2 Bakolinto 10 - Le Nouveau Testament in Kele (Lokele) 1958

Isosha la lotendela ya Paulo

¹ Imi angɛnɛ ako Paulo, isolɔmbɔkɔl’ino la liikami se la botema sambo wa Masiya, imi oyasoyala la liɔndwi se oso wanu, nde oyasoyala la boendu ani ayali’mi esika lanu; bamɔi batoonga ongoma to;

² imi to nd’asolɔmbɔkɔl’ino mbo otatinjaka’mi ndoyatamb’ino lotendela loami ani akayaleke’mi lanu, ko lotendela lona elototamba’mi otamba bato ana ebatoenyela mbo twende ebatokɛndɛsɔmɔ ko la yɛmɛ ya bindo.

³ Totokɛndɛkɛndɛ ono nda bindo nde toitonana bita la bonaneli wa bindo,

⁴ biɛla to ebitonana lasu, biti ya balomboki, nde bile la bofoka wa Mungu angɛnɛ ndosɛɛsɛlɛsɛ bakula bafi ba bita,

⁵ ndokwesa baasala ba balomboki la tofenya twa bɔmɛtɔ etosofenya liluwani lia Mungu, ndoundesa baenya batotina kakaa la ndokakalesa bao ende Masiya, bako ebatilitese Inde,

⁶ ndokɔkɔmɔ mbo tokucheke litefoli litotina, ko ani elianu lilitesi lisɔɔlwa.

⁷ Ototicha ko yao ebile fololo oso wa baiso banu! Ango boto koimela wewe mbo inde angɛnɛ ale wa Masiya, ataenyelaka liasi nda botema mbo kwa ayal’inde wa Masiya, ko iso imɔ ko ongoma.

⁸ Eoka ango yeomala sumbu loasɔ loa isosha shasu esisofomo ko la Ngɛnɛ wasu ndokɔkɔmɛs’ino, inga ndokwes’ino se, ani imi angofomo sɔni;

⁹ mbo italɛmbɛ ndowaes’ino ko la kasa-bi ebisɔniki’mi end’ino.

¹⁰ Eoka bamɔi mbo— Kasa ebitosɔnɔk’inde yende biwaü la bofoka finɛ, kongo ko atɔɛnɛ iso wɛnɛ boyaeli wande, bole ko la bɔlɛmbu la boongeli wande bɔlɛlɛmu imɔ.

¹¹ Oyatoonga ani, ataenyelaka liölo-li mbo, kwa ayali nde’mi ani atosɔnɔ’mi lokasa ko esika lanu, yende ko la bɔfɔnɔ-ao nda bekeeli ani yende sisi yanu.

Paulo angoeteela isosha sha Mungu esifomu end’inde

¹² Iso angotendela to ndosakana la ndokweekelana boyaeli wami la boyaeli wa bato ana ebatoinakelaka boyaeli wau angɛnɛ. Atokweekelana iyo, la atosakana iyo angɛnɛ, bati ango la liluwani.

¹³ Nde toitofaala la isosha shoeta esisokweelomo’iso, kongo ko tosolitesa liko elisokweelomo iso la Mungu, la isosha esisoobiamel’imɔ ko ino.

¹⁴ Totieteele ino oso, kwa mbo totiyel’ino; iso nd’ayali eba oso ndoiyel’ino la Mboli Ilau ya Masiya.

¹⁵ Toitofaala finɛ loasɔ loa bonui wa likuwa lia bato basi, kongo ko tosɔkɛsɛ iɛli mbo, akaulweke liimeli lianu, ko ongoma tukela olo atokuwel’iso kosɛngɛ;

¹⁶ mbo tonangoleke Mboli Ilau nda yese ebile fangi yasi yanu, kongo ko iso angoomala l’ifaala loasɔ loa likuwa elisokelomo la tukela ya boto wasi.

¹⁷ Kwa asɔnɔmɔkɔ nda Lokasa mbo— Oyatoomala, aomaleke ko l’eoka ya Ngɛnɛ!

¹⁸ Boto oyasokuliomo ati to inde oyatoinela lokuku loande angɛnɛ, kangä boto oyasoinelomo la Ngɛnɛ.