2 Bakolinto 13 - Le Nouveau Testament in Kele (Lokele) 1958

¹ Lisanga lia asatɔ-li elisosanga’mi ndoya fɛtɛti end’ino. Nda Lokasa loasɔnɔmɔkɔ mbo— Baölo batotina batokɔkɔmɛsɔmɔ ko la bɛnɔkɔ ya baɛni basatɔ kwa bambale.

² Isotakambes’ebayalaka la njasɔ la isokambes’iyo kwani ko liasi ani iti lanu, kwa aongaka’mi nda lɔkɛndɔ loa imbale ani yayalaka lanu, mbo yeya liasi imi angomacha njasɔ ina la njasɔ ebimɔi imɔ;

³ eoka otikulye mbo Masiya atoonga la bɔnɔkɔ wami sakolo ngo ko wɛnɛ ndembe; kongo ko Masiya ati la bɔlɛmbu end’ino kangä la bofoka wa likama.

⁴ Nde awaka nda lieka ko la bɔlɛmbu, kongo ko kwani ale la loiko ko la bofoka wa Mungu angɛnɛ. Iso imɔ ko ongoma, twende lande la bɔlɛmbu, kongo ko tosoyala la loiko amamwito lande ko la bofoka wa Mungu angɛnɛ nda likomyi lia loasɔ loanu.

⁵ Kɔtɔlɔkɔ betema yanu angɛnɛ oluweke kwa mbo osokɔkɔmɔ nda liimeli; lembeelaka njasɔ yanu angɛnɛ. ¿Otiluwe to mbo Masiya ale nde lanu? Elua otikuliomo to mbo wengani.

⁶ Yenyeli nde mbo otolembeela mbo iso tosokɔkɔmɔ nda likɔtɔli.

⁷ Nde tososombokola Mungu mbo otakela obe ango sinyo, inga to mbo iso twɛnɛlɛkɛ kwa ebasolonga nda likɔtɔli, kangä mbo ino bokɛndɛlɛkɛ la mboka elau, ani iso tosɔɛnɛlɛ kwa ebasofomo se nda likɔtɔli.

⁸ Totikɔkɔkɔlɛ ndokufesa njasɔ ya wewe, kangä ndokɔkɔmɛsɛ wewe.

⁹ Tosooka limɛngɔ ani iso tole la bɔlɛmbu ani ino nd’asokɔkɔmɔ la bofoka. Lisomboli liasu lile ngo ko mbo wenganesomoko cha.

¹⁰ Isosɔnɛl’ino la baoi-ba ani akoyali’mi esika lanu, mbo eyekayeke’mi end’ino, itakomia ino la litulungi ko la isosha esisofomo’mi la Ngɛnɛ, eoka shao sisofomo ndokɔkɔmɛsɛ Etanda, inga to ndomelekesa yao.

Baseeli la baoi ba losilo

¹¹ Isosila to, bitungani yami, tikalaka to la bolau. Ɔlwaka ndoengana, okaka liɔnjɔnji liami. Okanaka la wɛlï, yalanaka la lilatemi lilau, limɔ Mungu Ngɛnɛ wa losamɔ la lilatemi eyalakaka lanu.

¹² Lamolanaka la tochɔu etüchomu end’eba Etanda;

¹³ eba Etanda ono batotina batoseel’ino.

¹⁴ Booto wa Ngɛnɛ wasu ako Yesu Masiya la losamɔ loa Mungu angɛnɛ, la liyalani lia Bolimo Botanu, biyaleke lanu yaatotina.