2 Bakolinto 3 - Le Nouveau Testament in Kele (Lokele) 1958

Toomaleke eoka ya Ngɛla Eyai ya Masiya

¹ ¿Mbo tosoakola ko ndoongel’iso angɛnɛ? ¿Mbo twende la boeno wa lokasa, kwa bato bamɔi bende la boeno wa lokasa, loko lokasa loongela iso end’ino, kwa lokasa loanu ndoongel’iso ende basi?

² Ino angɛnɛ wende lokasa loasu loongel’iso, elososɔnɔmɔ ko nda betema yanu, lokasa elosoluwana la elosotangokomo la bato batotina;

³ la lokasa-lo losɔɛnɛlɛ fololo mbo lole loa Masiya la losoeshomo lami, lotisɔnɔmɔ la wino, kangä la Bolimo wa Mungu wa Loiko; lotisɔnɔmɔ nda batalɛ kwa asɔnɔmɔkɔ bikela, kangä nda betema ya balomboki.

⁴ Nde iso tosoluwa ndoluwa ongoma ko l’eoka ya Masiya loasɔ loa Mungu angɛnɛ;

⁵ loti to mbo toondu nde iso angɛnɛ ndotanga mbo loende ko loasɔ loasu, kangä ko loasɔ loa Mungu angɛnɛ.

⁶ Mungu nd’asof’iso isosha shoyala baekesi ba ngɛla eyai, eko ngɛla eyetitomo nda lokasa, kangä nda Bolimo; eoka bikela eyasɔnɔmɔkɔ bitoola bato, kongo ko Bolimo ale bofaefi wa loiko.

⁷ Eya to mbo isosha sha liwa eshatomoko la bikela nda batalɛ loeshomo la bɔfɛkɔ wa use bokufesa bana ba Isalaele mbo batatichaka bɔmbɔ wa Mɔsɛ ko l’eoka ya liangangi lifi, ani liangangi lisambotiyama,

⁸ monito bɔfɛkɔ wa isosha sha Bolimo angolongela esha liwa ko fɛɛ?

⁹ Ango bofɛkɔ wa isosha shofaka bato se shaaka sifi, nde simbi to isosha shoenganesa bobe wa bato sisolongela la bɔfɛkɔ wa likama.

¹⁰ Eingo, eshaaka la bɔfɛkɔ oso, kwani siti ’mɔ la bɔfɛkɔ, ko la litina-li liko mbo bɔfɛkɔ wa kwani bosoeta fɛɛ;

¹¹ eoka ango yao eyesosɛɛsɛlɛ eyala la bɔfɛkɔ, simbi to eyelatikalaka koyala la bɔfɛkɔ woeta.

¹² Eoka ya iyɛli sifi esile lasu tosotendela ndoonga fololo,

¹³ inga kwa Mɔsɛ oyalinjaka bɔmbɔ wande l’esinda mbo bana ba Isalaele batawɛlɛ losilo loa bɔfɛkɔ ebosambotiyama bonono.

¹⁴ Nde betema yau loyala betutuku; ko ongoma ko nda eweuse ani atotangomo lokasa loa Ngɛla ya oso, esinda ekotikala angosokolomo nda betema yau, eoka etosokolomo ko l’eoka ya Masiya kongo.

¹⁵ Eingo, ko nda eweuse ani atotangomo Lokasa loa Mɔsɛ, ende kwa mbo esinda esolinja betema yau;

¹⁶ kongo ko atokikwa boto ende Ngɛnɛ wasu, lamao esinda esowatolomo.

¹⁷ Ngɛnɛ wasu ende to Bolimo, nde olo ayali Bolimo wa Ngɛnɛ ko omao bato batikandakomo imɔ.

¹⁸ Nde iso yaatotina ani biɔmbɔ yasu bitilinjakomo imɔ, limɔ tosɔɛnɛ bɔfɛkɔ wa Ngɛnɛ wasu kwa mbo wɛ̈li wa talatala la tosokindolomo nda bɔfɔnɔ wande wa bɔfɛkɔ ko ndomacha bɔfɛkɔ wa oso, eoka wao bosoyael’iso ko la Ngɛnɛ Bolimo angɛnɛ.