2 Bakolinto 9 - Le Nouveau Testament in Kele (Lokele) 1958

Bɔsɔnjɛli wa lifaefi liosunga eba touwe

¹ Nde nda loasɔ loa lifaefi liosunga bato ba Etanda ebale la boeno, ino otienu mbo isɔnɛlɛk’ino liasi,

² eoka iluwi nde mbo okulyi nde finɛ, kwa asoinakel’mi ino ende eba Makedonia mbo— Eba Akaiya basokomya okusola ko nda mwaka wa oso; eingo, bofiili wanu bosofumbesa wike wau.

³ Isotatoma to e-bitungani-bi mbo baoi bami boinel’ino batayala ko baoi wawa nda loasɔ-lo, kangä mbo boenganeke ndosɔnja liao kwa aongaka’mi,

⁴ mbo eluwa bamɔi ba Makedonia ebatoya amamwito lami, bataosh’ino ani okakomyi lisɔnji lia lifaefi la ongoma iso kofomo sɔni, asa kɔni ino lisanga, eoka ya baoi ba liomala lina.

⁵ Eokao itangi nde mbo, bolau mbo ilɔmbɔkɔlɛkɛ bitungani-bi mbo batakɛndɛkɛ end’ino ndokakɔmya lisɔnji lia lifaefi elisotik’ino lisakä liokusokola liao, nde basɔnjɛ̈ke liao kwa bɔsɔmbi, kangä kwa lifaefi lia losamɔ.

⁶ Enyelaka to lioi-li mbo— Oyatolɔɔ koto la wima, etwaka eula ko ɛkɛkɛ; la oyatolɔɔ koto iyongoongo, etwaka imɔ ko likama.

⁷ Boto la boto akusoleke kwa asosang’inde nda botema wande inga l’ikɛnɛnɛ la mbo asotinjakomo, eoka Mungu nd’asami inde oyatofaefa lifaefi la bootaota.

⁸ Mungu atokɔkɔlɔ ndɔɔlɔlɔ bootaota bolau bototina end’ino mbo ko mbile bitotina osɛlɛkɛ lilya lia yeka bitotina, limɔ okusokoleke lifaefi liosungaka bakuwa batotina balau.

⁹ Kwa asɔnɔmɔkɔ nda Lokasa loa Mungu, mbo— Atomelekesa bafaefi, atofaekefa ende eba touwe; Ongoma liengani lilau liande litotikala layalaya.

¹⁰ Limɔ Inde oyatofaefa bɔlɔi koto la lituma liola, efaefak’ino yeka yolɔɔ la yokondaka la eulwesaka eyanu eula ya liengani.

¹¹ Ongoma otofotesomo ko la bitotina, limɔ lifaefi lianu elitokaelomo lasu, litoɔlɛsɛ ebatofomo liao ko kelekele ende Mungu,

¹² eoka likuwa-li lia lisungani litosilesa beeno ya beoto ya Etanda, nde litoelwaka ko ndoyaimwesa Mungu eoka ya kelekele end’Inde.

¹³ Atoluw’iyo oluwa lisungi lianu, limɔ batoinakela Mungu eoka ya lilitesi lianu liolitesa bikela ya Mboli Ilau ya Masiya la eoka ya likaɔ lianu end’iyo la ende batotina;

¹⁴ la iyo ana batosombola loasɔ loanu la batosamak’ino finɛ ko l’eoka ya booto wa Mungu eboetaka nda bekeli yanu.

¹⁵ Kelekele finɛ ende Mungu loasɔ loa lifaefi liande eliti liosanoelomo la baoi!