2 Bakolinto 4 - Le Nouveau Testament in Kele (Lokele) 1958

Tonangoeleke bato Mboli Ilau fololo

¹ Eokao ani ayalak’iso la isosha-si ko l’eoka ya booto, toitowa esole;

² nde tosomachaka njasɔ ya wisakumbo ebile la sɔni, tosofeka ndotimbana la bolimbake, la ndofenyaka wɛndi wa Mungu, kongo ko ani atoisokol’iso wɛndi wa wewe, tosolembeelesa batotina nda betema yau mbo toengani nde la likuwa-li nda baiso ba Mungu.

³ Nde ango Mboli Ilau ebitonangol’iso belinjakomo, ambo bisolinjakomo ko end’iyo ebasokasɛɛsɛlɛ.

⁴ Limɔ mungu wa wenda wa mbile-ye asolinjaka betema ya ebatiimele Ngɛnɛ mbo bataɛnɛ bonyanya wa Mboli Ilau ya tala ya Masiya, Oyayali la liluku lia Mungu angɛnɛ.

⁵ Eoka totiteke boekï wa njasɔ yasu angɛnɛ, kangä eya Masiya Yesu Ngɛnɛ wasu, iso tole ko bɛkɔwa yanu loasɔ loa Yesu.

⁶ Eoka ale ko Mungu oyaongaka mbo— Bonyanya wa löwa botosɔswa nda lilima. Inde angɛnɛ asoanesa betema yasu ndoangangesa liluwani lia tala ya Mungu eyesoanganga nda bɔmbɔ wa Masiya.

Bifembi ebitoyaka ende Botomomu wa Yesu

⁷ Kongo ko tososɛlɛ bondanda-bo wa loketi nda tei ya tɔlɔngɔ mbo bato baluweke mbo bofoka bofi wa wɛndi-bo boti wasu, kangä ewa Mungu.

⁸ Tosokuwamelomo la fangi bitotina, nde tokamiakomu; tosowaka itɔɔ nde totiwe esole;

⁹ basokaeng’iso, nde totimachomo la Mungu; tosokwesomo konda nyɛlɛ, nde totisɛɛsɛlɛsɔmɔ.

¹⁰ Tosokɛndɛkɛndɛ lise lia lise la nda bindo yasu ko lienyakeli lia liwa eliawaka Yesu, mbo loiko loa Yesu imɔ lɔɛnɛsɔmɔkɔ nda bindo yasu.

¹¹ Lise la lise kwa ayal’iso la liwawi, tosofakomo nda besamba ya liwa ndowa loasɔ loa Yesu, ko mbo loiko loa Yesu lɔɛnɛsɔmɔkɔ nda bindo yasu balomboki ebatowaka.

¹² Ongoma to, liwa nd’atokuwel’iso, nde loiko lotowawes’ino.

¹³ Ani asoyal’iso la bolimo wa liimeli ko la bɔfɔnɔ ewayalaka lande oyasɔnɔkɔ mbo— Isoimela, eokao isoonga. La iso imɔ tosoimela, eekao tosokaongake,

¹⁴ eoka tosoluwa mbo Inde oyatɛmwɛsɛkɛ Ngɛnɛ Yesu nda liwa, ɛ̈tɛmwɛsɛkɛ imɔ ko iso amamwito la Yesu la ëmesaka nd’iso amamwito lanu oso wande.

¹⁵ Bitotina-bi yende ko l’eoka yanu, mbo booto wa Mungu ebotoɔlwa ndotumesa likama lia bato, boulweseke bootaota wa liineli lioomalesa Mungu angɛnɛ.

¹⁶ Eokao toitowa esole, ango bindo ebisɔɛnɛlɛ bisosɛɛsɛlɛ, nde botema ebotiɛnɛlɛ botoaelesomo bofoka boyai lise la lise.

¹⁷ Eoka bifembi ebisowaka lasu kwani bieshelaka nd’iso konda layalaya ambɔlɛ wa liomala eliti liokwelomo,

¹⁸ eoka toitowɛlɛ yeka ebisɔɛnɛlɛ bonono, kangä yeka ebiitɔɛnɛlɛ, litina mbo ebisɔɛnɛlɛ bitoumwaka ko mbile sinyo kongo, nde ebiitɔɛnɛlɛ la baiso bende yao ebilakataka layalaya.