1 Yoane 4 - Le Nouveau Testament in Kele (Lokele) 1958

Lembeelaka bolimo wa wewe la bolimo wa bolimbakeli

¹ Basamomu, wimelëke balimo batoti, kɔtɔlɔkɔ bao oluweke kwa mbo basoyala ba Mungu; eoka batɔndɔli ba nanga wike basokakɛndɛlɛ wenda-bo.

² Otolembeela Bolimo wa Mungu ko ano; bolimo oyatoaola mbo Yesu Masiya asoya nda bindo ya boto, ambo bolimo ona bole wa Mungu;

³ nde bolimo oyaitoaola Yesu, ambo bolimo ona boti wa Mungu, la wao wende wa Bofekwani la Masiya, ewokak’ino mbo botoya nde, la kwani bole oko nda wenda-bo.

⁴ Nde ino, bana bami, wende ba Mungu la osolongela iyo, eoka Inde oyale nda betema yanu, ale ofi wolonga inde oyale nda wenda.

⁵ Iyo bende ba wenda-bo, eokao batoonga ko yao ebisekwi nda wenda la wenda botokak’iyo.

⁶ Iso twende bana ba Mungu, Inde oyaluwi nde Mungu, Inde nd’atokak’iso. Ko la litina-li, tosoluwa bolimo wa wewe la bolimo wa bolimbakeli.

⁷ Basamomu, tosamaneke, eoka losamɔ lososekwa ende Mungu, la boto oyatoyalaka la losamɔ, aotomu nde la Mungu la aluwi nde Mungu.

⁸ Boto oyatiyaleke la losamɔ, atiluwe Mungu; eoka Mungu ende Losamɔ.

⁹ Losamɔ loa Mungu losɔɛnɛlɛ end’iso ko la loasɔ-lo, loko mbo Mungu atomaka Wana wande ɔmwito nda wenda-bo, litina mbo tɔɔlɛkɛ loiko ko lande.

¹⁰ Losamɔ loa wewe losɔɛnɛlɛ ko la loasɔ-lo, inga mbo iso nd’asamaka Inde, kangä mbo Inde nd’asamak’iso la mbo atomaka Wana wande mbo ayaleke Likambi lioendol’iso loasɔ loa batwanelo basu.

Losamɔ loa wewe lotosokokola bɔwa

¹¹ Basamomu, eya mbo Mungu asosamak’iso ongoma, ani lole loasu ndosamakana imɔ.

¹² Angwɛnɛ boto angɔmɔi nd’ɛnɛkɛ Mungu lise ango limɔi; eya mbo tosamakana, ani Mungu koyalaka lasu la losamɔ loande lotɔɔlwa nda betema yasu.

¹³ Ko ongoma, tosoluwa mbo tosoyalaka lande la Inde imɔ ko lasu eoka mbo asofaef’iso Bolimo wande.

¹⁴ La iso nd’asɔɛnɛ la tosoonga fololo mbo Sango atomaka Wana wande ako Bouwesi wa wenda-bo.

¹⁵ Boto oyakaaoleke mbo Yesu ende Wana wa Mungu, ambo Mungu angɛnɛ asoyalaka nda botema wande la inde asoyalaka ko ende Mungu.

¹⁶ La iso nd’aluwi la tosoimela losamɔ elososamaka Mungu esamak’iso. Mungu ale ngo ko Losamɔ la boto oyasoyalaka ngo nda losamɔ, ambo asoyalaka ngo ende Mungu la Mungu imɔ ko end’inde.

¹⁷ Nda loasɔ-lo losamɔ loasu losɔɔlwa mbo toyaleke la lotendela lolau nda lise lia liateli lia njasɔ eoka tosoyala kwa ayali imɔ ko Inde nda wenda-bo.

¹⁸ Nda losamɔ angwɛnɛ bɔwa, nde losamɔ elosɔɔlɔlɔ lososokola bɔwa fwa, eoka bɔwa bole ko loasɔ loa likuchaki la oyasoka bɔwa, akaɔlwi ndoka losamɔ.

¹⁹ Iso nd’asosamaka, eoka Inde nd’asamak’iso ko oso.

²⁰ Eya mbo boto eonga mbo— Isosama Mungu, ani asoiyana la etungani yande, ambo ale la lolanga; eoka inde oyatisame etungani yande oyasɔɛn’inde, ambo atikɔkɔlɛ ndosama Mungu oyatiɛnɛk’inde.

²¹ Limɔ tole la ekela-ye eyatak’Inde, eko mbo— Inde oyasosama Mungu, asameke imɔ ko etungani yande.