2 Bakolinto 1 - Le Nouveau Testament in Kele (Lokele) 1958

¹ Imi Paulo, ko la lisangi lia Mungu yende Botomomu wa Masiya Yesu, la Timoteo etungani yasu, liseeli end’eba Etanda ya Mungu nda Kolinto la ende ebasüchomo batotina nda yese etotina ya Akaya,

² bootaota end’ino la lilatemi lia Mungu Sango wasu la elia Ngɛnɛ wasu ako Yesu Masiya.

³ Mungu la Sango wa Ngɛnɛ wasu Yesu Masiya ainelomoko la loomalo, ako Sango wa Booto la Mungu wa liɔngɛsi litotina,

⁴ oyatɔɔngɛkɛsɛ betema yasu nda bifembi yasu bitoti, mbo tokɔkɔlɛkɛ ndɔɔngɛsɛ betema ya bato basi nda bifembi eyau ko la liɔngɛsi elisɔɔngɛsɔmɔkɔ iso ko la Mungu.

⁵ Mbo kwa asoelwa bemusi ya Masiya end’iso, ko ongoma liɔngɛsi lia Masiya lisoelwel’iso.

⁶ Tookesomo bifembi, ele ko litina mbo bɔɔngɛsɔmɔkɔ la mbo buwesomoko nda yao, la tɔɔngɛsɔmɔkɔ nda bifembi eyasu ele imɔ ko l’eoka ya elianu liɔngɛsi, ndokɔkɔmɛsɛ ino ndotendela bifembi ebitokak’iso imɔ ko kwani.

⁷ Iyɛli shasu eoka yanu sitieyaeye, eoka tosoluwa mbo kwa asowatema ino lasu nda bemusi, ko ongoma otowatema ino ko lasu nda liɔngɛsi lia yao.

⁸ Bitungani yami, totilɛmbɛ ino ndoyala botutuku loasɔ loa bifembi biwau eyayaka end’iso nda Asia, mbo twanyɛlɔmɔkɔ nyɛi ndolongela bofoka wasu, ongoma angwɛnɛ imɔ iyɛli sha liwawi shatikalaka lasu.

⁹ Eingo nde, nda betema yasu angɛnɛ twokakä lofomu se loa liwa; litina mbo totalendelo bofoka wasu angɛnɛ, kangä ko Mungu oyatotɛmɔlɔ ebasowa.

¹⁰ Ende Inde oyasɔɔnɔkɔl’iso nda liwa libe la atɔɔnɔkɔlɔ iso imɔ liasi la tosolendelo ko Inde mbo elaɔnɔkɔlɔkɔ iso nda liwa.

¹¹ Ani ino otosungakan’imɔ lasu ko la basomboli banu mbo bato wike bafaekefeke Mungu kelekele eoka yasu loasɔ loa bondanda ewafomoko iso eoka ya basomboli wike.

¹² Eoka loomalo loasu lole mbo botema bosoenyeles’iso wewe mbo beyaeli yasu ende eba wenda-bo, simbi to end’ino, biengani nde la botanu la liengani lia Mungu angɛnɛ, inga nda wɛlï wa balomboki, kangä la booto wa Mungu.

¹³ Eoka totisɔnɛl’ino loasɔ ango lɔmɔi sakolo ngo ko loao elosotangak’ino la elosolembeel’ino wewe, la iyɛli shami sile mbo olembeeleke loao ko nda tuu fololo,

¹⁴ kwa asolembeela ino botuku wa njasɔ kongo, la mbo wende la litina liomala eoka yasu, kwa iso imɔ tolaomalaka nde loasɔ loanu nda lise lina lia Ngɛnɛ wasu ako Yesu.

Loasɔ loa lɔkɛndɔ eloasiakoya Paulo nda Kolinto oso

¹⁵ La eoka yaluwaka ongoma la wɛlï, yasiaka ndotayɛnɛ ino ko oso, mbo yɔlɛsɛk’ino limɛngɔ liasi imɔ

¹⁶ nda lɔkɛndɔ ko nda Makedonia la liasi nda liinywi liami ndosokwa nda Makedonia limɔ ndotikomo lanu nda lɔkɛndɔ loami nda Yudea.

¹⁷ Asangaka to imi ani, ¿mbo isoeyaeyaka? ¿Mbo itotika lisakä la Eingo ee, la Mbayo, kwa atokelaka basenji kongo?

¹⁸ Kwa ayali nde Mungu wolendelomo, ko ongoma lioi liasu end’ino litieyaeye, Eingo ee, la Mbayo!

¹⁹ Eoka Wana wa Mungu ako Yesu Masiya oyanangolomoko end’ino ko lasu ako Silwano la Timoteo, Inde atieyaeye nda Eingo ee la Mbayo, nde Inde ale wewe ko Eingo ko.

²⁰ Inde nd’atokɔchaka basakä batotina ba Mungu mbo Eingo. Eokao ko la Yesu, iso mbo— Ongoma ende Mungu la lotaliomo tala yande.

²¹ Ale ko Mungu oyasokɔkɔmɛs’iso lanu imɔ lisanga nda liuwesi lia Yesu, Oyasüch’iso,

²² la oyasot’iso ndembe ya chapa yande la oyasof’iso Bolimo wande kwa tukä nda betema yasu.

²³ Imi nd’atosingwa lina lia Mungu mbo lioi liami lile wewe mbo itiaɛkɛ nda Kolinto mbo itaokes’ino sɔni finɛ.

²⁴ Loti to mbo tosolɛmbɛ ndoyala ngɛnɛ wa liimeli lianu, kongo ko tosolɛmbɛ ndosungana lanu loasɔ loa bootaota wanu eoka ino osokɔkɔmɔ nda liimeli lianu.