛ ako Yesu Masiya.

² Booto la lilatemi elia Mungu Sango la Ngɛnɛ Yesu Masiya biyaleke lanu!

³ Lole loasu ndofaekefa Mungu kelekele eoka yanu mbile bitotina, Bitungani, kwa aondu nde eoka ya lilendelu lianu lisokonda finɛ la lisamani lianu yaatotina, boto la boto, lisoulwaka finɛ.

⁴ Ongoma tosoomala loasɔ loanu nda bitanda ya Mungu eoka ya likɔkɔmɛlɛ lianu la lilendelu lianu nda bakongolomu la bifembi ebisokak’ino.

Loasɔ loa likongolomu lia eb’Etanda

⁵ Ongoma, njasɔ-bi bile ndembe yɔɛnɛs’iso likomyi lia liengani lia Mungu mbo ino botangomoko ebengani ba Bɔkɔta wa Mungu, ani ino imɔ osoka biale eoka ya wao.

⁶ Ambo Mungu nd’asosakanesel’iyo bifembi ebasokes’ino ko bifembi,

⁷ la atofaef’ino ebasoka bifembi ko lɔɛumɔ amamwito lasu imɔ, ani akaɛnɛlɛkɛ Ngɛnɛ Yesu ndosokwa nda Use amamwito la bakitomo bande ba bofoka,

⁸ ko la bosä wa loiloi, la atotena likuchi lia ebatiluwe Mungu l’ebatilitese Mboli Ilau ya Ngɛnɛ wasu ako Yesu.

⁹ Iyo ana belakuchomoko la lisɛɛsɛli lia lokato, belasɛnyaka shɛi la bɔmbɔ wa Ngɛnɛ nda tala ya bofoka wande,

¹⁰ ani akayek’Inde nda lise lina ndotaliomo tala ko la ebasüchomo lande la ndomwaalomo ende batotina ebimelaka, eoka inango shasu shonangoel’ino sisoimelomo wewe.

¹¹ Ko l’eoka-ye totosombokoel’ino mbile la mbile, mbo Mungu wasu atangeke ino mbo wengani nde wotomo lande lioi la mbo aɔlɔlɛkɛ basangi batotina banu balau la bekeeli ya lilendelu ebisokelak’ino ko la bofoka wande,

¹² mbo lina lia Ngɛnɛ wasu ako Yesu litaliomoko tala ko lanu, la ino imɔ ko lande, eoka ya booto wa Mungu wasu la Ngɛnɛ wasu ako Yesu Masiya.